သျှမ်းမြောက် နောင်ချို၊ ကျောက်မဲနဲ့ သီပေါ မြို့နယ်အတွင်းမှာ လှုပ်ရှားနေတဲ့ တအာင်း(ပလောင်) အမျိုးသား လွတ်မြောက်ရေးတပ်မတော် TNLA တပ်ဖွဲ့ကို ရှမ်းပြည်တိုးတက်ရေးပါတီ SSPP တပ်ဖွဲ့ကတိုက်ထုတ်တော့မယ်လို့ သတင်းလွဲမှားစွာ ဖြန့်ချိနေပါတယ်။

စစ်ကောင်စီကို ထောက်ခံရေးသားနေတဲ့ Kyaw Win Maung ချယ်နယ်က “SSPP/SSA အဖွဲ့များမှ နောင်ချို၊ ကျောက်မဲ၊ သီပေါအတွင်း အနိုင်ကျင့်ဗိုလ်ကျနေသော TNLA များအားတိုက်မည်” လို့ (မူရင်းအတိုင်း) SSPP တပ်သားရုပ်ပုံအချို့နဲ့အတူ ဖြန့်ချိခဲ့တာပါ။
အဆိုပါ လွဲမှားစွာဖြန့်ချိနေတဲ့ သတင်းကို ကြည့်ရှု့သူပေါင်း ၃၆,၀၀၀ ကျော်ရှိပြီး အခြားဝါဒဖြန့်တယ်လီဂရမ်ချယ်နယ်များ ကလည်း ထပ်ဆင့်ဖော်ပြထားတာ တွေ့ရပါတယ်။

မူရင်းလင့်ခ် – https://archive.ph/GsYuI

စစ်ဆေးခြင်း

သျှမ်းသံတော်ဆင့် အချက်အလက်စစ်ဆေးသူများအနေဖြင့် အဆိုပါအကြောင်းအရာကို စစ်ဆေးကြည့်တဲ့အခါ သတင်းမီဒီယာပေါ်က ဖော်ပြထားတဲ့ သတင်းတွေကို ကိုးကားပြီး ၎င်းတို့လိုအပ်သလို ပုံဖော်ရေးသားပြီး ချဲ့ကားဝါဒဖြန့်နေတာကို တွေ့ရပါတယ်။
သီပေါမြို့နယ်နဲ့ ကျောက်မဲမြို့နယ်မှာ ဇူလိုင် ၅ ရက်က TNLA နှင့် SSPP တို့ တိုက်ပွဲဖြစ်ပွားခဲ့တာ မှန်ကန်ပါတယ်။ တိုက်ပွဲနဲ့ ပတ်သက်ပြီး အပြန်အလှန် စွတ်စွဲကြတာတွေလည်း ရှိပါတယ်။

ဆက်စက်ဖတ်ရှု့ရန် ထုတ်ပြန်ချက်လင့်ခ်များ – https://archive.ph/7TgsN / https://archive.ph/1DioD

ဒါပေမဲ့ နောင်ချို၊ ကျောက်မဲနဲ့ သီပေါ တို့မှာလှုပ်ရှားနေတဲ့ TNLA တပ်ဖွဲ့ကို SSPP တပ်ဖွဲ့က တိုက်ထုတ်မယ်လို့ လက်ရှိသတင်းအချက် စစ်ဆေးတဲ့အချိန်ထိ SSPP Info ရဲ့လူမှုကွန်ရက်စာမျက်နှာမှာ ထုတ်ပြန်ထားခြင်း မတွေ့ရသေးပါဘူး။

လွတ်လပ်တဲ့ သတင်းဌာနများနဲ့ ဒေသတွင်း သတင်းဌာများကလည်း အဆိုပါအကြောင်းအရာနှင့် ပတ်သက်၍ ဖော်ပြထားခြင်းမရှိပါ။

လက်ရှိ ကျောက်မဲမြို့နယ်နဲ့ သီပေါမြို့နယ်အတွင်း ဖြစ်ပွားနေတဲ့ TNLA နဲ့ SSPP တို့အကြား စစ်ရေးပဋိပက္ခကို ‘ဝ’ တပ်ဖွဲ့ UWSA ဦးဆောင်တဲ့ ပြည်ထောင်စုနိုင်ငံရေး ဆွေးနွေးမှုညှိနှိုင်းရေးကော်မတီ FPNCC ကနေ အမြန်ဆုံး ကြားဝင်ထိန်းသိမ်းပေးဖို့ နှစ်ဖက်စလုံးကစောင့်ဆိုင်းနေကြတယ်လို့ သိရပါတယ်။

အဆိုပါ ကိစ္စနဲ့ပတ်သက်ပြီး TNLA သတင်းနဲ့ ပြန်ကြာရေးဌာနမှူးက “ဒီကိစ္စက ကျမတို့က FPNCC ရဲ့ လမ်းညွှန်မှုကို စောင့်ဆိုင်းနေတာ ဖြစ်ပါတယ်။ လက်ရှိမှာတော့ SSPP နဲ့ ဖြစ်ပွားနေတဲ့ ပစ်ခတ်မှုဟာ နှစ်ဘက်အကောင်းဆုံးအတွက် ခေါင်းဆောင်တွေ ညှိနှိုင်းနေပါတယ်။ ဒီဆွေးနွေးညှိနှိုင်းမှုမှာ လက်ရှိ ကျောက်မဲခရိုင် PDF ဆီက သိမ်းယူသွားတဲ့ လက်နက် ၂၅ လက်နဲ့ ဖမ်းဆီးခေါ်ဆောင်သွားတဲ့ ကျမတို့ တပ်သား အယောက် (၂၀) ကျော် ပြန်လွှတ်ပေးဖို့ တောင်းဆိုနေတာ ဖြစ်ပါတယ်”လို့ သျှမ်းသံတော်ဆင့်ကို ပြောပါတယ်။

ကျောက်မဲမြို့နယ်အတွင်း PDF တပ်ဖွဲ့ရဲ့ လက်နက်နဲ့ TNLA တပ်သား ၂၀ ကျော်ကို ဖမ်းဆီးထားတဲ့ ကိစ္စနဲ့ပတ်သက်ပြီး သျှမ်းသံတော်ဆင့်က SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ထံသို့ ဆက်သွယ်မေးမြန်းဖို့ အကြိမ်ကြိမ်ကြိုးစားခဲ့သော်လည်း ဖုန်းဆက်ပိတ်ထားပါတယ်။

ဒါ့ကြောင့် သျှမ်းမြောက် နောင်ချို၊ ကျောက်မဲနဲ့ သီပေါတို့မှာ လှုပ်ရှားနေတဲ့ TNLA တပ်ဖွဲ့ကို SSPP တပ်ဖွဲ့ တိုက်ထုတ်တော့မယ်လို့ ဖြန့်ချိမှုမှာ လွဲမှားနေပါတယ်။

စစ်ကောင်စီတပ်ဟာ တစ်ကျော့ပြန် “၁၀၂၇ စစ်ဆင်ရေး” မှာ စစ်ရေးရှုံးနိမ့်မှုကို ရင်ဆိုင်နေရတဲ့အတွက် တစ်ဖက်မှာအသာစီးရဖို့ ဆိုရှယ်မီဒီယာတွေ၊ တယ်လီဂရမ်ချယ်နယ်တွေကိုအသုံးချပြီး ဝါဒဖြန့်ချိခြင်း၊ လှုံ့ဆော်ခြင်း၊ သတင်းအမှားဖြန့်ချိခြင်းများ လုပ်ဆောင်နေလျက်ရှိပါတယ်။

ဒါ့အပြင် တိုင်းရင်းသားလက်နက်ကိုင်အဖွဲ့အစည်း အချင်းချင်းကြား၊ တော်လှန်ရေးအင်အားစုတပ်ဖွဲ့နဲ့ ပြည်သူများအကြား ပဋိပက္ခဖြစ်ပွားအောင်၊ ယုံကြည်မှုပျက်ပြားအောင် စစ်တပ်ဘော်လီများက အမြဲသလို သွေးထိုးလှုံ့ဆော်နေကြပါတယ်။

သျှမ်းသံတော်ဆင့် စာဖတ်ပရိတ်သတ်တွေအနေနဲ့ လူမှုကွန်ရက် စာမျက်နှာတွေမှာ ဖော်ပြနေတဲ့ သတင်းတွေကို ချက်ချင်းမယုံကြည်ဘဲ စိတ်ချရသော သတင်းမီဒီတွေမှာ သွားရောက်ဖတ်ရှု့ကြဖို့ တိုက်တွန်းပါတယ်။

သတင်းတု၊ သတင်းမှားဟု ယူဆရတဲ့ သတင်းတွေကိုလည်း သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook Chat Box ကနေဆစ်ဆင့် သတင်းရဲ့ လင့်ခ် (သို့မဟုတ်) Screen Short ပုံပေးပို့ခြင်းဖြင့် စစ်ဆေးနိုင်ပါတယ်။