သျှမ်းပြည် သီပေါမြို့နယ်အတွင်း စစ်ကောင်စီ၏ ပြင်းထန်သော ဗုံးကြဲတိုက်ခိုက်မှုများကြောင့် အရပ်သား (၁၉) ဦးသေဆုံးကာ (၁၉) ဦးဒဏ်ရာရရှိခဲ့ကြောင်း ရှမ်းလူ့အခွင့်အရေးမဏ္ဍိုင် SHRF က ထုတ်ပြန်လိုက်သည်။
အဆိုပါ ထုတ်ပြန်ချက်ကို သြဂုတ်လ ၂၆ရက်တွင်ထုတ်ပြန်ခဲ့ပြီး SHRF ၏ ဇူလိုင်လ ၁၉ ရက်မှ သြဂုတ်လ ၁၉ ရက်ထိ တစ်လတာအတွင်း မှတ်တမ်းကောက်ယူခဲ့သည့် သီပေါမြို့နယ်အတွင်း စစ်ကောင်စီတပ်၏ လေကြောင်းဗုံးကြဲတိုက်ခိုက်မှုနှင့် လက်နက်ကြီးပစ်ခတ်မှုကြောင့် အရပ်သား ထိခိုက်သေဆုံးမှု ဖြစ်သည်။
ထိုအထဲတွင် အရပ်သားသေဆုံးမှု ၁၉ ဦးနှင့် ထိခိုက်ဒဏ်ရာရရှိသူ ၁၉ ဦးရှိကာ တရုတ်ရေနံနှင့် သဘာဝဓာတ်ငွေ့ ပိုက်လိုင်းအနီးရှိ အဆောက်အဦးအပါအဝင် အရပ်သား အဆောက်အဦး (၁၁၀) ကျော် ပျက်စီးခဲ့ကြောင်း SHRF ထုတ်ပြန်ချက်အရ သိရသည်။
စစ်ကောင်စီ လေကြောင်းဗုံးကြဲ တိုက်ခိုက်မှုကြောင့် သေဆုံးသွားသည့် အရပ်သား ၁၉ ဦးထဲတွင် အမျိုးသမီး ၇ ဦးပါဝင်ကြောင်း၊ ထိခိုက်ဒဏ်ရာရရှိသည့် ၁၉ ဦးထဲတွင်လည်း အမျိုးသမီး ၆ ဦးပါရှိကြောင်း ရေးသားထားသည်။
ပြီးခဲ့သည့် ဇူလိုင်လတွင်လည်း သိန္နီမြို့တွင် စစ်ကောင်စီတပ်၏ လေကြောင်းတိုက်ခိုက်မှုကြောင့် အရပ်သား ၁၃ ဦး သေဆုံးခဲ့ပြီး၊ ထိခိုက်ဒဏ်ရာရရှိသူ ၂၄ ဦးနှင့် အဆောက်အဦး ၄၀ကျော် ပျက်စီးခဲ့ကြောင်း SHFR မှ ထုတ်ပြန်ခဲ့သည်။
အလုပ်သင် သတင်းထောက် နန်းဆိုင်ခမ်း ရေးသားသည်။
Leave a Comments