သျှမ်းပြည် တောင်ပိုင်း အောင်ပန်းမြို့သို့ ကုန်စိမ်းသွားရောင်းသူများထံ တီကျစ်မြို့ နဂါးဘိလပ်မြေ စက်ရုံရှေ့ဂိတ်ရှိ စစ်သားများ ငွေအဆမတန်တောင်းယူနေကြောင်းစုံစမ်းသိရသည်။
အောင်ပန်းမြို့သို့ ကုန်စိမ်းသွားရောင်းသူများသည် ပင်လောင်း၊ နောင်တရား တောင်သူများဖြစ်ကြသည်။
ထိုတောင်သူများသည် ကျေးရွာထဲရောင်းလျှင် ကြားခံပွဲစားများ စျေနိမ်မှုကို ကြုံနေရသဖြင့် အောင်ပန်းအထိ ကိုယ်တိုင်သွားရောင်းရကြောင်း၊ သွားရောင်းစဥ်တွင်လညး တီကျစ်ဂိတ်ရှိ စစ်ကောင်စီနှင့် ပအိုဝ်း PNO များက ငွေပဏာများစွာ တောင်းယူနေသဖြင့် တောင်သူများ အခက်ခဲကြုံတွေ့လျက်ရှိသည်။
“အဲဒီတီကျစ်ဂိတ်က ဒီနောက်ပိုင်းအရမ်းဆိုးတယ်။ပိုက်ဆံမပေးရင် ပါလာတဲ့ကုန်ပစ္စည်းတွေကိုသိမ်းသွားတယ်။တောင်တဲ့ပိုက်ဆံကလည်းအရမ်းများတယ် အာလူးတစ်အိတ်ကို ၅၀၀တောင်းတာလေ။ ကားတစ်စီးလုံးဆို သူတို့ကို၅သောင်းလောက်ပေးရတယ်။အာလူးအိတ်များရင်များသလိုတောင်းတယ်။အရမ်းစိတ်ပျက်ဖို့ကောင်းတယ်”ဟု ကုန်စိမ်းသည်တစ်ဦးက သျှမ်းသံတော်ဆင့်ကိုပြောသည်။
တီကျစ်ဂိတ်ရှိစစ်သားများသည် ကုန်စိမ်းကားများကို ငွေညစ်သည့်အပြင်ခရီးသွားလာသူများကိုလည်း မှတ်ပုံတင်စစ်ဆေးခြင်း၊ကြမ်းကြမ်းတမ်းတမ်းစစ်ဆေးခြင်း၊လိုအပ်သည်ထက်ပိုစစ်ဆေးခြင်း၊သံသယရှိသူများကိုအကြောင်းမဲ့ ဖမ်းဆီးပြီး ငွေဖြင့် ပြန်ရွေးခိုင်းခြင်းတို့လည်း ပြုလုပ်နေကြောင်းသိရသည်။
“မိန်းကလေးဆိုရင်သူတို့က လိုအပ်တာထက် စစ်ဆေးတယ်။ ဟိုနှိုက် ဒီနှိုက်နဲ့ ရဲမေစစ်မေနဲ့လည်း မစစ်ဘူး။ နောက်ပြီး သူတို့ မသင်္ကာတဲ့သူဆိုရင် ရစ်တယ်။ တချို့က ဖမ်းပြီး မိသားစုက ငွေနဲ့ပြန်လာရွေးရတယ်”ဟု ပင်လောင်း ဒေသခံ တစ်ဦးက ထပ်လောင်းပြောသည်။
ထို့အပြင် ပင်လောင်းမြို့အဝင်ဂိတ်များသည် ဆန်၊ဆီ၊အဝတ်အထည် နှင့် ဆေးဝါးများကို အကန့်အသတ်ဖြင့်သာ သယ်ယူခွင့်ရှိကြောင်း သိရသည်။
