သျှမ်းပြည်တောင်ပိုင်း၊ ပင်လောင်းမြို့နယ် မြောက်ထီဗွာအုပ်စု လုံင်းလောင်းပေ ကျေးရွာနေထိုင်သူများသည် အခြားဒေသသို့ သွားရောက်အလုပ်လုပ်လျှင် အုပ်ချုပ်ရေးမှူးထံ အခွန်ပေးဆောင်ရကြောင်း သတင်းရရှိသည်။
လက်ရှိ ပင်လောင်းမြို့နယ် အပါအဝင် မြန်မာနိုင်ငံတဝှမ်း စစ်ရေးပဋိပက္ခနှင့် စီးပွားရေးလည်း ကျဆင်းမှုကြောင့် လူငယ်အများအပြား ထိုင်းနိုင်ငံ သို့ ထွက်ခွာအလုပ်လုပ်ကြသည့်အပြင် အခြားဒေသသို့ ဝမ်းရေးအတွက် ရွှေ့ပြောင်းလုပ်ကိုင်နေကြရသည်။
အလားတူ ပင်လောင်းမြို့နယ် မြောက်ထီဗွာအုပ်စု လုံင်းလောင်းပေ ကျေးရွာသည်လည်း ယခင်ကဲ့သို့ စိုက်ပျိုးရေး လုပ်ငန်းများလုပ်ကိုင်ရသည်မှာ အဆင်မပြေမှုနှင့် စစ်ကော်မရှင်တပ်၊ပအိုဝ်းပြည်သူ့စစ် (PNO)တို့ စစ်သားစုဆောင်းမှုများကြောင့် လူငယ်အများစု အခြားသို့ပြောင်းရွှေ့လုပ်ကိုင်နေကြရသည်။
ထိုသို့ အခြားသို့ပြောင်းရွှေ့လုပ်ကိုင်သူများကို (၆)လလျှင်တစ်ကြီမ် ကျေးရွာအတွက် ငွေကျပ်တသိန်းခွဲ အခွန်ဆောင်ရပြီး၊ မိသားစုလိုက် ပြောင်းရွှေ့လုပ်ကိုင်လျှင် တစ်ဉီးလျှင် ငွေကျပ် နှစ်သိန်းစီ ပေးဆောင်ရမည်ဟုလည်း ကျေးရွာအုပ်ချုပ်ရေးမှူးက ၂၀၂၅ခုနစ် ဇူလိုင် ၂၃ရက်တွင် ထုတ်ပြန်ချက်ခဲ့သည်။
“အခုတော့ တစ်ကြိမ်ထည့်လိုက်ရပြီ၊ တချို့ မိသားစုလိုက် ပြည်ပထွက် အလုပ်လုပ်ကြတာ သူတို့ဆို တစ်ယောက် ကျပ်နှစ်သိန်းပေးရတယ်၊ ငါးယောက်ရှိရင် ဆယ်သိန်းပေါ့၊ ပြည်ပထွက်လာရတာလည်း အလုပ်က အဆင်မပြေဘူး ဒီဖက်မှာလည်း ငတ်လိုက်ပြတ်လိုက်နဲ့ အဆင်ပြေအောင် မနည်းရုန်းကန်နေရတာ၊ ရွာကလည်း ဒီလို အခွန်တွေ ကောက်တော့ စားဖို့ထက် သူတို့အခွန် အရင်ပေးနေရတယ်။”ဟု ဒေသခံ အသက်(၃၀)ကျော် အမျိုးသားတစ်ဦးက ပြောသည်။
ထို့အပြင် ပြည်တွင်း၊ ပြည်ပရှိ မည်သည့်နေရာသို့ ငွေရှာထွက်နေပြီး မည်သည့် အလုပ်လုပ်ကိုင်နေကြောင်းကို သက်ဆိုင်ရာ ပုဂ္ဂိုလ်ထံသို့ အကြောင်းကြားပေးရမည် ဖြစ်ကြောင်း ထုတ်ပြန်ချက်တွင် ဖော်ပြထားသည်။
ထိုသို့ ကျေးရွာမှ ငွေရှာထွက်သူများကို အခွန်ဆောင်ခိုင်သည့် ငွေများကို မည်သည့်နေရာတွင် အသုံးပြုနေသည်ကို မသိရကြောင်းနှင့် ပြည်ပထွက် အလုပ်လုပ်ကိုင်သူများကို မတရားအနိုင်ကျင့်နေသည်သာ ဖြစ်ကြောင်း ထိုင်းနိုင်ငံသို့ အလုပ်ထွက်လုပ်နေသူ ဒေသခံ အမျိုးသားက ပြောသည်။
“ပိုက်ဆံမရှိလို့ ပိုက်ဆံထွက်ရှာပါတယ်ဆိုမှ ပိုက်ဆံရှာထွက်လို့ အခွန်ကောက်တယ်ဆိုကတည်းက ကြားလို့မှ မကောင်းဘူး၊ ပိုက်ဆံရှာထွက်လို့ ရှာမရရင်ကော ရွာက ပေးမှာမလို့လား မပေးဘူးလေ စားစရာမရှိလို့ သက်သက် အနိုင်ကျင့်တာ ရွာထဲမှာပဲ အငတ်နေခိုင်းတာလား စဉ်းစားလို့မရနေ။ဘာရည်ရွယ်ချက်နဲ့ ကောက်တာလဲ မသိဘူး။”ဟု အဆိုပါ ပြည်ပတွင် အလုပ်လုပ်ကိုင်နေသူ မျိုးသားက ပြောသည်။
ငွေကောက်ရန်အတွက် ခေါင်းစဉ်တစ်ခုတပ်ခြင်းသာ ဖြစ်နိုင်ကြောင်းနှင့် ပြည်ပတွင် အလုပ်လုပ်နေသူများလည်း အဆင်ပြေသူ အနည်းငယ်သာရှိသောကြောင့် အခွန်ကောက်ခံမှု လျော့ပေးစေလိုကြောင်း ၎င်းအမျိုးသားက ဆက်ပြောသည်။
အလားတူ ပြီးခဲ့သည့် ၂၀၂၄ ခုနှစ်မှစ၍ ယခု ၂၀၂၆ ခုနှစ်အထိ ပင်လောင်းမြို့နယ်တွင် စစ်ကော်မရှင်တပ်နှင့် ပအိုဝ်းပြည်သူ့စစ်( PNO) အတွက် လစဉ် ငွေကျပ် တစ်သိန်းနီးပါး အခွန်ဆောင်နေရကြောင်း သိရသည်။
Leave a Comments