သျှမ်းပြည်တောင်ပိုင်း၊ ရပ်စောက်မြို့နယ်မှ ကျေးရွာများတွင် အုပ်ချုပ်ရေးမှူးလုပ်မည့်သူများ မရှိသောကြောင့် မဲနှိုက်ပြီး ရွေးချယ်နေရကြောင်း သတင်းရရှိသည်။
အာဏာသိမ်းပြီးနောက်ပိုင်း ရပ်စောက်မြို့နယ်တွင် အုပ်ချုပ်ရေးမှူးများကို တော်လှန်ရေးအင်အားစုဘက်မှ စစ်တပ်သတင်းပေး ခေါင်းစဉ်ဖြင့် သတ်ဖြတ်ခြင်း၊ စစ်တပ်ဘက်မှလည်း တော်လှန်ရေးအင်အားစုနှင့် အဆက်အသွယ်ရှိသည်ဟု ဆိုကာ ရိုက်နှက် ဖမ်းဆီးမှုများ ပြုလုပ်ကြသည်။
ထိုသို့ အပြန်အလှန် လူသတ်မှုများကြားမှ ကျေးရွာအုပ်ချုပ်ရေးမှူးများသည် နည်းအမျိုးမျိုးဖြင့် ရှောင်ထွက်ကြပြီး အုပ်ချုပ်ရေးမှုးရာထူးမှတ် နုတ်ထွက်လာကြသောကြောင့် ကျေးရွာအတွင်း မဲနှိုက်စနစ်ဖြင့် ရွေးချယ်လာရကြောင်း ရပ်စောက်ဒေသခံ အသက် ၄၀ကျော် အမျိုးသားတစ်ဉီးက သျှမ်းသံတော်ဆင့်ကိုပြောသည်။
“အရင်ကလုပ်ခဲ့တဲ့ ကျေးရွာအုပ်ချုပ်ရေးမှူးတွေက နုတ်ထွက်သွားကြတယ်၊ တချို့ကျတော့လည်း ဘုန်းကြီးဝတ်သွားကြတယ်၊ တစ်ခုခုဆို အုပ်ချုပ်ရေးမှူးကိုပဲ အရင်မေးတာ စစ်တပ်ဆိုလည်း ခေါ်ရိုက် ဖမ်းတာတို့ လုပ်တယ်၊ အုပ်ချုပ်ရေးမှူးအချို့လည်း အသတ်ခံရတာတို့ ရှိတော့ မလုပ်ရဲတော့ဘူး၊ ရွာမှာ အုပ်ချုပ်ရေးမှူးကလည်း မရှိလို့မရဆိုတော့ မဲနှိုက်ပြီးပဲ ရွေးလိုက်တော့တယ်။”ဟု ၎င်းအမျိုးသားက ဆိုသည်။
ထို့အပြင် ရပ်စောက်မြို့နယ် ကျေးရွာအများစုတွင် စစ်ကော်မရှင်တပ်ကို စစ်မှုထမ်းကြေးဟု ဆိုကာ အခွန်ငွေကျပ် (၃)သိန်းပေးဆောင်နေရသောကြောင့် ဒေသခံများက ကြွေးမြီးများ တိုးလာနေကြောင်း ၎င်း အမျိုးသားက ဆက်ပြောသည်။
မဲနှိုက်ရွေးချယ်ထားသော အုပ်ချုပ်ရေးမှူးများသည် ကျေးရွာအလိုက် သတ်မှတ်သော လုပ်သက်နှစ် မတူညီကြောင်းနှင့် အချို့သော ကျေးရွာများတွင် (၂)နှစ်တိတိ တာဝန်ထမ်းဆောင် ရမည်ဖြစ်ကြောင်း သိရသည်။
“အခုက တော်တော်လေးကို အကျပ်ရိုက်တယ်။ အုပ်ချုပ်ရေးမှူးလုပ်ရရင်ပိုဆိုးပေါ့။ အသတ်ခံရတာ။ ရိုက်ခံရတာရှိတော့ ဘယ်သူမှ မလုပ်ချင်ကြဘူး။ နောက်ဆိုရင် အုပ်ချုပ်ရေးမှူးအတွက် လူတောင် ဝယ်ရမှာလားပဲ” ဟု ရပ်စောက် ဒေသခံ လူငယ်တစ်ဉီးကပြောသည်။
လက်ရှိ ရပ်စောက်မြို့နယ်အတွင်း စစ်ကော်မရှင်တပ်၊ ပအိုဝ်းပြည်သူ့စစ် (PNO) ၊ ရှမ်းပြည် တိုးတက်ရေးပါတီ/ ရှမ်းပြည်တပ်မတော် (SSPP/SSA)၊ သျှမ်းပြည် ပြန်လည်ထူထောင်ရေး ကောင်စီ/ သျှမ်းပြည်တပ်မတော် (RCSS/SSA) နှင့် ဓနုပြည်သူ့လွတ်မြောက်ရေးတပ်ဦး (DPLF/DPLA) တပ်ဖွဲ့တို့ သွားလာလှုပ်ရှားနေကြကြောင်း ဒေသခံများထံမှ သိရသည်။
Leave a Comments