သျှမ်းပြည် တောင်ပိုင်း ၊ဆီဆိုင်မြို့နယ်၊ ယခုသြဂုတ်လအတွင်း စစ်ရှောင် ခုနစ်ထောင်ကျော်အတွက် စားနပ်ရိက္ခာများ ၊မိုးကာများ၊အခင်းများ အရေးပေါ်လိုအက်လျက်ရှိကြောင်း သိရသည်။
သြဂုတ်လ ၃ရက်မှစပြီး တိုက်ပွဲကြောင့် ဆီဆိုင်မြို့အရှေ့ဘက်ကျေးရွာ (၁၁)ရွာ မှ ဒေသခံ ခုနစ်ထောင်ကျော် ထွက်ပြေးတိမ်းရှောင်ရပြီး ဒေသခံအများစုသည် တောင်ယာခြံရှိသော တောတောင်ဘက်သို့ ထွက်ပြေးတိမ်းရှောင်နေကြရသည်။
“ဒီတကျော့ပြန် တိမ်းရှောင်ကြရတဲ့ ဒေသခံပြည်သူတွေက အရင်တကျော့ထက် ပိုခက်ခဲကြတယ်။စိုက်ပျိုးရာသီလည်း ဖြစ်၊ မိုးရာသီလည်း ဖြစ်တဲ့အတွက်ကြောင့် စားဝတ်နေရေးအတွက် အရင်းအနှီးက စိုက်ပျိုးရေး အကုန်ရင်းနှီးကြတဲ့အချက်ကို တွေ့ရတယ်။ အဲ့ကြောင့် စားနပ်ရိက္ခာလိုအပ်မှု၊ အမိုးအကာ၊ အခင်းဆိုင်ရာ လိုအပ်မှုက အရင်ကာလထက် ပိုလိုအပ်တယ်၊ ဒါပေမယ့် တိမ်းရှောင်ကြရတဲ့ အနေအထားက တောင်ယာခြံဘက်ဖြစ်တဲ့အတွက်ကြောင့် အကူအညီမရောက်ကြတာကို တွေ့ရတယ် “ဟု ပအိုဝ်းလူငယ်အစည်းအရုံးမှ တာဝန်ရှိသူ မနန်းက သျှမ်းသံတော်ဆင့်ကိုပြောသည်။
ဒေသခံများ ရှောင်သွားသော တောဘက်သည် စစ်ကောင်စီ နှင့် ပအိုဝ်း ပြည်သူ့စစ် PNO က လက်နက်ကြီးပစ်ခတ်မှု မကြာခဏရှိနေသောကြောင့် စစ်ရှောင်များလုံခြုံရေးကို စိုးရိမ်ကြောက်လန့်နေရကြောင်း ၎င်းက ပြောသည်။
စစ်ရှောင်အမျိုးသမီးတစ်ဦးက “လက်နက်ကြီးသံကြားပြီဆို ဘယ်နားကျမလဲ ကိုယ့်နေတဲ့တဲပေါ် ကျမလား စသဖြင့် အတွေးဝင်တယ် ကြောက်တယ်။စိုးရိမ်တယ်။လက်နက်ကြီးအသံကြားပြီဆိုထွက်ပြေး ပုန်းရမယ့်နေရာရှာရတယ်။ ဘယ်တော့မငြိမ်းချမ်းမလဲ ခုတစ်ခေါက်နဲ့ဆို စစ်ရှောင်ရတာ နှစ်ခေါက်ရှိပြီ။”ဟု ပြောသည်။
ပြီးခဲ့သည့် သြဂုတ်လ ၇ရက်တွင်လည်းဆီဆိုင်မြို့ အရှေ့ဘက် တွင် စစ်ကောင်စီ လက်နက်ကြီးဖြင့် ပစ်ခတ်လာခြင်းကြောင်း ဆယ်ကျော်သက်စစ်ရှောင် အမျိုးသမီးနှစ်ဦးကို ထိမှတ်ပြီး သေဆုံး ခဲ့သေးကြောင်း ပအိုဝ်းအမျိုးသားလွှတ်မြှောက်ရေးတပ်မတော် PNLA ထုတ်ပြန်ချက်အရသိရသည်။
Leave a Comments