နိုင်ငံခြား ငွေလဲလှယ်နှုန်း ကျဆင်းလာသော်လည်း ကုန်ဈေးနူန်းပြန်မကျသေးသဖြင့် အိမ်ရှင်မများ စိုးရိမ်ပူပန်မှုများရှိနေကြောင်း သတင်းရရှိသည်။

ပြီးခဲ့သည့် ဇွန်လိုင်လ နောက်ဆုံးပတ်မှစပြီး ထိုင်းဘတ်ငွေဈေးနှင့် တရုတ်ယွမ်ဈေးမှာ အဆမတန်မြင့်တက်ခဲ့တာကြောင့် ကုန်ဈေးနှုန်းများလည်း သုံးဆ လေးဆထက်ပိုမိုမြင့်တက်ခဲ့သည်။

မြန်မာငွေတစ်သိန်းလျှင် ဘတ်ငွေ( ၄၉၀) နှင့် တရုတ်ယွမ် ၁၀၀လျှင် မြန်မာငွေ( ၉သောင်းကျော်) အထိမြင့်တက်ခဲ့ပြီး ယခုရပိုင်းအတွင်း ဘတ်ဈေး၊ ယွမ်ဈေးများကျဆင်းကာ ဘတ်ငွေ( ၆၂၅ )လျှင် ကျပ်ငွေတစ်သိန်းကျပ် ရရှိနေပြီး ၁၀၀ယွမ်လျှင် ကျပ်ငွေ (၇၄၀၀၀-၇၉၀၀၀) ကျပ်အထိ ကျဆင်းလာသည်။

ထိုင်း-မြန်မာနယ်စပ် တာချီလိတ်နှင့် ကျိုင်းတုံမြို့ဘက်တွင် ဘတ်ဈေးကျနေသော်လည်း ကုန်ဈေးနှုန်းမကျသေးသေသဖြင့် ဝင်ငွေထွက်ငွေမမျှကာ စားဝတ်နေရေးအတွက် စိုးရိမ်ပူပန်မှုတွေ ကြုံနေကြသည်။

ပြီးခဲ့သည့် မေလနှင့် ဇွန်လတွင် သျှမ်းဆန် တစ်အိတ်လျှင် ၁သိန်း၊ ဆီတစ်ဗူးလျှင် ကျပ်၂သောင်းမျှသာ နှင့် ကြက်ဥတစ်လုံးလျှင် ကျပ်ငွေ ၃၀၀ လောက်သာရှိခဲ့သော်လည်း ယခုတွင် ဆန်တစ်အိတ်လျှင် သုံးသိန်းကျော်၊ ဆီတစ်ဗူးလျှင် ကျပ်ငွေ ၅သောင်းနှင့် ကြက်ဥတစ်လုံးလျှင် ၆၀၀ကျော် အထိရှိနေသည်။

“ အိမ်ရှင်မတွေကတော့ ခေါင်းကိုက်ကြပြီပေါ့ ။ ဝင်ငွေထွက်ငွေက မမျှဘူးလေ။ အရင်က လစာက တစ်သိန်းခွဲဆို ခုလဲ တစ်သိန်းခွဲပဲ။ ကုန်ဈေးနှုန်းတက်လို့ လစာတက်လာတယ်လို့မရှိဘူးလေ။ ခုဆို မာမားတစ်ထုတ်ကို ၁၅၀၀ တောင်ရှိနေပြီ၊မျက်စောင်းတောင်မထိုးရဲဘူး။” ဟု ဒေသခံ တစ်ဦးက သျှမ်းသံတော်ဆင့်ကို ပြောသည်။

ငွေဈေးမတည်ငြိမ်မှုများကြောင့် ဘတ်ငွေသာလျှင် ကိုင်ဆောင်ထားကြပြီး စက်သုံးဆီများလည်း ပြတ်လပ်နေတာကြောင့် ကုန်ပစ္စည်းများ ပြတ်လပ်သွားမည်ကို စိုးရိမ်နေကြောင်း အဆိုပါ ဒေသခံတစ်ဦးကထပ်လောင်းပြောသည်။

ထို့အပြင် တရုတ်-မြန်မာနယ်စပ်ဖြစ်သည့် မူဆယ်နှင့် လားရှိုးဘက်တွင်လည်း ကုန်စျေးနှုန်း မြင့်တက်နေသဖြင့် လားရှိုးစစ်ရှောင်များအနေဖြင့် ခေါက်ဆွဲထုတ် နှင့် ကော်ဖီမစ်ထုတ်တို့ကိုသာ စားသောက်နေရကြောင်းသိရသည်။

“ ခုက စစ်ကလည်းရှောင်လာတယ်။ ဝင်ငွေလည်းမရှိဘူး။ ယွမ်ဈေးကျနေလည်း ဈေးနှုန်းက မကျတော့ ဘာမှ မထူးဘူး။ ဒီမှာက ကုန်ဈေးနှုန်းက သုံးဆလောက်တက်နေတာ။ စားသောက်ကုန်အတွက်က ခက်ခဲတာပေါ့လေ။အခုဆို ပရဟိတ အဖွဲ့က ကူညီပေးတဲ့ ပိုက်ဆံနည်းနည်းပဲရှိတာ။ အိမ်ရှင်မအနေနဲ့ စီမံခန့်ခွဲဖို့ ခက်တယ်။ မလောက်ငှတော့”ဟု စစ်ရှောင်အမျိုးသမီးတစ်ဦးက ဆိုသည်။

လက်ရှိသျှမ်းမြောက်တွင် ဆန်တစ်အိတ်လျှင် ၂သိန်း၊ ကြက်ဥတစ်လုံး ၇၀၀ ၊ စိန်ပတ္တမြား တစ်ပိဿဗူး နှစ်သောင်းခွဲ၊ ကြက်သွန်နီတစ်ပိဿလျှင် ကျပ်ငွေ တစ်သောင်းခွဲနှင့် ဝက်သားတစ်ပိဿလျှင် ကျပ် ၅သောင်းအထိ ပေးဝယ်နေရကြောင်းသိရသည်။

ယခုကဲ့သို့ကုန်ဈေးနူန်းတက်လာခြင်းသည် စက်သုံးဆီများပြတ်လပ်ခြင်းကြောင့် သယ်ယူပို့ဆောင်ရေးအတွက်ပါ ခက်ခဲနေကြောင်း သျှမ်းပြည်လူထုက ပြောသည်။

အလုပ်သင် သတင်းထောက် နန်းလရောင် ရေးသားသည်။​