သျှမ်း-မန္တလေး နယ်စပ်ရှိ မိုးကုတ်မြို့သိမ်းတိုက်ပွဲတွင် TNLA နှင့် PDF ပူးပေါင်းတပ်ဖွဲ့များက မြို့အနောက်ပိုင်းကို ထိန်းချုပ်ထားနိုင်ပြီး စစ်ကောင်စီတပ်၏ လက်နက်ခဲယမ်းများကို သိမ်းဆည်းရမိကြောင်း စုံစမ်းသိရသည်။

ဇွန်လ ၂၅ ရက်မှ စတင်ပြီး သျှမ်း-မန္တလေးအစပ် မိုးကုတ်မြို့ရှိ စစ်ကောင်စီတပ်များကို တအာင်း(ပလောင်) အမျိုးသားလွတ်မြောက်ရေးတပ်မတော် TNLA၊ မန္တလေး-PDF နှင့် မိုးကုတ်ဗျူဟာ တပ်ရင်းတို့က ထိုးစစ်ဆင်တိုက်ခိုက်ပြီး မြို့သိမ်းတိုက်ပွဲ ဆင်နွှဲလျက်ရှိရာ ဇွန်လ ၃၀ ရက် ညပိုင်းတွင် မိုးကုတ်မြို့ အနောက်ပိုင်းကို စတင်ထိန်းချုပ်နိုင်ခဲ့ကြောင်း TNLA ဘက်မှ သတင်းထုတ်ပြန်သည်။

မိုးကုတ်မြို့နယ်ကို TNLA နှင့် PDF ပူးပေါင်းတပ်ဖွဲ့များက ထိုးစစ်ဆင် တိုက်ခိုက်ရာတွင် တစ်ပတ်အတွင်း စစ်ကောင်စီထံမှ လက်နက် (၄၃) လက် သိမ်းဆည်းရမိပြီး ရဲ(၂)ဦး အပါအဝင် စစ်သုံ့ပန်း (၁၅) ဦး ဖမ်းဆီးရမိကြောင်း TNLA သတင်းနှင့်ပြန်ကြားရေးဌာန ဇူလိုင်လ ၁ ရက် ထုတ်ပြန်ချက်အရ သိရသည်။

TNLA နှင့် PDF ပူးပေါင်းတပ်ဖွဲ့များက မိုးကုတ်မြို့အနောက်ဘက် ဒေါ်နန်းကြည်တောင်၊ ဗျူဟာကုန်း၊ ပန်းသပြေ၊ ရွှေသာယာ၊ ဖြူရောင်ကုန်း စသည့် စစ်ကောင်စီတပ်စခန်းများကို ဇွန်လ ၂၆ ရက်တွင် သိမ်းပိုက်ခဲ့ပြီးနောက် ကျပ်ပြင်ရဲစခန်းကို လေကြောင်းဗုံးကြဲ တိုက်ခိုက်ခံရသည့် ကြားထဲမှ ဇွန်လ ၂၇ ရက်တွင် ထပ်မံသိမ်းပိုက်နိုင်ခဲ့ကြောင်း မိုးကုတ်မြို့ခံများက ပြောသည်။

မိုးကုတ်မြို့နယ်တွင် စစ်ကောင်စီတပ်နှင့် TNLA၊ PDF ပူးပေါင်းတပ်ဖွဲ့တို့၏ နှစ်ဘက်တိုက်ပွဲအကြား အရပ်သား ၂ ဦး သေဆုံးပြီး ၃ ဦးထက်မနည်း ထိခိုက်ဒဏ်ရာရရှိကာ ပြည်သူနေအိမ်များ လက်နက်ကြီးထိမှန် ပျက်စီးမှုများ ရှိနေကြောင်းလည်း ဒေသခံများထံမှ သိရသည်။

TNLA နှင့် PDF ပူးပေါင်းတပ်များ မြို့တွင်းဝင်ရောက်နေပြီး စစ်ကောင်စီတပ်ဘက်က အဆက်မပြတ် လက်နက်ကြီး ပစ်ခတ်လျက်ရှိကာ မြို့ပတ်ဝန်းကျင်တွင်လည်း တိုက်ပွဲများ ဖြစ်ပွားနေသေးကြောင်း မြို့ခံများက ပြောသည်။

ထို့အပြင် မိုးကုတ်-မန္တလေး ကားလမ်း ပိတ်နေသောကြောင့် တိမ်းရှောင်ရန် ခက်ခဲသဖြင့် မြို့ခံ အများအပြား ပိတ်မိနေပြီး မြို့တွင်းတိုက်ပွဲများ ဖြစ်ပွားမည်ကို စိုးရိမ်ကြောင်း ဒေသခံများထံမှ သိရသည်။

သျှမ်းမြောက်တွင် တိုက်ပွဲတစ်ဖန် ပြန်လည်ဖြစ်ပွားလာခြင်းနှင့် ဆက်စပ်၍ မန္တလေးတိုင်းထဲသို့ပါ ပြည်သူ့ကာကွယ်ရေးတပ်များနှင့် တော်လှန်ရေးအင်အားစုများ “ရှမ်းမန်း စစ်ဆင်ရေး”ဖြင့် ထိုးဖောက်ဝင်ရောက် စစ်ဆင်နေခြင်းဖြစ်ပြီး စစ်စခန်းအများအပြား သိမ်းပိုက်ထားနိုင်ကာ အောင်ပွဲများ ဆက်တိုက်ရရှိနေကြောင်း NUG ၏ ကာကွယ်ရေးဝန်ကြီးဌာနကလည်း ထုတ်ပြန်ထားသည်။

မိုးကုတ်မြို့သိမ်းတိုက်ပွဲအတွင်း TNLA တပ်ဖွဲ့နှင့်အတူ မန္တလေး-PDF ၊ မိုးကုတ်ဗျူဟာ (၁၂၂၁၊ ၁၂၂၂၊ ၁၂၂၃၊ ၁၂၂၄) တပ်ရင်းများလည်း ပူးပေါင်းပါဝင်ပြီး စစ်ဆင်ရေး ဆောင်ရွက်နေကြောင်း သိရသည်။