သျှမ်းပြည်နယ်မြောက်ပိုင်း၊ ကျောက်မဲနှင့် လားရှိုးတွင် အင်တာနက်နှင့် လျှပ်စစ်မီးပြန်ရမည် ဆိုသော သတင်းကြောင့် စစ်ရှောင်အများစု နေရပ်ပြန်ကြကြောင်း စုံစမ်းသိရသည်။
“၁၀၂၇ စစ်ဆင်ရေး ဒုတိယလှိုင်း” သည် ဇွန်လ ၂၅ ရက်တွင် စတင်ခဲ့ရာ တအာင်းအမျိုးသားလွတ်မြောက်ရေး တပ်မတော် (TNLA) နှင့် ညီနောင်မဟာမိတ် ကိုးကန့်တပ်မတော် (MNDAA) တို့က လားရှိုး၊ကျောက်မဲ၊ နောင်ချို နှင့် မိုးကုတ် တို့ကိုသိမ်းယူခဲ့သည်။
ထိုစစ်ဆင်ရေးအတွင်း စစ်ကောင်စီဘက်မှ လေကြောင်းဖြင့် ဗုံးကြဲတိုက်ခိုက်ခြင်းကြောင့် နေအိမ် အဆောက်အဦး အများအပြားပျက်စီးကာ ဒေသခံ အများစု သေကြေပြီး သျှမ်းပြည်တောင်ပိုင်းသို့ ထွက်ပြေးတိမ်းရှောင်ခဲ့ရသည်။
တော်လှန်ရေး အင်အားစုဘက်မှ လားရှိုးမြို့နှင့် ကျောက်မဲမြို့ ကို သိမ်းပိုက်နိုင်ခဲ့ပြီးနောက် တိုက်ပွဲများလည်း ရပ်တန့်ကာ စစ်ရှောင်အများစုသည် ဖုန်းလိုင်းနှင့် လျှပ်စစ်မီးပြန်ရမည်ဆိုသည့်သတင်းကြောင့် စစ်ရှောင်များနေရပ်သို့ပြန်နေကြကြောင်း ကျောက်မဲမြို့ ဒေသခံအမျိုးသမီးတစ်ဦးက သျှမ်းသံတော်ဆင့်ကိုပြောသည်။
“ ဒီလကုန်ကျရင် (TNLA)က ဖုန်းလိုင်းတွေ၊ လျှပ်စစ်မီးတွေ ပြန်ရမယ်လို့ ကြားတယ်။ ဒါနဲ့ စစ်ရှောင်တွေ ရရာကားကြုံနဲ့လိုက်ပြန်ကြတာ။ ကျမတို့လည်း ဒီလကုန်ပြန်တော့မှာ။ ကားခမရှိသေးတာရယ် စိတ်ချရတဲ့ကားမရှိသေးတာရယ်ကြောင့် မပြန်သေးတာ”ဟု ကျောက်မဲဒေသခံအမျိုးသမီးက သျှမ်းသံတော်ဆင့်ကို ပြောသည်။
မန္တလေးမြို့မှ တဆင့် သျှမ်းမြောက် ကျောက်မဲမြို့သို့ ပြန်မည့် စစ်ဘေးရှောင်များသည် ပြင်ဦးလွင် အဝင်၌ စစ်ကောင်စီမှ
၁၃မျဉ်းစောင်းများကို အဝင်မခံတာကြောင့် ကားသမားများမှာလည်း တောင်ကြီးမြို့ ဘက်မှ တစ်ဆင့် ဖြတ်သန်းနေရကြောင်းသိရသည်။
“ ခုက ဆီဈေးတွေလည်းတက်နေတယ်။ ဆီကလည်း တန်းစီရတာနဲ့ အချိန်ကလည်း ကုန်သေးတယ်။ ပြင်ဦးလွင်လမ်းကို ဖြတ်လို့မရတော့ စစ်ရှောင်တွေကို မန္တလေးကနေ တောင်ကြီးကနေ တစ်ဆင့် သွားရတော့ ခရီးကြာတာပေါ့။ ကားခလဲ ပိုယူရတာပေါ့လေ။ တစ်ချို့စစ်ရှောင်တွေဆို ကားခ မတတ်နိုင်ရင်တော့ နည်းနည်းတော့ လျော့ပေးတာပေါ့လေ။”ဟု ကျောက်မဲ -မန္တလေး ပြေးဆွဲနေ့သည့် ကားသမားတစ်ဦးကပြောသည်။
တောင်ကြီးမှ ကျောက်မဲသို့ သွားမည်ဆိုလျှင် တစ်ဦးကို ကျပ်ငွေ ၁သိန်းခွဲပေးရပြီး မန္တလေးမှ ကျောက်မဲဆိုလျှင် ကျပ်ငွေ ၂သိန်းပေးစီးရကြောင်း အဆိုပါ ကားသမားကပြောသည်။
“၁၀၂၇ စစ်ဆင်ရေး” ပထမလှိုင်းသည် ၂၀၂၃ ခုနှစ် အောက်တိုဘာ၂၇ တွင် စတင်ခဲ့ပြီး ညီနောင်မဟာမိတ်တပ်ဖွဲ့ဖြစ်သည့် တအာင်းအမျိုးသားလွတ်မြောက်ရေးတပ်မတော် ( TNLA)၊ မြန်မာအမျိုးသားဒီမိုကရက်တစ်တပ်တော် (MNDAA) နှင့် အရက္ခတပ်တော် (AA) တို့ဦးဆောင်တိုက်ခိုက်ခဲ့ပြီး စစ်ကောင်စီတပ်စခန်းနှင့် မြို့၊ကျေးရွာတွေကို တိုက်ခိုက်သိမ်းပိုက်နိုင်ခဲ့သည်။
အလုပ်သင် သတင်းထောက် နန်းလရောင် ရေးသားသည်။
Leave a Comments