သျှမ်းပြည်မြောက်ပိုင်း၊ လားရှိုးမြို့နယ် အမှတ် ၉ တပ်မတော်ဆေးရုံ ကုတင် (၁၀၀) စစ်ဆေးရုံအား စစ်ကောင်စီမှ လေကြောင်းဖြင့်တိုက်ခိုက်ခဲ့ပြီး မဟာမိတ်တပ်များကို စွတ်စွဲခဲ့ကြောင်းညီနောင်သုံးဖွဲ့၏ တယ်လီဂရမ် ချန်နယ် တွင်‌ဖော်ပြထားသည်။

ယနေ့ ဩဂုတ်လ ၆ ရက်တွင် ညီနောင် ၃ ဖွဲ့၏ တယ်လီဂရမ်ချန်နယ် (3 Brotherhood Alliance (AA+MNDAA+TNLA) တွင် အရှေ့မြောက်ပိုင်းစစ်ဌာနချုပ် (ရမခ) စစ်ဆေးရုံမှ အရိုးအထူးကု ပါရဂူဆရာဝန်တစ်ယောက်၏ စစ်ဆေးရုံအတွင်းဖြစ်ပျက်ခဲ့သော အကြောင်းအရာများကို ပြောကြားနေသည့် ဗီဒီယိုရုပ်သံတစ်ခုကို ဖော်ပြလာခဲ့သည်။

ထို ဗီဒီယိုရုပ်သံ အတွင်း ၎င်းဆရာဝန်မှ ဩဂုတ်လ ၃ ရက်နေ့တွင် ခွဲစိတ်ဆောင် အနီး ဗုံးတစ်လုံးကျရောက်ခဲ့ကြောင်း၊ ထိုသို့ကျရောက်ခဲ့ခြင်းကြောင့် အခြေအနေများရုတ်ရုတ်သဲသဲဖြစ်ခဲ့ပြီး ထိခိုက်မှုများဖြစ်ပွားခဲ့ပြီး ညနေ ၅ နာရီ ခန့်တွင် MNDAA တပ်ဖွဲ့ဝင်များနှင့်တွေ့ရှိခဲ့ကာ MNDAA တပ်ဖွဲ့ဝင်များနှင့်အတူ လူနာများကို သယ်ထုတ်ခဲ့ခြင်းဖြစ်ကြောင်းပြောကြားထားသည်။

ထိုအပြင် ဆရာဝန်များနှင့် လူနာများကိုလည်း MNDAA မှ ဆေးဝါးများထောက်ပံ့ပေးခဲ့ကြောင်းကိုလည်း ၎င်းဆရာဝန်က ပြောကြားထားသည်။

“ကျနော်ဆရာဝန်တစ်ယောက်ပါ ကျနော်တာဝန်ကတော့ ဘယ်နေရာရောက်ရောက်လူနာတွေရဲ့ အသက်ရှင်ကျန်းမာရေးကတော့ အရေးကြီးဆုံးပါပဲ၊ ဒီလိုကာလအတွင်းမှာ ကျနော်တို့ရဲ့ မိသားစုဝင်တွေ စစ်သားတွေ ဒဏ်ရာရနေသူတွေကို သနားညာတာပြီးတော့ ထောက်ထားပေးခဲ့တာဟာ မမျှော်လင့်ခဲ့တဲ့ အကြောင်းအရာဖြစ်ပြီး MNDAA တပ်မတော်ကို ကျေးဇူးတင်ပါတယ်” ဟု ၎င်းမှ ပြောကြာသွားခဲ့သည်။

ယနေ့ (ဩဂုတ်လ ၆) ရက်နေ့ နံနက်ပိုင်းကလည်း စစ်ကောင်စီမှ ရန်ကုန်မြို့၊ မြို့တော်ခန်းမ ရှေ့တွင် ကိုးကန့်တပ်ဖွဲ့MNDAA နှင့် ပူးပေါင်းအဖွဲ့များကို ကန့်ကွက်ရှုတ်ချအခမ်းအနား ကျင်းပခဲ့ကြောင်းသိရသည်။

အပြစ်မဲ့အရပ်သားပြည်သူ ၁၀၀ ကျော်ကို ကိုးကန့်တပ်ဖွဲ့ MNDAA နှင့် ပူးပေါင်းအဖွဲ့များက ရက်စက်စွာသတ်ဖြတ်ခဲ့သည်ဟု စစ်ကောင်စီဘက်က စွတ်စွဲပြီး လိုင်းကား ၉၁ စီးကို စစ်ကောင်စီ ချောဆွဲခဲ့ပြီး ဆန္ဒပြခိုင်းခဲ့ကြောင်း သိရသည်။

အလုပ်သင် သတင်းထောက် ယူဂျင်း ရေးသားသည်။