ရေကြီး မြေပြိုမှုများကြောင့် သျှမ်းတောင်၊ တောင်ကြီးမြို့နှင့် ရန်ကုန်၊ မန္တလေး ကားလမ်းများ ပြတ်တောက် ပိတ်ဆို့နေသဖြင့် လိုင်းကားများ ပြေးဆွဲမှု ရပ်တန့်ထားပြီး လမ်းခရီး၌ ပိတ်မိနေမှုများလည်း ရှိနေကြောင်း အဝေးပြေးယာဉ်လိုင်းများက ယနေ့ (စက်တင်ဘာလ ၁၁ ရက်) နေ့တွင် ပြောသည်။
မိုးသည်းထန်စွာ ရွာသွန်းမှုကြောင့် ယမန်နေ့ ညနေပိုင်းကစ၍ ကလောမြို့ အနီး ကားလမ်း ရေကျော်နေပြီး ကလောနှင့် ဘုရားငါးဆူကြား မြေပြိုကျမှုများလည်း ရှိနေကြောင်း၊ ဘုရားငါးဆူနှင့် အမြန်လမ်းကို ဆက်သွယ်ထားသည့် ကားလမ်း ရေကျော်နေပြီး ရေတိုက်စားမှုကြောင့် လမ်းများ ပျက်စီးနေသဖြင့် ပျော်ဘွယ်မြို့အနီး ပိတ်မိနေသည့် လိုင်းကားများ ရှိနေကြောင်း တောင်ကြီး အခြေစိုက် အဝေးပြေးယာဥ်လိုင်း တာဝန်ရှိသူ တစ်ဦးက ပြောသည်။
“အခုထိ ပျော်ဘွယ်နားမှာ ပိတ်မိနေတဲ့ ကားတွေရှိသေးတယ်။ ညအိပ်ရမည်ထင်တယ်။ ခရီးသည်တွေ အဆင်ပြေအောင်တော့ စီစဥ်ပေးရမှာပေါ့။ မနက်ဖြန် တောင်ကြီးတက်လို့ရမရလည်း မသေချာသေးဘူး။ ကလောအောက်ဘက်မှာလည်း မြေပြိုတာတွေရှိနေတယ် ကြားတယ်။ ဖုန်းလိုင်းတွေ ပြတ်နေတော့ ဘယ်နား ဘာဖြစ်နေတယ် သေချာမသိရဘူး။ အဲလို ဖြစ်နေတယ်” ဟု ၎င်းကရှင်းပြသည်။
လက်ရှိ တောင်ကြီး၊ ရွှေညောင်၊ ညောင်ရွှေ၊ ကလောမြို့များတွင် ရေကြီးနေပြီး ဖုန်းနှင့် အင်တာနက်လိုင်းများ ပြတ်တောက်နေရာ ဒေသအများစုတွင် MPT ဖုန်းလိုင်းရနေသော်လည်း ကလောမြို့တွင်မူ ဖုန်းလိုင်း အားလုံး ပြတ်တောက်နေကြောင်း ဒေသခံများက ဆိုသည်။
ထို့အပြင် တောင်ကြီးနှင့် မန္တလေးကို ဆက်သွယ်ထားသည့် ရွာငံ- ဟံမြင့်မိုရ် ကားလမ်းပိုင်းတွင်လည်း ရေကြီးမှုကြောင့် လမ်းပိုင်းတချို့ ပျက်စီးနေသဖြင့် ကားများ သွားလာ၍ မရကြောင်း ဒေသခံများက ပြောသည်။
ရေကြီးမှုများကြောင့် တောင်ကြီးမှ ရန်ကုန်နှင့် မန္တလေးမြို့များသို့ ပြေးဆွဲနေသည့် ယာဥ်လိုင်းများ ပြေးဆွဲမှု ရပ်တန့်ထားကြောင်း ယနေ့ ကားလက်မှတ် ရောင်းချခြင်း မရှိကြောင်း ရေပြန်ကျမှုနှင့် လမ်းပြုပြင်သည့် အခြေအနေပေါ်မူတည်၍ ကားများ ပြန်လည် ပြေးဆွဲမည် ဖြစ်ကြောင်း အဝေးပြေးယာဥ် ပိုင်ရှင် တဦးက ပြောသည်။
လက်ရှိ နိုင်ငံတဝှမ်း ရေကြီးမှုများ ကြုံတွေ့နေရာ ပျော်ဘွယ်၊ ရမည်းသင်း၊ နေပြည်တော် တပ်ကုန်း အပါအဝင် အဝေးပြေး ကားလမ်းမများ ဖြတ်သန်းရာ မြို့နယ်များ ရေကြီးနေသဖြင့် ယခုရက်ပိုင်း အတွင်း ကားလမ်းနှင့် ရထားလမ်း ပြတ်တောက် ပိတ်ဆို့မှုများ ဖြစ်ပေါ်နေပြီး ရက်အနည်းငယ် ကြာမြင့်နိုင်ကြောင်း သိရသည်။
Leave a Comments