သျှမ်းပြည်မြောက်ပိုင်း သီပေါမြို့နယ် တာလုံကျေးရွာရှိ ဇက်ကူးဆိပ်တွင် စက်လှေတစီးနစ်မြှုပ်ခဲ့ပြီး လူ ၅ဉီးပျောက်ဆုံးမှုကြောင့် ဒေသခံများ စက်လှေစီးရန် ကြောက်နေကြောင်း သတင်းရရှိသည်။
ယမန်နေ့ (ဇူလိုင် ၁၉ ရက်) နံနက် ၂ နာရီခွဲတွင် တာလုံဇက်ကူးဆိပ်၌ ကားတစ်စီးအား မြစ်ဖြတ်ကူးရန် တင်ဆောင်နေစဉ် ဇက်ကြိုးပြတ်တောက်သွားခဲ့သဖြင့် ဇက်ပေါ်ပါလာသူ ၇ ဦးအနက် ၅ ဦးမှာ ရေထဲမျောပါသွားပြီး ၂ ဦးသာ အသက်ရှင်လွတ်မြောက်ခဲ့ကြောင်း သီပေါမြို့ခံ အမျိုးသားတစ်ဦးက ပြောသည်။
“ အခု လူတွေက စက်လှေစီးဖို့ ကြောက်နေကြပြီ။ ဒီမိုးရာသီက ရေစီးသန်တော့ ကားရော လှေရော ချက်ချင်းမျောပါသွားတာ။ ဘယ်သူမှ ဘာမှမလုပ်နိုင်လိုက်ဘူး။ ၅ ယောက်ကတော့ ပျောက်ဆုံးနေတုန်းပဲ” ဟု ၎င်းက ပြောသည်။
လက်ရှိတွင် ဒေသခံကယ်ဆယ်ရေးအဖွဲ့များက ပျောက်ဆုံးနေသူများကို ရှာဖွေလျက်ရှိသော်လည်း မိုးရာသီ မြစ်ရေမြင့်တက်မှုနှင့် ရေစီးသန်မှုတို့ကြောင့် အခက်အခဲများ ကြုံတွေ့နေရကြောင်း ၎င်းက ဆိုသည်။
ယခုကဲ့သို့ စက်လှေတိမ်းမှောက်မှုကြောင့် ဒေသခံများမှာ ပိုမိုထိတ်လန့်သွားကြပြီး မြစ်ကိုဖြတ်ကူးတိုင်း အသက်ဘေးအတွက် စိုးရိမ်နေကြောင်း သိရသည်။
“အခုက မြစ်ရေလည်း တက်နေတော့ ကြောက်တာတစ်ခု၊ ပြီးတော့ စက်လှေမှောက်သွားတယ်လို့ ကြားလိုက်ရတော့ လူတွေက ပိုသွားကြောက်သွားတာပေါ့။ တချို့ဆိုရင် ကြောက်လွန်းလို့ လုံးဝမသွားရဲတော့ဘူး” ဟု ၎င်း အမျိုးသားတစ်ဦးက ထပ်လောင်းပြောသည်။
သီပေါတံတားသည် သျှမ်းပြည်မြောက်ပိုင်း ကုန်သွယ်ရေးအတွက် အချက်အခြာကျသော လမ်းမကြီးပေါ်တွင် တည်ရှိပြီး ပိတ်ထားခဲ့သည်မှာ ၈ လကျော် ကြာမြင့်နေပြီဖြစ်သည်။
၁၀၂၇ စစ်ဆင်ရေးအတွင်း သီပေါမြို့နှင့် တံတားများကို တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) က ထိန်းချုပ်ခဲ့သော်လည်း နောက်ပိုင်းတွင် တရုတ်အစိုးရ၏ ဖိအားပေးမှုကြောင့် ၂၀၂၅ ခုနှစ် အောက်တိုဘာလတွင် စစ်ကော်မရှင်ထံ ပြန်လည်လွှဲပြောင်းပေးခဲ့ရကြောင်း သိရသည်။
၂၀၂၅ ခုနှစ် နိုဝင်ဘာလကတည်းက စတင်ပိတ်ထားခဲ့သည့် အဆိုပါတံတားနှင့် ပတ်သက်၍ ယနေ့ (ဇူလိုင် ၂၀ ရက်) လွှတ်တော်အစည်းအဝေးတွင် ကြယ်ပွင့်ပြမေးခွန်း မေးမြန်းရန် ပြင်ဆင်ထားကြောင်း သီပေါမြို့နယ် ပြည်သူ့လွှတ်တော်ကိုယ်စားလှယ် စိုင်းကောင်းသက်စံက ပြောသည်။
လက်ရှိတွင် သီပေါတံတား၏ တစ်ဖက်ခြမ်းကို စစ်ကော်မရှင်က ထိန်းချုပ်ထားပြီး ကျန်တစ်ဖက်ခြမ်းကို ကိုးကန့်တပ်ဖွဲ့ (MNDAA)နှင့် မြောက်ပိုင်းမဟာမိတ်တပ်များက ထိန်းချုပ်ထားသည်။
သို့သော်လည်း တံတားပိတ်ထားမှုကြောင့် ဒေသခံများမှာ အန္တရာယ်ရှိသော ဒုဋ္ဌဝတီမြစ်ကို စက်လှေဖြင့် စွန့်စားကူးနေရကာ စက်လှေခအဖြစ် တစ်ဦးလျှင် ကျပ် ၅,၀၀၀ မှ ၂၀,၀၀၀ အထိ ပေးဆောင်နေရသဖြင့် ခရီးစရိတ်မှာ ပုံမှန်ထက် အဆမတန် မြင့်တက်နေသည်။
ပြီးခဲ့သည့် (ဇူလိုင်လ ၁၇ ရက်) တွင်လည်း ဒုဋ္ဌဝတီမြစ်ကို ဖြတ်ကူးလာသည့် ကူးတို့လှေတစ်စီးသည် ကမ်းကပ်ရန် ကြိုးပမ်းစဉ် တိမ်းမှောက်မှု ဖြစ်ပွားခဲ့သည်။
အဆိုပါ ဖြစ်စဉ်အတွင်း လူတစ်စုံတစ်ရာ ထိခိုက်ဒဏ်ရာရရှိမှု မရှိခဲ့ဘဲ မြစ်အတွင်းသို့ ကျသွားသည့် ပစ္စည်းများကိုမူ ပြန်လည် ဆယ်ယူနိုင်ခဲ့ကြောင်း ဒေသခံများ၏ ပြောကြားချက်အရ သိရသည်။
Leave a Comments