သျှမ်းပြည် ကျောက်မဲမြို့မှာ ကိုးကန့်တပ်ဖွဲ့ MNDAA ရဲ့ ခေါင်းဆောင်၊ တအာင်းတပ်ဖွဲ့ TNLAA ရဲ့ စစ်ဦးစီးချုပ်နဲ့ NUG ကိုယ်စားလှယ်တို့ အထူးအစည်းအဝေးပြုလုပ်နေချိန် စစ်ကောင်စီတပ်က ပေါင် (၁၀၀၀) ဗုံးနဲ့ တည့်တည့်ကြဲချလိုက်တာကြောင့် ထိခိုက်သေဆုံးမှုများတယ်ဆိုပြီး သတင်းတစ်ပုဒ်ဖြန့်ချိနေပါတယ်။

စစ်ကောင်စီတပ်ရဲ့ ဝါဒဖြန့်တယ်လီဂရမ်ချယ်နယ် Kyaw Swar ချယ်နယ်ကနေ ဖြန့်ချိခဲ့ပြီး “ MNDAA ကိုးကန့်ခေါင်းဆောင်၊ TNLA ပလောင် စစ်ဦးစီးချုပ်နှင့် NUG ကိုယ်စားလှယ်တို့ ဧည့်ခန်းမဆောင်တွင် ကြိုဆိုရေးအခမ်းအနားစစ်ဆင်ရေး ညှိနှိုင်းကွယ်ကဲမှုအထူးအစည်းအဝေး ပြုလုပ်နေချိန် ည ၉ နာရီတိတိ (၁၀၀၀) ဗုံးကအခမ်းအနား နေရာအလယ်ဗဟိုတည့်တည့်ကျရောက်ပေါက်ကွဲခဲ့” လို့ (မူရင်းအတိုင်း) ရေးသားဖော်ပြထားပါတယ်။

အဆိုပါ သတင်းအတုကို ကြည့်ရှု့သူပေါင်း ၆၉,၀၀၀ ကျော်ရှိပြီး Kyaw Swar ချယ်နယ်အပြင် အခြားဝါဒဖြန့် တယ်လီဂရမ်ချယ်နယ်မှာလည်း ဖြန့်ဝေထားကြပါတယ်။

မူရင်းလင့်ခ် – https://archive.ph/tjXUk

သတင်း စစ်ဆေးခြင်း

သျှမ်းသံတော်ဆင့် အချက်အလက်စစ်ဆေးသူများအနေနဲ့ အဆိုပါ အကြောင်းအရာကို စစ်ဆေးကြည့်တဲ့အခါမှာ လုပ်ကြံရေးသားထားတဲ့ ဝါဒဖြန့်သတင်းအတုဖြစ်တာကို တွေ့ရပါတယ်။

သျှမ်းမြောက်ဒေသတွင်း သတင်းဌာနများနဲ့ လွတ်လပ်တဲ့ သတင်းဌာနများရဲ့ ဖော်ပြချက်အရ ကျောက်မဲမြို့ကို TNLAနဲ့ ပူးပေါင်းတပ်ဖွဲ့တွေက သိမ်းပိုက်ထားတဲ့ဖြစ်စဉ်မှာ မှန်ကန်ပါတယ်။

သြဂုတ် ၆ ရက်နေ့ ဒေသအတွင်း သတင်းဌာနတစ်ခုဖြစ်တဲ့ ရွှေဖီမြေသတင်းတစ်ပုဒ်မှာ “ကျောက်မဲမြို့ သိမ်းပိုက်နိုင်ခဲ့တဲ့ TNLA နဲ့ ပူးပေါင်းတပ်ကို လူထုတွေ ကြိုဆို” ဆိုတဲ့ သတင်းတစ်ပုဒ်ကိုဖော်ပြထားပါတယ်။

ဆက်စပ်ဖတ်ရှု့ရန် – https://shorturl.at/xiGul

ဒါပေမဲ့ ကျောက်မဲမြို့မှာ တော်လှန်းရေးတပ်ပေါင်းစုတွေ အထူးအစည်းအဝေးပြုလုပ်ချိန် ဗုံးကြဲခံရပြီး သေဆုံးတဲ့ ဖြစ်စဉ်ကိုတော့ ယခုချိန်ထိမတွေ့ရှိရသေးပေ။

ကျောက်မဲမြို့ကို TNLA ထိန်းချုပ်နိုင်ပြီလို့သတင်းထွက်ပေါ်လာတဲ့ တစ်ရက်တည်းမှာဘဲ မြို့တော်မခန်းမကို စစ်ကောင်စီတပ်က ပေါင် ၅၀၀ ဗုံးတစ်လုံး ညတွင်းချင်းလာရောက် ကြဲသွားတယ်ဆိုပြီး သြဂုတ် ၆ ရက်နေ့က လူမှုကွန်ရက်စာမျက်နှာပေါ် သတင်းတစ်ခုပျံ့နှံ့ခဲ့ပါသေးတယ်။

ဒါပေမဲ့ အဲ့ဒီသတင်းဟာ မမှန်ကန်ကြောင်း၊ သတင်းအမှားဖြစ်ကြောင်း Visit Kyaukme page တစ်ခုကနေ ဖော်ပြထားသလို လားရှိုးမြို့သတင်းစုံ ဂရုထဲမှာလည်း ဖော်ပြထားပါတယ်။ အောက်ကလင့်ခ့် နှစ်ခုမှာ ဝင်ကြည့်လိုရပါတယ်။

လင့်ခ် (၁) – https://shorturl.at/Uw404
လင့်ခ် (၂) – https://shorturl.at/oop1s

ကျောက်မဲမြို့ဒေသခံ အမျိုးသားတစ်ဦးကလည်း “ ကျောက်မဲမြို့မှာပေါင် ၅၀၀ ဗုံးကျတယ်ဆိုပြီးသတင်းအမှားတွေတင်တာတွေ့ပါတယ်။ ဒါကိုလည်း ပြည်သူတွေ စိုးရိမ်စေခဲ့တယ်ပေါ့။ အဲ့ဒါသတင်းအမှားပါ။ ဒါပေမဲ့ စစ်ကောင်စီက လေယာဉ်နဲ့ ဗုံးတကယ်လာကြဲမှာကိုတော့ စိုးရိမ်တာပေါ့။ ဥပမာ- သိန္နီမြို့ ၊ ကွတ်ခိုင်မြို့တွေမှာ ဗုံးလာကြဲသွားတာပဲလေ။ ကျနော်တို့ပြည်သူတွေတော့ သတိနဲ့နေနေရတာပေါ့” လို့ သျှမ်းသံတော်ဆင့်ကို ပြောပါတယ်။

သြဂုတ် ၅ ရက်၊ ၆ ရက်နဲ့ ၇ ရက်နေ့မှာ ကွတ်ခိုင်နဲ့ သီပေါမြို့ကို စစ်ကောင်စီတပ်က လေကြောင်းတိုက်ခိုက် ဖြစ်စဉ်သာ ဖြစ်ပွားခဲ့ပါတယ်။

ဆက်စပ်ဖတ်ရှု့ရန် – https://shorturl.at/ufXVM

သုံးသပ်ချက်

ဒါကြောင့် ကျောက်မဲမှာ MNDAA၊ TNLA နဲ့ NUG တို့အစည်းအဝေးလုပ်နေချိန် ပေါင် (၁၀၀၀) ဗုံးကြဲချသဖြင့် ထိခိုက်သေဆုံးမှုများတယ်ဆိုတဲ့ စစ်ကောင်စီဝါဒဖြန့်တွေရဲ့ ဖြန့်ချိမှုမှာ မှားယွင်းနေပါတယ်။

သျှမ်းသံတော်ဆင့် စာဖတ်ပရိတ်သတ်တွေအနေနဲ့ လူမှုကွန်ရက် စာမျက်နှာတွေမှာ ဖော်ပြနေတဲ့ သတင်းတွေကို ချက်ချင်းမယုံကြည်ဘဲ စိတ်ချရသော သတင်းမီဒီတွေမှာ သွားရောက်ဖတ်ရှု့ကြဖို့ တိုက်တွန်းပါတယ်။

သတင်းတုသတင်းအမှားများနှင့် ပတ်သက်ပြီး အချက်အလက်စစ်ဆေး မေးမြန်းလိုလျှင် Myanmar Fact-Checking Network အဖွဲ့ဝင်ဖြစ်သော သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook Chat Box ကနေဆစ်ဆင့်သတင်းရဲ့ လင့်ခ် (သို့မဟုတ်) Screen Short ပုံပေးပို့ခြင်းဖြင့် စစ်ဆေးနိုင်ပါတယ်။