သျှမ်းပြည် သိန္နီမြို့နှင့် လားရှိုးမြို့ကို ကိုးကန့်တပ်ဖွဲ့ MNDAA က အပစ်ရစ်ကြေညာထားသည့် လေးရက်အတွင်း စစ်ကောင်စီတပ်မှ လေကြောင်းကြောင့် အပြင်းအထန် ဗုံးကြဲတိုက်ခိုက်ခဲ့ကြောင်း စုံစမ်းသိရသည်။

အရှေ့မြောက် တိုင်းစစ်ဌာနချုပ် ရမခ အခြေစိုက်ရာ လားရှိုးမြို့ကို ထိုးစစ်ဆင် တိုက်ခိုက်နေသည့် ကိုးကန့်တပ်ဖွဲ့ MNDAA သည် ဇူလိုင်လ ၁၅ ရက် မှ ၁၈ ရက်အထိ လေးရက်ကြာ အပစ်ရပ်ကြေညာခဲ့သည်။

ထိုကြေညာပြီးနောက် ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့ပေါ်သို့ စစ်ကောင်စီတပ်မှ လေကြောင်းဖြင့် ယမန့်နေ့ (ဇူလိုင် ၁၈ ရက်)တွင် ဗုံးကြဲတိုက်ခိုက်ခဲ့ပြီး အရပ်သား အများအပြား သေဆုံး၊ ဒဏ်ရာရရှိခဲ့ကာ ယနေ့ (ဇူလိုင် ၁၉ ရက်)အထိ စစ်ကောင်စီတပ်မှ လေကြောင်းဖြင့် ဆက်လက်ဗုံးကြဲ တိုက်ခိုက်နေသေးကြောင်း သိရသည်။

“မနေ့က ညနေ ၄ နာရီကျော်မှာ ဂျက်ဖိုက်တာနဲ့ လာကြဲတာ ဈေးပေါ်ကိုကျတယ်၊ သေတာနဲ့ ဒဏ်ရာရတာဆိုရင် ၃၀ ကျော် ရှိတယ်။ ဈေးကြီးရယ်၊ မြို့တော်ခန်းမ၊ ကြာကန် (နောင်မို)နဲ့ လယ်ကွက်ထဲ ၄ လုံး ချသွားတာ။ ဈေးပေါ်ကျတာတော့ အပြင်းဆုံးပဲ၊ ဆိုင်ခန်းနဲ့ အဲ့နားက အိမ်တွေ အကုန်ထိတယ်”ဟု သိန္နီမြို့ဒေသခံ ဈေးသည်အမျိုးသမီးတစ်ဦးက သျှမ်းသံတော်ဆင့်ကို ပြောသည်။

သိန္နီမြို့မဈေးပေါ်သို့ စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ရာ အမျိုးသမီး ၂ ဦး အပါအဝင် အရပ်သား (၁၀) ဦးခန့် သေဆုံးပြီး၊ (၂၀) ဦးထက်မနည်း ထိခိုက်ဒဏ်ရာရရှိခဲ့ကြောင်း ဈေးသည်များထံမှ သိရသည်။

စစ်ကောင်စီ လေကြောင်းဗုံးကြဲ၍ သေဆုံးသွားသူများထဲတွင် မိသားစု ဝမ်းရေးကို အဓိက ရှာဖွေကျွေးမွေးနေသည့် လူငယ်များလည်း ပါရှိကြောင်း ဒေသခံများ၏ လူမှုကွန်ရက် စာမျက်နှာတွင် ရေးသားထားသည်။

“သေဆုံးမှုထဲ အသက်အရွယ်ကောင်းသူတွေ မိသားစုအတွက် ရှာဖွေရုန်းကန် အလုပ်အကျွေးပြုနေတဲ့ မိခင်၊ ဖခင်၊ သားသမီးကောင်းရတနာတွေ ပါဝင်ပါတယ်။ အင်မတန်မှ ဝမ်းနည်းထိခိုက် နာကျည်းရပါတယ်ဗျာ”ဟု သိန္နီဒေသခံ အမျိုးသားတစ်ဦးက ၎င်း၏ လူမှုကွန်ရက် စာမျက်နှာတွင် ရေးသားထားသည်။

လက်ရှိတွင် လေကြောင်းဗုံးကြဲခံရသည့် သိန္နီမြို့မဈေးနှင့် အနီးရှိ ပြည်ထောင်စု လမ်းမကြီးကိုလည်း ကိုးကန့်တပ် MNDAA က ပိတ်ထားလိုက်ပြီး မည်သူမှ ဖြတ်သန်းသွားလာခွင့် မပြုကြောင်း ဒေသခံများက ပြောသည်။

“မနေ့ကဆို ဈေးသိမ်းခါနီး ဗုံးလာကြဲသွားတော့ လူထိတာနဲ့ ပျက်စီးဆုံးရှုံးတာ များတယ်။ ရှေ့ရက်က ကွတ်ခိုင်အတက် ကွမ်းလုံလမ်းခွဲမှာလည်း နေ့လယ်ကြီး လေယာဉ်နဲ့ ဗုံးလာချသွားတာ။ အရင်ကလည်း ကျောင်းနဲ့ ပညာရေးမှူးရုံးကို လာကြဲတာ၊ ရဲစခန်းကို လာကြဲတာနဲ့ဆိုရင် စုစုပေါင်း ၄ ခါမက ရှိပြီ”ဟု သိန္နီမြို့မှ ၎င်းဒေသခံ အမျိုးသမီးက သျှမ်းသံတော်ဆင့်ကို ပြောသည်။

ပြီးခဲ့သည့် ဇူလိုင်လ ၁၂ ရက်တွင် သိန္နီမြို့ပေါ် အထက-(၁)၊ အထက-(၂) နှင့် ပညာရေးမှူးရုံးသို့ လည်းကောင်း၊ ဇူလိုင်လ ၃ ရက်တွင် ရပ်ကွက်(၂) ရှိ ရဲစခန်းအနီးသို့ လည်းကောင်း စစ်ကောင်စီတပ်မှ ဂျက်လေယာဉ်ဖြင့် ဗုံးကြဲတိုက်ခိုက်ခဲ့ရာ စာသင်ဆောင်နှင့် ပြည်သူနေအိမ် ၁၀ လုံးထက်မနည်း ထိခိုက်ပျက်စီးသွားခဲ့ကြောင်း ဒေသခံများက ပြောသည်။

သိန္နီမြို့ဒေသခံများသည်လည်း ညအချိန်တွင် မြို့ထဲရှိ နေအိမ်တွင် မနေရဲတော့ဘဲ လေကြောင်းပစ်ခတ်မှု အန္တရာယ် ကင်းလွတ်နိုင်သည်ဟု ယူဆရသည့် တောင်ယာနှင့် ဘုန်းကြီးကျောင်းများတွင် ညသွားအိပ်နေကြရကြောင်း သိရသည်။

ပြီးခဲ့သည့် ဇန်နဝါရီ လဆန်းပိုင်းက သိန္နီမြို့ရှိ စကခ-၁၆ ၊ ခလရ-၆၉ နှင့် ခမရ-၃၂၃ တပ်ရင်းတို့ကို ကိုးကန့်တပ်ဖွဲ့ MNDAA နှင့် ပြည်သူ့လွတ်မြောက်ရေးတပ်မတော် PLA ပူးပေါင်းတပ်ဖွဲ့တို့မှ အပြီးသတ် သိမ်းပိုက်ထိန်းချုပ်နိုင်ပြီးနောက် စစ်ဘေးရှောင်များကို နေရပ်ပြန်နေရန် ကိုးကန့်တပ်က ပြန်လည်ခေါ်ယူခဲ့ကြောင်း ဒေသခံများက ပြောသည်။

ကိုးကန့်တပ်ဖွဲ့မှ စစ်ဘေးရှောင်များ နေရပ်မပြန်ပါက နေအိမ်များကို သိမ်းဆည်းမည်ဟု ခြိမ်းခြောက်ခဲ့ခြင်းကြောင့် စစ်ဘေးရှောင်ထက်ဝက်ကျော်မှာ နေအိမ်ပြန်နေစဉ် ယခုကဲ့သို့ လေကြောင်းဖြင့် ထပ်မံဗုံးကြဲခံရခြင်းဖြစ်ကြောင်း သိရသည်။

“စစ်သဘောအရ အလုံးအရင်းနဲ့ အပြန်အလှန် ထိုးစစ်ဆင်မှုတွေ အချိန်မရွေး ရှိနိုင်တာမို့ တိုက်ပွဲကြားက မိဘပြည်သူများ သတိဝိရိယ အမြဲရှိကြပါခင်ဗျား”ဟုလည်း သိန္နီ ဒေသခံ အမျိုးသားက ၎င်းလူမှုကွန်ရက်စာမျက်နှာမှ တဆင့် သတိပေးလိုက်သည်။

အလားတူ ကိုးကန့်တပ်ဖွဲ့ MNDAA က လေးရပ်ကြာ အပစ်ရပ် မကြေညာခင် ဇူလိုင်လ ၁၄ ရက် နံနက်ပိုင်းကလည်း လောက်ကိုင်မြို့သို့ စစ်ကောင်စီတပ်က လေကြောင်းဗုံးကြဲတိုက်ခိုက်ခဲ့ရာ အရပ်သားတစ်ဦး သေဆုံးခဲ့ကြောင်း MNDAA မှ ထုတ်ပြန်ထားသည်။