ပြင်ဦးလွင်မြို့ပေါ်ရပ်ကွက်များတွင် စစ်ကောင်စီမှ စစ်မှုထမ်းရန်အတွက် ခေါ်ယူနေပြီး လာရောက်ခြင်းမရှိဘဲ ထွက်ပြေးပါက ကျန်ရှိသောမိသားစုဝင်များကို ဖမ်းဆီးကာ နေအိမ်ချိတ်ပိတ်မည်ဟု ခြိမ်းခြောက်ထားကြောင်း စုံစမ်းသိရှိရသည်။

လက်ရှိမှာ စစ်မှုထမ်းရန်အတွက် စစ်ကောင်စီမှ လူငယ်များစာရင်းပြုစုထားကာ တစ်လလျှင် နှစ်ဦးနှုန်းဖြင့် ၇ဦးခန့် ကြိုတင် ရွေးချယ်ထားပြီးဖြစ်ကြောင်း၊ ပြင်လွင်ဦး ရွှေသင်းရွာအနီးရှိ သဇင် FM အသံလွှင့်တပ်တွင် ၁၅ရက်ခန့် စစ်သင်တန်း တက်နေရကြောင်း ပြင်ဦးလွင်မြို့တွင်နေထိုင်သည့် အမျိုးသမီး တစ်ဦးက သျှမ်းသံတော်ဆင့်ကို ပြောသည်။

“ကျမတို့ ရပ်ကွက်က တစ်လကို ၂ ယောက်ခေါ်တယ်။ ရပ်ကွက်ထဲမှာ ပြည်သူ့စစ် ၁၀ ယောက်ခန့်ထားပါတယ်။ သွားရတဲ့ သူတွေကို တစ်အိမ် တစ်သောင်းနှုန်းနဲ့ ထောက်ပံ့ရမယ် လို့ပြောထားပါတယ်၊ စစ်မှုမထမ်းပဲ ထွက်ပြေးရင် ကျန်ခဲ့တဲ့မိသားစုကိုဖမ်းပြီး အိမ်နဲ့ခြံကို သိမ်းမယ်လို့ပြောထားတယ်” ဟု ၎င်းကပြောသည်။

လက်ရှိအချိန်တွင် ၎င်းရပ်ကွက်မှ စစ်မှုထမ်းရန် လူငယ် ၇ ဦးခန့်ပို့ပေးထားပြီးဖြစ်ကာ ရှေ့တန်းသို့ဆက်ပို့ခံရကြောင်း သိရသည်။

“လက်ရှိ ၇ ယောက်ထည့်ပေးလိုက်ရပါပြီ၊ သေနတ်မှန်သူကလည်းမှန်၊ စစ်ဆေးရုံမှာတင်ထားရပါတယ်၊ မိဘတွေတော့ သွားတွေ့လို့ရပါတယ်။ လက်ရှိလည်း ကျမတို့ရပ်ကွက် က ၇ ယောက်ရွေးပေးထားရပါတယ်၊ အခြေအနေဆိုးရင်လည်း ဒီထက်မက ထပ်ကောက်မယ်လို့ လို့ပြောထားတယ်” ဟု အထက်ပါ အမျိုးသမီးက ဆိုသည်။

တော်လှန်ရေးတပ်များ သိမ်းပိုက်ထားသည့် နောင်ချိုမြို့နယ်နှင့် ဆက်စပ်နေသည့် ပြင်ဦးလွင်မြို့ကို တိုက်ခိုက်မည် ဆိုသော သတင်းများ ထွက်ပေါ်ပြီးနောက် ဩဂုတ်လ ၈ ရက်တွင် စစ်တပ်နှင့် ဝန်ထမ်း အရာရှိ မိသားစုများ မန္တလေး၊ နေပြည်တော်၊ ရန်ကုန်နှင့် အခြားမြို့များသို့ ပြောင်းရွှေ့သွားခဲ့ပြီးဖြစ်သည်။

မြန်မာ့ရေးရာနှင့် ပဋိပက္ခ လေ့လာစောင့်ကြည့်ရေးအဖွဲ့ (BACS) ၏ ထုတ်ပြန်ထားသော အစီရင်ခံစာများအရ အမှတ်စဉ် (၁) နှင့် (၂) စစ်မှုထမ်းသင်တန်းများတွင် နိုင်ငံတစ်ဝန်းမှ လူငယ် ကိုးထောင်နီးပါး စုဆောင်းခံခဲ့ရကြောင်း သိရသည်။