သျှမ်းပြည်မြောက်ပိုင်း တရုတ်-မြန်မာနယ်စပ်တလျှောက်ရှိ ကိုးကန့်တပ်ဖွဲ့ MNDAA နှင့် တအာင်း(ပလောင်) အမျိုးသားလွတ်မြောက်ရေးတပ်မတော် TNLA တို့ ထိန်းချုပ်ထားနိုင်သည့် နယ်စပ်ဂိတ်များကို တရုတ်အာဏာပိုင်ဘက်မှ ယမန်နေ့ (ဇူလိုင် ၁၇)ရက်မှ စတင်ပိတ်ပင်လိုက်ကြောင်း စုံစမ်းသိရသည်။

ဇူလိုင်လ တတိယပတ်မှ စတင်ပြီး တရုတ်-မြန်မာ နယ်စပ်တလျှောက် ကိုးကန့်တပ်ဖွဲ့ MNDAA ထိန်းချုပ်ထားသည့် လောက်ကိုင်မြို့နယ်မှ ချင်းရွှေဟော် နယ်စပ်ဂိတ်၊ မူဆယ်မြို့နယ်မှ ပန်ဆိုင်းနှင့် ကျင်းစန်းကျော့ နယ်စပ်ဂိတ်တို့အပြင် တအာင်း(ပလောင်)တပ်ဖွဲ့ TNLA ထိန်းချုပ်ထားသည့် နမ့်ခမ်းမြို့နယ်မှ နောင်တောင်း ကုန်သွယ်ရေးသီးသန့်ဂိတ်တို့ကို တရုတ်အာဏာပိုင်ဘက်မှ စတင်ပိတ်ပင်လိုက်ကြောင်း ကုန်သည်များက ပြောသည်။

“ကိုးကန့်တပ်တွေ ထိန်းချုပ်ထားတဲ့ နယ်စပ်ဂိတ်တွေ အကုန်လုံးကို တရုတ်ဘက်က စပိတ်လိုက်ပြီလို့ပြောတယ်။ ဒီဘက်မှာက ဂိတ်အကြီးဆိုရင် ချင်းရွှေဟော်ရှိမယ်၊ နောက်ပြီး ရန်လုံကျိုင်းဂိတ်နဲ့ ပန်ဆိုင်း(ကြူကုတ်)မှာလည်း တစ်ဂိတ်ရှိတယ်။ တရုတ်က ပိတ်တယ်ဆိုရင်တော့ အဝင်အထွက် မရလောက်တော့ဘူး”ဟု လောက်ကိုင်မြို့မှ ကုန်သည်တစ်ဦးက သျှမ်းသံတော်ဆင့်ကို ပြောသည်။

ကိုးကန့်တပ်ဖွဲ့ MNDAA ထိန်းချုပ်ထားသည့် မူဆယ်မြို့နယ် ပန်ဆိုင်း(ကြူကုတ်)မြို့ရှိ နယ်စပ်ဂိတ်ကို ဇူလိုင်လ ပထမပတ်မှ စတင်၍ တရုတ်ဘက်က ပိတ်ထားခဲ့ပြီး နှစ်ပတ်ကျော် ကြာပြီဖြစ်ကြောင်း ပန်ဆိုင်းဒေသခံများထံမှ သိရသည်။

နမ့်ခမ်းမြို့နယ်မှ တစ်ခုတည်းသော TNLA ထိန်းချုပ်ထားသည့် တရုတ်-မြန်မာနယ်စပ် နောင်တောင်း သီးသန့်ကုန်သွယ်ရေးဂိတ်လည်း ပိတ်ပင်ထားကြောင်း ဒေသခံကုန်သည်များက ပြောဆိုနေပြီး သျှမ်းသံတော်ဆင့်မှ TNLA သတင်းနှင့် ပြန်ကြားရေးဌာနထံ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးပေ။

ပြီးခဲ့သည့် မတ်လ ၁၁ ရက်နေ့က စတင်ပြီး လောက်ကိုင်မြို့နယ်ရှိ ချင်းရွှေဟော် နယ်စပ်ကုန်သွယ်ရေးဂိတ်ကို စစ်ကောင်စီနှင့် ကိုးကန့်တပ်ဖွဲ့ MNDAA တို့ တရုတ်နိုင်ငံ ကူမင်းမြို့၌ (၄)ကြိမ်မြောက် တွေ့ဆုံဆွေးနွေးပြီးနောက်ပိုင်း နယ်စပ်ဖြတ်သန်း သွားလာနိုင်ရန် ကိုးကန့်တပ်ဖွဲ့ MNDAA က ပြန်ဖွင့်ပေးခဲ့သည်။

စစ်ကောင်စီတပ်နှင့် အပေးအယူ လုပ်ပြီးနောက် ချင်းရွှေဟော် နယ်စပ်ကုန်သွယ်ရေးဂိတ်ကို ကိုးကန့်တပ်ဖွဲ့မှလည်း ပူးတွဲတာဝန်ယူပြီး အခွန်ကောက်ခံရရှိငွေကို ညီနောင်မဟာမိတ် (၃)ဖွဲ့ကိုယ်စား ကိုးကန့်တပ်ဖွဲ့က ၇၀% ရယူ၍ စစ်ကောင်စီက ၃၀% ရယူရန် သဘောတူညီခဲ့ကြောင်း သတင်းထွက်ပေါ်ခဲ့သော်လည်း နှစ်ဘက်စလုံးက ထုတ်ဖော်အတည်ပြုခြင်း မရှိသေးပေ။

ပြီးခဲ့သည့် ဇွန်လအတွင်းက ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC) အဖွဲ့ဝင် တိုင်းရင်းသားလက်နက်ကိုင် (၇) ဖွဲ့တို့ကို ခေါ်ယူပြီး တရုတ်နိုင်ငံမှ နယ်စပ်ကုန်သွယ်ရေးနှင့် ကုန်းတွင်းဆိပ်ကမ်း စီမံခန့်ခွဲရေး အပါအဝင် အခြားခေါင်းစဉ်များကို နှစ်ပတ်ကြာ လေ့ကျင့်ပေးခဲ့ကြောင်း စစ်ရေးသတင်းရင်းမြစ်များထံမှ သိရသည်။