သျှမ်းပြည်မြောက်ပိုင်း၊ သီပေါမြို့တွင် စစ်ကောင်စီ၏ လက်နက်ကြီး ပစ်ခတ်မှုကြောင့် အမျိုးသမီး လက်နက်ကြီးထိမှန်သေဆုံးပြီး၊ နေအိမ် ၃လုံးပျက်စီးသွားကြောင်း သတင်းရရှိသည်။
ပြီးခဲ့သည့်( ဩဂုတ်လ ၁၀ရက်) မှစတင်ပြီး သီပေါအခြေစိုက် စစ်ကောင်စီ ခြေလျင်တပ်ရင်း ခလရ(၂၃)၊ ခြေမြန်တပ်ရင်း ခမရ-၅၀၃/၅၀၄ တို့ကို တအာင်းအမျိုးသားလွတ်မြောက်ရေးတပ်မတော် (TNLA) နှင့် PDF ပူးပေါင်းတပ်တို့က ထိုးစစ်ဆင်တိုက်ခိုက်ခဲ့သည်။
ယမန်နေ့ (ဩဂုတ်လ ၁၉ ရက်) နံနက် ၂ နာရီဝန်းကျင်တွင် စစ်ကောင်စီမှ သီပေါမြို့တွင်းသို့ လက်နက်ကြီးဖြင့် ရမ်းသမ်းပစ်ခတ်ခဲ့သဖြင့် မြို့လယ်ရပ်ကွက် ၊ဩဘာလမ်းအဆုံး ရထားလမ်းအကျော်ရှိ ကျေးရွာသို့ကျရောက်ကာ နေအိမ်သုံးလုံးပျက်စီးပြီး အမျိုးသမီးတစ်ဦး ထိခိုက်သေဆုံးသွားကြောင်း သီပေါမြို့ခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
“ တိုက်ပွဲမဖြစ်ပဲနဲ့ စစ်တပ်က လက်နက်ကြီးပစ်တာ။ တရုတ်အဖွားလည်း သေတယ်။ အိမ်တွေလည်းထိတယ်။ ပြီးတော့ အင်တာနက်လိုင်းတွေလည်း အကုန်ပြတ်သွားတယ်။ မြို့ပြင်မှာပဲ ဆက်သွယ်လို့ရတော့တာ။” ဟု သီပေါမြို့ခံတစ်ဦးက ပြောသည်။
အလားတူ( ဩဂုတ်လ ၁၉ ရက်) နံနက် ၁၁နာရီခွဲ အချိန်တွင် စစ်ကောင်စီ၏ လက်နက်ကြီးကြောင့် AAA စက်သုံးဆီ သိုလှောင်ကန်မီးလောင်ပြီး နေအိမ်များကို ထိခိုက်ခဲ့သည်။
တိုက်ပွဲဖြစ်ပွားခြင်း မရှိသော်လည်း စစ်ကောင်စီမှ လက်နက်ကြီးဖြင့် ပစ်ခတ်နေမှုကြောင့် စစ်မရှောင်ဘဲ ကျန်ရှိနေ့သည့် ပြည်သူများက စိုးရိမ်နေကြသည်။
“ မြို့တွင်းမှာယော ရွာထဲတွေမှာယော (TNLA) တပ်တွေရှိနေတယ်။ စစ်ကောင်စီက လေယာဉ်နဲ့ လာပစ်မှာ ကြောက်နေရတယ်။တစ်မြို့လုံးနီးပါးစစ်ရှောင်ကုန်ကြပြီ။ ကျန်တဲ့သူကလည်း ကျန်သေးတာပေါ့” ဟု အမျိုးသမီးက ထပ်လောင်းပြောသည်။
အဆိုပါ သီပေါဒေသခံများမှာ နီးစပ်သည့် ကျေးရွာများတွင်စစ်ဘေးရှောင်နေကြရပြီး ပိုက်ဆံတတ်နိုင်သည့်သူများက အခြားမြို့သို့ သွားရောက်ရှောင်နေကြရပြီး၊ ကျန်ရှိနေသည့် စစ်ရှောင်များအတွက် နယ်စည်းမခြားပရဟိတအဖွဲ့မှ ကူညီဆောင်ရွက်ပေးနေသည်။
လက်ရှိသီပေါမြို့တွင် တိုက်ပွဲများ ရပ်တန့်နေပြီး စစ်ကောင်စီတပ်များကို လက်နက်ချရန်အတွက် ညီနောင်မဟာမိတ်ဖြစ်သည့် (TNLA)နှင့် (MNDAA) တို့က ဖိအားပေးနေကြောင်း သိရသည်။
တိုက်ပွဲဖြစ်ပွားသည့်ရက်အတွင်း စစ်ကောင်စီမှ လေကြောင်းမှတစ်ဆင့် အပြင်းထန်ဗုံးကြဲတိုက်ခိုက်ခဲ့တာကြောင့် နေအိမ်အတွင်း ပိတ်မိနေသည့် အရပ်သားပြည်သူများ ဗုံးဆံထိမှန်သေဆုံးခဲ့ပြီး တိုက်ပွဲဖြစ်စဉ်တလျှောက်တွင် နှစ်ဘက်တိုက်ပွဲအတွင်း အရပ်သားပြည်သူ( ၂၀) ကျော်သေဆုံးသွားခဲ့ကြောင်းသိရသည်။
အလုပ်သင် သတင်းထောက် နန်းလရောင် ရေးသားသည်။
