တအာင်း(ပလောင်) အမျိုးသားလွတ်မြောက်ရေးတပ်မတော် TNLA မှ တစ်ဖက်သက် အပစ်ရပ်ထားသည့် နောက်ဆုံးရက်တွင် မိုးကုတ်မြို့နယ် စစ်ကောင်စီတပ်မှ လက်နက်ကြီး ပစ်ခတ်ခဲ့ခြင်းကြောင့် အမျိုးသမီး ၃ ဦးနှင့် ကလေး ၁ ဦးအပါအဝင် အရပ်သား (၇) ဦးထက်မနည်း သေဆုံးခဲ့ကြောင်း စုံစမ်းသိရသည်။
ယမန်နေ့ (ဇူလိုင်လ ၁၈ ရက်) တစ်ရက်တည်းတွင် မိုးကုတ်မြို့ အရှေ့ပိုင်းရှိ ကုန်းမြင့်သာယာ၊ မင်းတံတား၊ ဖောင်တော်ဦးနှင့် မြို့မရပ်ကွက်သို့ စစ်ကောင်စီတပ်မှ လက်နက်ကြီး ပစ်ခတ်ခဲ့ခြင်းကြောင့် အမျိုးသမီး ၃ ဦးနှင့် ကလေး ၁ ဦး အပါအဝင် အရပ်သား (၇) ဦးထက်မနည်း သေဆုံးသွားခဲ့ကြောင်း မိုးကုတ်ဒေသခံများက ပြောသည်။
“လက်နက်ကြီးက ဘယ်ကပစ်လဲ မသိဘူး၊ အိမ်တွေပေါ် လက်နက်ကြီးကျပြီး သေနေတာ နေ့တိုင်းရှိတယ်။ အရင်က မြို့ပတ်လည်မှာ တိုက်ပွဲဖြစ်နေတာက အခုမြို့ပေါ်ရပ်ကွက်ထဲ ရောက်လာပြီ။ ကုန်းမြင့်သာယာမှာ လက်နက်ကြီးကျပြီး အဘိုးတစ်ယောက် ပွဲချင်းပြီးပဲ၊ ဦးလေး ၂ နဲ့ အဲ့နားမှာ ဆော့နေတဲ့ ဂေါ်ရခါးကလေး တစ်ယောက်လည်း ဆုံးသွားတယ်”ဟု မိုးကုတ်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
မိုးကုတ်မြို့ ကုန်းမြင့်သာယာရပ်ကွက်တွင် လက်နက်ကြီး ထိမှန်ပြီး သေဆုံးသွားသူများမှာ အသက် (၇၀)ကျော် ဦးတင်မောင်အေး၊ အသက် (၄၀) ကျော်အရွယ်ရှိ ကိုဇင်၊ ကိုထွေးနှင့် အခြားကလေးငယ်တစ်ဦးတို့ ဖြစ်ကြောင်း ဒေသခံများထံမှ သိရသည်။
မိုးကုတ်မြို့အရှေ့ပိုင်း ကုန်းမြင့်သာယာ၊ မင်းတံတား၊ ဖော်တော်ဦးဘုရား၊ ဟက်ဖလားနှင့် မြို့မရပ်ကွက်တို့တွင် စစ်ကောင်စီ၏ လက်နက်ကြီး ကျရောက်ပေါက်ကွဲခြင်းကြောင့် မယ်သီလရှင် (၃) ပါးအပါအဝင် အရပ်သား (၉) ဦး သေဆုံးပြီး (၁၀) ဦး ထိခိုက်ဒဏ်ရာ ရရှိခဲ့ကြောင်း TNLA သတင်းနှင့် ပြန်ကြားရေးမှလည်း ထုတ်ပြန်ထားသည်။
အလားတူ မိုးကုတ်မြို့ မစိုးရိမ်ကျောင်းတိုက်၊ ဓမ္မရံသီ ကျောင်းတိုက်၊ လေးမျက်နှာဘုရားနှင့် အကျဉ်းထောင်ဘက်တွင် တိုက်ပွဲပြင်းထန်ခဲ့ပြီး မြို့ပေါ်လူနေရပ်ကွက်အတွင်း တိုက်ပွဲပြင်းထန်နေခြင်းကြောင့် အရပ်သားထိခိုက်သေဆုံးမှု မြှင့်တက်လာနိုင်ကြောင်း ဒေသခံများက ပြောသည်။
TNLA နှင့် PDF မိုးကုတ်ဗျူဟာ ပူးပေါင်းတပ်ဖွဲ့တို့ သိမ်းပိုက်ထားသည့် မိုးကုတ်မြို့ အနောက်ပိုင်း ကျပ်ပြင်ဘက်တွင် အဝင်အထွက်လမ်းများ ပိတ်ထားခြင်းကြောင့် ရပ်ကွက်အတွင်း ကျန်ရှိနေသေးသည့် ပြည်သူများအတွက် စားနပ်ရိက္ခာ အခက်အခဲများ ကျပ်တည်းလာကြောင်း စစ်ဘေးရှောင်များထံမှ သိရသည်။
လက်ရှိတွင် မိုးကုတ်မြို့အရှေ့ပိုင်းရှိ စစ်ကောင်စီလက်အောက်ခံ ဗျူဟာတပ်စခန်းကုန်း၊ ခလရ-၇၁/ ၈၈/ ၁၄၈ တို့ကို TNLA နှင့် PDF မိုးကုတ်ဗျူဟာ ပူးပေါင်းတပ်ဖွဲ့တို့က ဆက်လက်ထိုးစစ်ဆင် တိုက်ခိုက်နေပြီး ရေပူနှင့် ညောင်သုံးပင်ဘက်တွင် တိုက်ပွဲဆက်လက်ဖြစ်ပွားနေကြောင်း ဒေသခံများက ပြောသည်။
Leave a Comments