သျှမ်းပြည် သီပေါမြို့နယ် နောင်ကော်ကျေးရွာအုပ်စုတွင် ဒေသခံအမျိုးသားတစ်ဦးအား ကိုးကန့်တပ်ဖွဲ့ MNDAA တပ်သားများမှ သေဆုံးသည်အထိ စစ်ဆေးရိုက်နှက်ခဲ့ကြောင်း စုံစမ်းသိရသည်။
ဖြစ်စဉ်မှာ ဇန်နဝါရီလ (၂၉) ရက် ည(၈)နာရီခန့်တွင် သီပေါမြို့နယ် နောင်ကော်ကျေးရွာအုပ်စု ပန်မြိုင်းကျေးရွာတွင် နေထိုင်သည့် အသက် (၆၃) နှစ်အရွယ် လုံးပန်သည် တောင်ယာတဲ အိပ်စောင့်ရန် သွားနေစဉ် လမ်း၌ ကိုးကန့်တပ်သားများနှင့် တွေ့ဆုံခဲ့ပြီး ၎င်းကိုစစ်ဆေးရန်ဟု ဆိုကာ MNDAA တပ်စခန်းထဲသို့ ဖမ်းဆီးခေါ်ဆောင်ခံခဲ့ရသည်။
ထို့နောက် ပန်မြိုင်းရွာမှ နမ့်ပုတ်ရွာဘက် သွားရမည့်လမ်းရှိ MNDAA စစ်ဆေးရေးဂိတ်တွင် အပြင်းအထန် ရိုက်နှက်စစ်ဆေးခံနေရသည့် လုံးပန် ကို နောင်ကော်ကျေးရွာ တာဝန်ရှိသူများမှ အာမခံဖြင့် ပြန်လည်ခေါ်ထုတ်လာရပြီး ဇန်နဝါရီလ (၃၀) ရက် နံနက်ပိုင်း (၁၁) နာရီခန့်တွင် ရိုက်နှက်ခံထားရသည့် ညိုမည်းဒဏ်ရာများဖြင့် သေဆုံးသွားခဲ့ကြောင်း ဖြစ်စဉ်သိရှိသူတစ်ဦးက သျှမ်းသံတော်ဆင့်ကို ပြောသည်။
“နောင်ကော်ရွာလူကြီးတွေ လုံးပန် ကို အာမခံနဲ့ ပြန်ရွေးထုတ်လာရတာ။ ကိုးကန့်စစ်သားတွေ သူ့ကို ရိုက်ပြီး စစ်မေးထားလို့ ကျောပြင်နဲ့ ခြေသလုံးတွေ တော်တော်လေး ညိုမည်းနေတယ်။ လုံးပန် အိမ်ပြန်ရောက်တာနဲ့ အဲ့ဒီဒဏ်ရာတွေကြောင့်ပဲ ဆုံးသွားတယ်” ဟု ဖြစ်စဉ်သိရှိသူ သီပေါဒေသခံ အမျိုးသားတစ်ဦးက ပြောသည်။
သီပေါဒေသခံ အမျိုးသားတစ်ဦးကို အသက်သေဆုံးသည်အထိ ရိုက်နှက်ခဲ့သည့် ကိုးကန့်တပ်သားများမှာ သီပေါမြို့နယ်အတွင်း လှုပ်ရှားနေသည့် MNDAA တပ်မဟာ-၅၁၁ လက်အောက်ခံ တပ်ရင်းမှဖြစ်ကြောင်း သိရသည်။
ဇန်နဝါရီလ (၃၁) ရက်တွင် သေဆုံးသူ၏ ကျန်ရစ်သူ မိသားစုဝင်များထံ MNDAA ဘက်မှ တာဝန်ရှိသူများ လာရောက်တွေ့ဆုံပြီး လျော်ကြေးငွေအဖြစ် ကျပ်သိန်း (၂၀) ပေးအပ်ကာ အမှုကြေအေးပေးရန် ပြောဆိုခဲ့ကြောင်း ဒေသခံများထံမှ သိရသည်။
“နောင်ကော်ဘက်မှာ အခြေအနေလည်း ငြိမ်နေတာ၊ အဲ့တာကို လူသေတဲ့အထိ ဘာလို့ ရိုက်ပြီး စစ်မေးလဲ ဆိုတာ နားမလည်နိုင်ဘူး။ မနေ့က ကိုးကန့်ဘက်က ပိုက်ဆံ သိန်း ၂၀ နဲ့ မိသားစုကို လာပေးတယ်၊ ဆွေမျိုးတွေကတော့ မကျေနပ်ပေမယ့် ဘာမှလည်း မတတ်နိုင်ဘူးလေ။ သူတို့လည်း ကြောက်တော့ ကိုးကန့်စစ်သားတွေနဲ့ အငြင်းအခုံ မလုပ်ရဲဘူး” ဟု သီပေါဒေသခံ ၎င်းအမျိုးသားက ဆက်ပြောသည်။
သီပေါမြို့နယ် ပန်မြိုင်းကျေးရွာအနီးတွင် စစ်ဆေးရေးဂိတ် ဖွင့်လှစ်ထားသည့် MNDAA တပ်ဖွဲ့သည် တောင်ယာတဲ အိပ်စောင့်ရန်သွားသော လုံးပန် ကို ဖမ်းဆီးရိုက်နှက်ခဲ့ရာ နေအိမ်သို့ ပြန်ရောက်ပြီးနောက်တွင် ရိုက်နှက်ခံရသော ဒဏ်ရာများဖြင့် သေဆုံးသွားခဲ့ခြင်းအတွက် သျှမ်းကျောင်းသားသမဂ္ဂ (TSU) မှ ပြင်းထန်စွာ ကန့်ကွက်ရှုတ်ချထားပြီး ပြည်သူများကို ရိုက်နှက်သတ်ဖြတ်ခြင်းသည် စစ်ရာဇဝတ်မှု ကျူးလွန်ခြင်းဖြစ်ကြောင်း ယနေ့(ဖေဖော်ဝါရီလ ၁ ရက်) တွင် ထုတ်ပြန်ထားသည်။
ပြီးခဲ့သည့် ဇန်နဝါရီလ ၃၀ ရက်တွင် လားရှိုးမြို့ပေါ်ရှိ ဆင်နှစ်ကောင်ဟိုတယ်တွင် စစ်ကော်မရှင်တပ်နှင့် MNDAA ကိုယ်စားလှယ်များ ထပ်မံတွေ့ဆုံ ဆွေးနွေးခဲ့ပြီး လားရှိုး-သီပေါကြားရှိ ပြည်ထောင်စုလမ်းမကြီးပေါ်တွင် MNDAA ဘက်မှ စစ်ဆေးရေးဂိတ်များ ပြန်လည်နေရာယူ ဖွင့်လှစ်ခဲ့ကြောင်း ဒေသခံများထံမှ သိရသည်။
Leave a Comments