သျှမ်းပြည် သီပေါမြို့နယ်အတွင်း မိုင်းခွဲဖျက်ဆီးခံထားရသည့် စဉ့်အင်တံတားနှင့် ဆွတ်လန်းတံတားတို့ကို ညီနောင်မဟာမိတ်တပ်များက ပြန်လည်ပြင်ဆင် တည်ဆောက်နေကြောင်း စုံစမ်းသိရသည်။
ဩဂုတ်လ တတိယပတ်မှ စတင်ပြီး သီပေါမြို့နယ်အတွင်း မန္တလေး-လားရှိုး ပြည်ထောင်စုလမ်းမကြီးပေါ်ရှိ ဆွတ်လန်းကျေးရွာအနီး ပန်စောက်တံတားနှင့် စဉ့်အင်တံတားတို့ကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ကိုးကန့်တပ်ဖွဲ့ MNDAA တို့က ပြန်လည်ပြင်ဆင် တည်ဆောက်နေကြောင်း သီပေါဒေသခံများက ပြောသည်။
“စဉ့်အင်တံတားကြီးကတော့ ကိုးကန့်တပ်က သံဘောင် ပြန်လာတပ်ပေးနေတယ်၊ ပြီးသွားရင်တောင် ကားသေးပဲ ဖြတ်လို့ရဦးမယ်။ လောလောဆယ်တော့ စဉ့်အင် ဖောင်ဆိပ်ကနေ ကမ်းကူးပေးတာတော့ ပုံမှန်ပြန်ဖွင့်ပေးနေတယ်။ ဆွတ်လန်းရွာနားက မိုင်းခွဲခံရတဲ့ ပန်စောက်တံတားကတော့ ပြင်ပြီးလို့ ဖြတ်သွားနေကြပြီ”ဟု သီပေါမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လားရှိုးမြို့မှ လာသည့် စစ်ဘေးရှောင် အိမ်စီးကားများကို စဉ့်အင်ဖောင်ဆိပ်တွင် ပုံမှန်အတိုင်း စက်လှေဖြင့် ကမ်းကူးပေးနေပြီး ထိုမှတဆင့် သီပေါ၊ နမ့်လန်ဘက်သို့ ဆက်သွား၍ ရကြောင်း သိရသည်။
“၁၀၂၇ စစ်ဆင်ရေး” ပထမပိုင်းတွင် သီပေါမြို့ ပတ်ပတ်လည်ရှိ အရေးပါသည့် တံတားကြီးများဖြစ်သော ကျောက်မဲ-သီပေါအကြား ကျင်သီတံတား၊ သီပေါ-နမ္မတူအကြား မိုးတေတံတားနှင့် သီပေါ-လားရှိုးကြားရှိ စဉ့်အင်တံတားကြီးများ မိုင်းခွဲဖျက်ဆီးခံရခြင်းကြောင့် ဒေသခံပြည်သူများမှာ လမ်းခရီးကြန့်ကြာပြီး အဆင်မပြေမှုများစွာ ဖြစ်ပေါ်ခဲ့ရသည်။
လက်ရှိတွင် သီပေါမြို့ပေါ်ကို TNLA ပူးပေါင်းတပ်ဖွဲ့က ထိန်းချုပ်ထားပြီး သီပေါမြို့အခြေစိုက် စစ်ကောင်စီတပ် ခလရ-(၂၃)၊ ခမရ-(၅၀၃၊ ၅၀၄) တပ်ရင်းများကို ဆက်လက်ထိုးစစ်ဆင် တိုက်ခိုက်လျက်ရှိကြောင်း ဒေသခံများက ပြောသည်။
အလားတူ သီပေါမြို့နယ်အတွင်းရှိ နောင်ကော်ကြီးအခြေစိုက် စစ်ကောင်စီတပ် ခလရ-(၁၄၇) ကိုလည်း ကိုးကန့်တပ်ဖွဲ့ MNDAA က တိုက်ခိုက်သိမ်းပိုက်ထားပြီး နမ့်လန်မြို့ အနီးတဝိုက်သို့ ဆက်လက်အင်အားဖြည့်တင်းနေကြောင်း သိရသည်။
Leave a Comments