သျှမ်းပြည် သီ‌ပေါမြို့နယ်တွင် တိုက်ပွဲများဖြစ်ပွားနေပြီး နမ့်လန်မြို့ဘက်သို့ စစ်မီးကူးလာမည်ကို ဒေသခံများ စိုးရိမ်သဖြင့် ကြိုတင် တိမ်းရှောင်နေကြကြောင်း သတင်းရရှိသည်။

ဇူလိုင်လ ၂၈ ရက် မှစတင်ပြီး နမ့်လန်မြို့ နှင့် သီပေါမြို့ကြား နောင်ကော်ကျေးရွာတွင် အခြေစိုက်ထားသည့် စစ်ကောင်စီ ခြေမြန်တပ်ရင်း ခမရ-(၁၄၇) နှင့် ကိုးကန့်တပ်ဖွဲ့ MNDAA တို့ တိုက်ပွဲစတင်ဖြစ်ပွားခဲ့သည်။

နမ့်လန်မြို့ရှိ စစ်ကောင်စီ တပ်များသည် နေ့စဉ်နီးပါး လက်နက်ကြီးများဖြင့် နောင်ကော်ကျေးရွာဘက်သို့ ပစ်ခတ် နေပြီး၊ မြို့အနီးတွင်လည်း ကိုးကန့်ထပ်ဖွဲ့ MNDAA တို့က နေရာယူထားသည့်အတွက် ဒေသခံများက စစ်မီးကူးလာမည်ကို စိုးရိမ်ကာ နီးစပ်ရာ မြို့ နှင့် ဆွေမျိုးများဆီသို့တွင် ထွက်ပြေး တိမ်းရှောင်နေကြကြောင်း နမ့်လန်မြို့ ဒေသခံအမျိုးသား တစ်ဦးက သျှမ်းသံ‌တော်ဆင့်ကို ပြောသည်။ တ

“မြို့ထဲက သက်ကြီးရွယ်အို နဲ့ ကလေးရှိတဲ့ အိမ်တော်တော်များများတော့ ပြေးနေကြပါပြီ။ကျနော်တို့လည်း ပြေးနေတာ ကလေးကော လူကြီးကောရှိနေတော့ တိုက်ပွဲမဖြစ်တဲ့ တောင်ပိုင်းက မြို့တွေနဲ့ အမျိုးတွေရှိတဲ့ဘက် ကို ပြေးကြတာပေါ့။အဓိကတော့ ကိုးကန့်တပ်တွေဝင် လာမှာကိုကြောက်ရတာပေါ့။”ဟု နမ့်လန်မြို့ ဒေသခံအမျိုးသား တစ်ဦးက သျှမ်းသံ‌တော်ဆင့်ကို ပြောသည်။

ထိုပြင် ကိုးကန့်တပ်ဖွဲ့ MNDAA သည် နမ့်လန်မြို့ အနီးတွင်တဝိုက်ကို ပြီးခဲ့သည့် ဇူလိုင်လ တတိယပတ်မှစ၍ နေရာယူထားပြီး သီပေါမြို့နယ် နားမခေါ်‌ကျေးရွာ၊ ကောင်းမူကျေးရွာ၊ ဟိုနားကျေးရွာတို့တွင် နေရာယူထားကြောင်း ဒေသခံများက ပြောသည်။

“သူတို့ကလည်း နော်‌ကော်ကြီးဖက်မှာပဲတိုက်နေတာဒီမြို့အနီးတစ်ဝိုက်ကိုလည်း ကိုးကန့်တပ်တွေက နေရာယူထားတယ်။ သူတို့တိုက်ပွဲဖြစ်နေတဲ့ နေရာနဲ့လည်း သိပ်မဝေးတော့ဘူး။ ဒီနမ့်လန်ဖက်ကိုလည်း စစ်ကောင်စီကလည်း အင်အားတွေဖြည့်တာတွေ့နေရတယ်။”ဟု နမ့်လန်မြို့‌ ဒေသခံအမျိုးသားတစ်ဦး ကပြောသည်။

နမ့်လန်မြို့သည် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) တပ်ဖွဲ့ ၊ ကိုးကန့်တပ်ဖွဲ့ MNDAA နှင့် စစ်ကောင်စီတို့ သွားလာလှုပ်ရှားနေသည့်အတွက် ဒေသခံများ စိုးရိမ်နေကြောင်း ထွက်ပြေးတိမ်ရှောင်နေသည့် အမျိုးသားတစ်ဦးက ဆက်ပြောသည်။

နမ့်လန်မြို့သည် သီပေါမြို့နယ် တိုက်ပွဲဖြစ်ပွားနေသည့် နောင်ကော်ကြီးကျေးရွာနှင့် မိုင် ၃၀ ခန့်သာကွားဝေးကြောင်း သိရသည်။