သျှမ်းပြည်တောင်ပိုင်း၊ တောင်ကြီးမြို့နယ်တွင် စက်သုံးဆီမှောင်ခိုရောင်းချနေသူများကို စစ်ကောင်စီ လက်အောက်ခံ ဌာနများမှ ဖမ်းဆီးမှုပြုလုပ်နေကြောင်း စုံစမ်းသိရှိရသည်။
ယမန်နေ့ (ဩဂုတ်လ ၁၉ ရက်) တွင် တောင်ကြီးမြို့နယ်တွင် ဆီမှောင်ခိုရောင်းချနေသူများနှင့် တောင်ကြီး-ကျောင်တလုံးလမ်းဘေးတလျှောက်တွင် ခုံများချကာ ပုလင်းများဖြင့်ရောင်းချနေသူများကို စစ်ကောင်စီ လက်အောက်ခံ ဌာနများမှ ဖမ်းဆီးမှုများရှိနေကြောင်း ဒေသခံ အမျိုးသားတစ်ဦးကပြောသည်။
“မနက်ခင်းက ကံကြီးကနေ လွယ်ကောင်းရွာအထိ တောင်ကြီး-ကျောက်တလုံးလမ်းတလျှောက်က ပုလင်းတွေ၊ ဗူးတွေ၊ ပုံးတွေနဲ့ ရောင်းနေတာအကုန်လုံးကို လိုက်ဖမ်းနေတာပါ။ လူတော့မဖမ်းဘူး၊ ဆီပဲသိမ်းသွားပါတယ်။ နေ့လည်ပိုင်းကနေ အချိန်ထိ လိုင်းပေါ်ကရောင်းနေတာတွေ၊ မြို့ထဲကရောင်းနေတာတွေကို အကုန်လိုက်ဖမ်းနေပါတယ်။ ဆီကော၊ လူကောဖမ်းတာဗျ” ဟု ၎င်းကပြောသည်။
စက်သုံးဆီအား လိုသလောက်ရောင်းချနိုင်ချင်းမရှိသောကြောင့် စက်သုံးဆီပြတ်လပ်မှုဆိုးဝါးစွာ ကြုံတွေ့နေရပြီး မှောင်ခိုဈေးကွက်များလည်း ကြီးထွားလာကြောင်း ဒေသခံများထံမှသိရသည်။
အလားတူ ညောင်ရွှေမြို့နယ်တွင်လည်း ဆီဝယ်ယူရသည့် အခါအချိန်များစွာ ပေးနေရကြောင်း မြို့ခံတစ်ဦးကပြောသည်။
“မနက် ၆ နာရီလောက်တည်းကတန်းစီတာ ဆိုင်မဖွင့်ခင် မနက်ပေးမယ်ဆိုလို့ အကြာကြီးစောင့်ပြီးမှ ဆိုင်မဖွင့်လို ပြန်ကြရတယ် နေ့လည် ၂ နာရီလောက်ပြန်တန်းစီတာ ည ၇ နာရီလောက်မှ ပြီးတယ် ဒါတောင် တချို့တွေမရဘူး” ဟု သူကပြောသည်။
လက်ရှိတွင် သျှမ်းပြည်တောင်ပိုင်း တောင်ကြီးမြို့နယ်နှင့် မြို့နယ်အများအပြားတွင် စက်သုံးဆီ အကန့်အသတ်နှင့်ရောင်းချနေမှုများကြောင့် တစ်ရက်ကြိုတင်၍ ညအိပ်တန်းစီကာစောင့်ဆိုင်းဝယ်ယူနေကြပြီး အခက်အခဲမျိုးစုံကြုံတွေ့နေကြရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments