သျှမ်းပြည် လားရှိုးမြို့တွင် “၁၀၂၇ စစ်ဆင်ရေး” ဒုတိယပိုင်း တိုက်ပွဲအတွင်း၌ ပြည်သူများ၏ ခိုးယူခံရသော မော်တော်ယာဉ်များကို ကိုးကန့်တပ်ဖွဲ့ MNDAA ထံ ပြန်လည်ထုတ်ယူနိုင်ကြောင်း သြဂုတ်လ ၂၄ ရက်တွင် ထုတ်ပြန်ထားသည်။

လားရှိုးမြို့ တိုက်ပွဲအတွင်း ခိုးယူခံထားရသော ဒေသခံများ၏ ကား၊ ဆိုင်ကယ်များကို MNDAA ၏ အထူးဒေသ(၁) ရဲတပ်ဖွဲ့မှ သိမ်းဆည်းထားပြီး၊ ကား၊ ဆိုင်ကယ် စသည့် မော်တော်ယာဉ်များကို သက်သေအထောက်အထား နှင့်အတူ ရပ်ကွက် (၁၂) ရှိ အားကစားကွင်း၌ ကိုးကန့်တပ်ဖွဲ့ထံမှ ပြန်လည်ထုတ်ယူနိုင်ကြောင်း ထုတ်ပြန်ချက်တွင် ဖော်ပြထားသည်။

လားရှိုးမြို့တွင် ကိုးကန့်တပ်ဖွဲ့၏ အထူးဒေသ (၁) ရဲတပ်ဖွဲ့ အခြေချ နေထိုင်ပြီးနောက် မြို့အတွင်း လူထုလုံခြုံရေးဝန်းကျင် ပြန်လည်ကောင်းမွန်လာကြောင်း ဆိုထားသည်။

လက်ရှိတွင် လားရှိုးမြို့ အုပ်ချုပ်ရေးကို ကိုးကန့်တပ်ဖွဲ့ MNDAA က လွှဲယူလိုက်ကြောင်း ကြေညာထားပြီး ‘ဝ’တပ်ဖွဲ့ UWSA ကလည်း ၎င်းတို့၏ ‘ဝ’ပြင်ပဆက်ဆံရေးရုံးနှင့် ပိုင်ဆိုင်မှုများကို ကာကွယ်ရန်ဟုဆိုကာ လားရှိုးမြို့ပေါ် ‘ဝ’တပ်ဖွဲ့ လုံခြုံရေးအဖွဲ့ဝင်များ နေရာယူထား ကြောင်းသိရသည်။

လားရှိုးမြို့ တိုက်ပွဲအတွင်း စစ်ကောင်စီ၏ အရှေ့မြောက်ပိုင်း တိုင်းစစ်ဌာနချုပ်- ရမခ ကို ဩဂုတ်လ ၃ ရက်တွင် ကိုးကန့်တပ်ဖွဲ့ MNDAA က ဝင်ရောက် သိမ်းပိုက်နိုင်ခဲ့သည်။

လက်ရှိတွင် လားရှိုးမြို့ပေါ် လျှပ်စစ်မီး မရရှိသေးသော်လည်း မြို့ပြင်ဖက်တွင် Mytel ဖုန်းလိုင်းများ ရရှိနေပြီး တိုက်ပွဲပြင်းထန်စဉ် စစ်ဘေးတိမ်းရှောင်သွားသည့် ဒေသခံ တချို့တဝက်သာ နေရပ်ပြန်လာကြောင်း သိရသည်။