သျှမ်းပြည် ကျောက်မဲမြို့နယ် နောင်ပိန်ကျေးရွာအုပ်စုအနီးရှိ ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA စခန်းချနေရာကို တအာင်း(ပလောင်) အမျိုးသားလွတ်မြောက်ရေး တပ်မတော် TNLA မှ ဒရုန်းဖြင့် ဗုံးကြဲတိုက်ခိုက်ခဲ့ကြောင်း စုံစမ်းသိရသည်။

ယမန်နေ့ (ဇူလိုင်လ ၇ ရက်) ည ၉ နာရီကျော်မှ စတင်ပြီး ကျောက်မဲမြို့နယ် နောင်ပိန်ကျေးရွာအုပ်စုရှိ လုပ်ပါရဲစခန်းအနီးတွင် တပ်စွဲထားသည့် SSPP တပ်ဖွဲ့ စခန်းချနေရာသို့ TNLA တပ်ဖွဲ့မှ အင်အားဖြည့်တင်းလာပြီး ဒရုန်းဖြင့် ဗုံး(၂) လုံး ကြဲချတိုက်ခိုက်ခဲ့ခြင်းကြောင့် သေနတ်ပစ်ခတ်မှု ဖြစ်ပွားခဲ့ကြောင်း ဒေသခံများက ပြောသည်။

“လမ်းမကြီး အရှေ့ဘက်ကို TNLA က တစွတ်ထိုးဝင်လာတာ၊ မနေ့ညတုန်းက နောင်ပိန်အရှေ့ဘက် လုပ်ပါရဲစခန်းနား SSPP နေရာမှာ ဒရုန်းနဲ့ ဗုံးနှစ်လုံး တိုက်ခံရတာ။ အဲ့နောက်ပိုင်း သေနတ်သံ လေးငါးချက်တော့ ကြားလိုက်သေးတယ်၊ ထိခိုက်မှုကတော့ မသိရသေးဘူး”ဟု ကျောက်မဲမြို့နယ်မှ စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့နယ်အတွင်း SSPP နှင့် TNLA တပ်ဖွဲ့တို့၏ ယခုဖြစ်စဉ်နှင့် ပတ်သက်ပြီး သျှမ်းသံတော်ဆင့်မှTNLA သတင်းနှင့် ပြန်ကြားရေးဌာနသို့ စာပို့မေးမြန်းထားသော်လည်း ပြန်လည်ဖြေကြားခြင်း မရှိသေးဘဲ SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်ထံ ဆက်သွယ်မေးမြန်းရန် ကြိုးစားခဲ့သော်လည်း ဖုန်းစက်ပိတ်ထားသည်။

အလားတူ ဇူလိုင်လ ၅ ရက်နေ့တွင် ကျောက်မဲနှင့် သီပေါမြို့နယ်အတွင်း ဖြစ်ပွားခဲ့သည့် SSPP တပ်ဖွဲ့နှင့် TNLA တပ်ဖွဲ့တို့၏ စစ်ရေးပဋိပက္ခ အခြေအနေနှင့် ပတ်သက်ပြီး ကြားဝင်ကူညီ ထိန်းကြောင်းပေးရန် မဟာမိတ်ဖြစ်သူ ‘ဝ’တပ်ဖွဲ့ UWSA ထံ အကူအညီတောင်းခံသည့် စာသည် ဇူလိုင်လ (၆) ရက် နေ့စွဲဖြင့် အွန်လိုင်းပေါ် ပျံ့နှံ့လာခဲ့ပြီး သျှမ်းသံတော်ဆင့်အနေဖြင့် သီးခြားအတည်ပြုနိုင်ရန် ဆက်လက်စုံစမ်းနေသည်။

ပြီးခဲ့သည့် ဇူလိုင်လ ၅ ရက်တွင် ကျောက်မဲမြို့နယ် နောင်ပိန်ကျေးရွာအုပ်စုနှင့် သီပေါမြို့နယ် ကြံခင်းရွာတို့တွင် နှစ်နေရာထက်မနည်း ဖြစ်ပွားခဲ့သည့် SSPP တပ်ဖွဲ့နှင့် TNLA တပ်ဖွဲ့တို့၏ တိုက်ပွဲများအတွင်း နှစ်ဘက်ထိခိုက်ကျဆုံးမှု ရှိကြောင်း SSPP Info ၊ TNLA သတင်းနှင့် ပြန်ကြားရေးဌာနတို့က အသီးသီး ထုတ်ပြန်ထားပြီး အခြားတစ်ဘက်မှ စတင်ပစ်ခတ်၍ တိုက်ပွဲဖြစ်ပွားခဲ့ရခြင်း ဖြစ်ကြောင်း အပြန်အလှန် စွပ်စွဲထားသည်။

နှစ်ဘက်တပ်ဖွဲ့မှ အောက်ခြေတပ်သားများ နားလည်မှုလွှဲမှားပြီး အပြန်အလှန်ပစ်ခတ်မှု ဖြစ်ပွားသည်ကို သက်ဆိုင်ရာ ခေါင်းဆောင်များ ဆွေးနွေးညှိနှိုင်းပြီး ပစ်ခတ်မှုကို အဆုံးသတ်နိုင်ခဲ့ကြောင်း TNLA သတင်းနှင့် ပြန်ကြားရေးဌာနမှ ဇူလိုင်လ ၅ ရက်တွင် ထုတ်ပြန်ထားခဲ့သည်။

သို့သော် ဇူလိုင်လ ၇ ရက် ညပိုင်းတွင် ကျောက်မဲမြို့နယ်ရှိ SSPP စခန်းချနေရာကို TNLA တပ်ဖွဲ့မှ ဒရုန်းဖြင့် ထပ်မံဗုံးကြဲ တိုက်ခိုက်ခဲ့ခြင်းကြောင့် သေနတ်ပစ်ခတ်မှု ထပ်မံဖြစ်ပွားခဲ့ပြီး လက်ရှိတွင် နှစ်ဘက်တပ်ဖွဲ့အကြား စစ်ရေးတင်းမာမှု ရှိနေကြောင်း ကျောက်မဲဒေသခံများက ပြောသည်။