သျှမ်းပြည် လားရှိုးမြို့အခြေစိုက် အရှေ့မြောက်တိုင်း စစ်ဌာနချုပ် (ရမခ)ကို ညီနောင်မဟာမိတ်တပ်များမှ စတင်တိုက်ခိုက်နေစဉ် ရပ်စောက်မြို့နယ်တွင် သျှမ်းတပ် (၂) တပ် အချင်းချင်း ပစ်ခတ်မှု ထပ်မံဖြစ်ပွားနေကြောင်း စုံစမ်းသိရသည်။

ယနေ့ (ဇွန်လ ၂၉ ရက်) နံနက် ၁၀ နာရီကျော်တွင် ရပ်စောက်မြို့နယ်အတွင်းရှိ ပင်ဖြစ် (ပၢင်ၽိုၼ်း) ကျေးရွာအုပ်စုအနီး ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) နှင့် သျှမ်းပြည် ပြန်လည်ထူထောင်ရေးကောင်စ/ သျှမ်းပြည်တပ်မတော် (RCSS/SSA) တို့ နှစ်ဘက်တပ်ဖွဲ့ အချင်းချင်း ထိတွေ့ပစ်ခတ်မှု ဖြစ်ပွားခဲ့ကြောင်း ရပ်စောက်ဒေသခံများက ပြောသည်။

“အစိမ်းနဲ့ အကြားနဲ့ ရပ်စောက်မြို့ မြောက်ဘက်မှာ တိုက်ပွဲဖြစ်နေကြတာ၊ မနက်က တစ်ခါတွယ်ကြတယ်။ ဒီညပိုင်းလည်း အသံထပ်ကြားသေးတယ်။ မြို့မြောက်ဘက်က ပင်ဖြစ်ရွာဘက်မှာ ပစ်ခတ်ကြတာ၊ အဲ့ဘက်တော့ သေနတ်သံ ဒီနေ့စကြားရတာပဲ”ဟု ရပ်စောက်မြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အလားတူ ဇွန်လ ၂၄ ရက်၌ ရပ်စောက်မြို့နယ် မိုင်းပျဉ်းကျေးရွာအုပ်စုတွင် SSPP နှင့် RCSS တို့ တိုက်ပွဲဖြစ်ပွားခဲ့ပြီး ဇွန်လ ၂၅ ရက်နေ့ကလည်း နမ့်ဟူး၊ နမ့်လင်းနှင့် ရပ်စောက်မြို့အရှေ့ဘက် တောင်ကြောများအထိ တိုက်ပွဲဆက်လက်ဖြစ်ပွားခဲ့ကြောင်း ဒေသခံများထံမှ သိရသည်။

ရပ်စောက်မြို့နယ်အတွင်း ဖြစ်ပွားနေသည့် RCSS နှင့် SSPP တို့ သျှမ်းတပ်မတော် အချင်းချင်းတိုက်ပွဲသည် ယခုဇွန်လ မကုန်ခင်အထိ ၁၀ ကြိမ်ထက်နည်း ဖြစ်ပွားခဲ့ပြီးဖြစ်ကြောင်း သိရသည်။

ထို့အပြင် ဇွန်လ (၁၉) ရက်တွင် ဟိုပုံးမြို့နယ် မိုင်းပျဉ်းကျေးရွာရှိ ရွာစဉ်အနီး လက်လုပ်မိုင်း ‌ပေါက်ကွဲခဲ့ရာ ကျေးရွာအတွင်းရှိ အရပ်သားပြည်သူများကို SSPP တပ်ဖွဲ့မှ ဖမ်းဆီးခေါ်ဆောင်သွားခဲ့ရာ အချို့ကို ဇွန်လ (၂၁) ရက်တွင် ပြန်လွှတ်ပေးခဲ့သော်လည်း အမျိုးသမီး တစ်ဦးအပါအဝင် (၇) ဦးကို လက်ရှိအချိန်ထိ ပြန်မလွှတ်ပေးသေးကြောင်း ဒေသခံများက ပြောဆိုနေကြသော်လည်း သျှမ်းသံတော်ဆင့်အနေဖြင့် သီးခြားအတည်ပြုနိုင်ရန် ဆက်လက်စုံစမ်းနေသည်။

လက်ရှိတွင် SSPP နှင့် RCSS တပ်ဖွဲ့တို့သည် ရပ်စောက်မြို့နယ်အတွင်းရှိ အင်တောမြို့၊ ကျိုင်းခမ်း၊ နောင်လုံ၊ ကျောက်ဂူကျေးရွာအုပ်စု အနီးတဝိုက်တွင် နှစ်ဘက်တင်းမာမှု ဖြစ်ပေါ်လျက်ရှိပြီး မကြာခဏ မိုင်းဆွဲတိုက်ခိုက်ခြင်းများ (၅) ကြိမ်ထက်မနည်း ဖြစ်ပွားခဲ့ကာ အရပ်သားထိခိုက်ဒဏ်ရာရမှုများ ရှိနေကြောင်း ဒေသခံများက ပြောသည်။