သျှမ်းပြည် လားရှိုးမြို့ပေါ်ရှိ ရပ်ကွက်များနှင့် နေအိမ်များသို့ ရှေ့တိုက်ဒုံးများ၊ လက်နက်ကြီးများ ဆက်တိုက်ကျရောက်ပေါက်ကွဲနေကြောင်း ဒေသခံများ၏ပြောပြချက်အရ သိရသည်။

ယနေ့ (ဇူလိုင် ၁၀) ရက် နံနက်အစောပိုင်းမှစတင်ပြီး လားရှိုးမြို့ ရပ်ကွက် (၉)၊ နယ်မြေ (၃) ဘူတာရုံသံလမ်းဘေးတွင် ရှော့တိုက်ဒုံး ၂ လုံး၊ ထင်းရှုးမြိုင်အနီး ၁ လုံး၊ နေခြည်ကျောင်းအနီး ၁ လုံး၊ တောရကျောင်း ၃ လုံးနှင့် လားရှိုးတက္ကသိုလ်အနီး ပါရမီလမ်းတွင် ၁ လုံး စသည့်နေရာများတွင် ရှော့တိုက်ဒုံးများ၊ လက်နက်ကြီးများ ကျရောက်ပေါက်ကွဲခဲ့ခြင်း ဖြစ်သည်။

“ဒါကြီးတော့ မဖြစ်သင့်ဘူးပေါ့ဗျာ။ မသက်ဆိုင်တဲ့ ပြည်သူတွေပါထိပြီး သေသူသေ၊ ဒဏ်ရာရသူရနဲ့ အဆင်မပြေဘူးဗျာ” ဟု ထိခိုက်ဒဏ်ရာရသူများကို ကယ်ထုတ်ပေးနေသည့် လားရှိုးလူမှုကူညီရေးအသင်းက သျှမ်းသံတော်ဆင့်ကို ပြောသည်။

ယနေ့ လားရှိုးမြို့ ရပ်ကွက် (၉)၊ နယ်မြေ (၃) ဘူတာရုံသံလမ်းဘေးသို့ ရှေ့ာတိုက်ဒုံးကျရောက် ပေါက်ကွဲမှုအတွင်း ကလေး ၁ ဦးနှင့် အမျိုးသမီး ၂ ဦးသေဆုံးပြီး ထိခိုက်ဒဏ်ရာရသူ ၁၀ ဦးထက်မနည်းရှိကြောင်း သိရသည်။

လက်ရှိ ထိခိုက်ဒဏ်ရာများကို လားရှိုးပြည်သူ့ဆေးရုံကြီးတွင် ပို့ဆောင်ထားပြီး ထိုထဲမှ ဒဏ်ရာရသူ ၃ ဦးသည် စိုးရိမ်ရကြောင်း လူမှုကူညီရေးအသင်းထံမှ သိရသည်။

သျှမ်းမြောက် လားရှိုးမြို့တွင် ဇူလိုင် ၂ ရက်မှ ယနေ့ ဇူလိုင် ၁၀ ရက်အထိ တိုက်ပွဲများကြောင့် ပြည်သူ ၂၀ ကျော် သေဆုံးပြီး ကလေးနှင့် အမျိုးသမီးအပါအဝင် ထိခိုက်ဒဏ်ရာရသူ ၃၀ ကျော်ရှိနေပြီဖြစ်ကြောင်း သိရသည်။