သျှမ်းပြည်တောင်ပိုင်း၊ ဆီဆိုင်မြို့ မြောက်ဘက်ဒေသတွင် ပအိုဝ်းပြည်သူ့စစ် (PNO) က ဆယ်ရက် တစ်ကြိမ် တပ်သားသစ် (၅) ယောက်စီ စုဆောင်းနေကြောင်းသိရသည်။
ပြီးခဲ့သည့် ဇန်နဝါရီ ၂၃ ရက်နေ့တွင် စစ်ကောင်စီ၊ ပအိုဝ်းပြည်သူ့စစ် ( PNO)နှင့် ပအိုဝ်းအမျိုးသားလွတ်မြောက်ရေးတပ်မတော် ( PNLA) တို့ တိုက်ပွဲ စတင်ဖြစ်ပွားခဲ့ပြီး ဆီဆိုင်ဒေသခံအများအပြား စစ်ဘေးတိမ်းရှောင်ခဲ့ကြရသည်။
ယခုလက်ရှိတွင် ဆီဆိုင်မြို့အတွင်း တိုက်ပွဲများရပ်နားနေပြီး ကျေးရွာအများစုမှာ တိုက်ပွဲ ပြင်းထန်လျက်ရှိကာ တိုက်ပွဲရပ်တန့်နေ့သည့် ဆီဆိုင်မြို့တွင်း လာရောက်နေထိုင်ရန်အတွက် (PNO) မှ စစ်ဘေးရှောင်ပြည်သူများကို ပြန်ခေါ်ကာ စစ်မှုထမ်းခိုင်းနေကြောင်းသိရသည်။
“ စစ်ရှောင်တွေကို နေအိမ်ပြန်လာခိုင်းတယ်။ မပြန်လာရင် ခြံဝိုင်းသိမ်းမယ်လို့ပြောလို့ ပြန်လိုက်ရတယ်။ ပြန်ရောက်တော့ ဆယ်ရက်တစ်ခါ လူ(၅) ယောက် ပေးရမယ်ပြောတယ်။ ပိုက်ဆံလည်း ထည့်ရတယ်။ “ ဟု ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်မှုထမ်းဆင့်ခေါ်မှုကြောင့် ဆယ်ရက်လျှင် လူ(၅)ယောက်ပေးနေရပြီး ယခုဆိုလျှင် သုံးကြိမ်မြောက် စုဆောင်းသွားကြောင်း ၎င်းကဆက်ပြောသည်။
ဒါ့အပြင် (PNO) မှ စစ်ဖိနပ်နှင့် ယူနီဖောင်း အတွက် တစ်အိမ်လျှင် ကျပ်ငွေ( ၄သောင်းအထက်) ကောက်ယူနေပြီး ကားရှိသည့် အိမ်လျှင် ကျပ်ငွေ တစ်သိန်းနှင့် ထော်လာဂျီ ရှိသည့် အိမ်လျှင် ကျပ်ငွေ( ၅သောင်း) စသည်ဖြင့် ကောက်ယူနေလျှက်ရှိသည်။
စစ်သင်တန်းတက်ပြီးသည့် သူများကို လုံခြုံရေးဂိတ်စောင့်အဖြစ်ထားပြီး အချို့သောသင်တန်းသားကို ရှေ့တန်းသို့ပို့ဆောင်နေကြောင်းသိရသည်။
“ ဘာမှမတတ်တဲ့ သူတွေကို ရှေ့တန်းပို့တာ။ တချို့မိဘတွေဆို ငိုပြီး (PNO) ကိုတောင်းပန်တယ်။ သူတို့ကို မသွားခိုင်းဖို့ ဒါပေမဲ့ မရဘူး သွားရတယ်။ ရှေ့တန်းပို့လိုက်တဲ့ လူတွေအတွက် မိဘတွေက ဗေဒင်မေးပြီး ယတြာတွေ လုပ်ပေးနေရတယ်။” ဟု အဆိုပါ အမျိုးသမီးက ထပ်လောင်းပြောသည်။
ယခု လက်ရှိဆီဆိုင်မြို့တွင် အလုပ်အကိုင်ရှားပါးလာကာ ကုန်ဈေးနူန်းတွေ တက်လာကြောင့် စားဝတ်နေရေးအတွက် ခက်ခဲနေပြီး သူခိုးများ ပေါများနေကြောင်းသိရသည်။
ယခုဆီဆိုင်မြို့နယ်အတွင်း တကျော့ပြန်တိုက်ပွဲကြောင့် ကျေးရွာဒေသခံအများစု စစ်ဘေးရှောင်နေရပြီး စစ်ကောင်စီမှ ကျေးရွာများကို လက်နက်ကြီးဖြင့်ပစ်ခတ်မှုကြောင့် ဒေသခံများထိခိုက်ဒဏ်ရာရှိခဲ့ကြောင်းသိရသည်။
အလုပ်သင် သတင်းထောက် နန်းလရောင် ရေးသားသည်။
Leave a Comments