ပြင်ဦးလွင် အနီး ဝက်ဝံနှင့် အင်ဝိုင်းကြား ယနေ့ (ဩဂုတ်လ ၈ ရက်) မနက်ပိုင်းမှ စတင်ကာ တိုက်ပွဲ ပြင်းထန်နေပြီး စစ်ဘက်နှင့် အရပ်ဘက် အရာရှိ မိသားစုများ အလုံးအရင်း မြို့ကို စွန့်ခွာ ထွက်ပြေးနေပြီ ဖြစ်ကြောင်း စုံစမ်းသိရသည်။
တော်လှန်ရေးတပ်များ သိမ်းပိုက်ထားသည့် နောင်ချိုမြို့နယ်နှင့် ဆက်စပ်နေသည့် ပြင်ဦးလွင်မြို့ကို တိုက်ခိုက်မည် ဆိုသော သတင်းများ ထွက်ပေါ်ပြီးနောက် ယမန်နေ့နှင့် ယနေ့တွင် စစ်တပ်နှင့် ဝန်ထမ်း အရာရှိ မိသားစုများ မန္တလေး၊ နေပြည်တော်၊ ရန်ကုန်နှင့် အခြားမြို့များသို့ ပြောင်းရွှေ့နေကြောင်း ဝန်ထမ်းမိသားစုများနှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
“တပ်မိသားစုတွေ ရှောင်နေတာကတော့ ခုမှ မဟုတ်ပါဘူး၊ နောင်ချိုဘက် တိုက်ပွဲတွေ ဖြစ်ကတည်းက ရှောင်နေကြတာ။ ခုကတော့ ရှောင်တာ ပိုများလာတာပေ့ါလေ၊ အရာရှိပိုင်းတွေပေ့ါ၊ နောင်ချို ဘက်က တိုက်ပွဲတွေကြောင့် တပ်အင်အားတွေ ထပ်ပြီး လာချ ထားတာတွေရှိတယ်။ အောက်ခြေ စစ်သည် မိသားစုတွေ ကတော့ မပြောင်းနိုင်ကြဘူးပေါ့” ဟု စစ်တပ်တပ်နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
နာမည်ကျော် ပြင်ဦးလွင်မြို့ အခြေစိုက် စစ်တက္ကသိုလ် (DSA) နှင့် စစ်ဘက်ဆိုင်ရာ သင်တန်းကျောင်းများ၊ စစ်အင်ဂျင်နီယာကျောင်းများ၊ စစ်ဆေးရုံများ၊ အရေးကြီးစစ်စခန်းများကိုလည်း ပြောင်းရွှေ့ထားကြောင်း နီးစပ်သူ တစ်ဦးကပြောသည်။
“ပြင်ဦးလွင်က စစ်သင်တန်းကျောင်းတွေကို လွန်ခဲ့တဲ့ တစ်လလောက်တည်းက တခြားနေရာ ရွှေ့သွားပြီလို့တော့ ကြားတယ်၊ ဘယ်ကို ရွှေ့သွားတာလဲတော့ မသိဘူး” ဟု ၎င်းကပြောသည်။
ယင်းသို့ ပြောင်းရွှေ့မှုနှင့် ပတ်သက်၍ သျှမ်းသံတော်ဆင့် အနေဖြင့် သီးခြား အတည်ပြုနိုင်ခြင်း မရှိသေးပေ။
ယနေ့ နံနက်ပိုင်း လူမှုကွန်ရက်တွင် ပြန့်နှံ့နေသည့် ရုပ်သံ တစ်ခုတွင် ရာနှင့်ချီသည့် အိမ်စီးကားများ ပြင်ဦးလွင်မှ မန္တလေးဘက် ဦးတည်သွားနေသည်ကို တွေ့ရသည်။
လက်ရှိ ပြင်ဦးလွင်မြို့ရှိ အရာရှိ မိသားစုများ ပြောင်းရွှေ့နေသော်လည်း မြို့ခံ ပြည်သူများ အနေဖြင့် စက်သုံးဆီ ဝယ်ယူနိုင်ရေး အာရုံစိုက်နေရကြောင်း မြို့ခံ အမျိုးသမီး တစ်ဦးက ပြောသည်။
“ဝန်ထမ်းတွေ နေတဲ့ဘက်ကတော့ ပြောင်းတာရွှေ့တာ ကြားတယ်။ ကျွန်မတို့ ဘက်ကတော့ ဆီရဖို့ပဲ တန်းသွားစီ နေရတယ်၊ ဒီနေ့ပိုဆိုးတယ် ဆီရှာရတာက အရမ်းခက် သွားတယ်၊ မရဘူး၊ ရတဲ့နေရာကျတော့လည်း တန်းစီနေတာ အရမ်းများတော့ ပြန်လှည့်လာရတယ်” ဟု ၎င်းကပြောသည်။
ယနေ့ ပြင်ဦးလွင်မြို့ပေါ် စစ်ဆေးမှုများ ရှိနေပြီး နောင်ချို-ပြင်ဦးလွင် အဝင်တွင် စစ်တပ် ကင်းစခန်းများ အထိုင်ချထားကာ မန္တလေး-ပြင်ဦးလွင်ကြားရှိ ရတနာပုံဆိုက်ဘာ စီးတီးတွင်လည်း စခန်းချထားကြောင်း၊ ဇီးပင်ကြီး သင်တန်းကျောင်းဘက်တွင်လည်း စစ်အင်အား ဖြည့်တင်းထားကြောင်းသိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments