သျှမ်းပြည်တောင်ပိုင်း ဟိုပုံးမြို့နယ်၊ ဆီဆိုင်မြို့နယ်နှင့် နမ့်စန်မြို့နယ်တို့တွင် ရွေးကောက်ပွဲ နီးလာသည်နှင့်အမျှ စစ်ကော်မရှင် လက်အောက်ခံ ကျေးရွာအုပ်ချုပ်ရေးမှူးများက မဲမထည့်လျှင် နောက်ဆက်တွဲပြဿနာ တာဝန်မယူဟု ခြိမ်းခြောက်ပြောဆိုနေကြောင်း သတင်းရရှိသည်။

ယမန်နေ့ (ဒီဇင်ဘာလ ၂၃ ရက်)တွင် ဟိုပုံးမြို့နယ် စံဖူးကျေးရွာအုပ်စုတွင် ပအိုဝ်းအမျိုးသားအဖွဲ့ချုပ် PNO ပါတီမှ ကိုယ်စားလှယ်လောင်းများ မဲဆွယ်စည်းရုံးရေး ပြုလုပ်ခဲ့ရာ PNO/ PNA နှင့် နီးစပ်သူ ရွာသူကြီး၊ ဆယ်အိမ်ခေါင်းများက မဲမထည့်သူများ၏ နောက်ဆက်တွဲ ကိစ္စရပ်များကို တာဝန်ယူပေးမည် မဟုတ်သောကြောင့် မဲထည့်ကြရန် ဖိအားပေး ပြောဆိုခဲ့ကြောင်း ဒေသခံများက ပြောသည်။

“မဲစာရင်းက အိမ်ထောင်စုဇယားနဲ့ တိုက်စစ်မှာဆိုတော့ မထည့်လို့ မရတော့ဘူး၊ မထည့်တဲ့သူဆိုလည်း သူတို့သိမှာပဲ။ တစ်ခုခု လုပ်ကြံခံရမှာလည်း ကြောက်တယ်၊ ထည့်ပြန်တော့လည်း စစ်တပ်ပဲ ပြန်အုပ်ချုပ်မှာ ဘာမှမထူးဘူး။ မဲထည့်တဲ့နေ့မှာ ဗုံးပေါက်တာတွေ ဖြစ်မှာလည်း စိုးရိမ်တယ်” ဟု ဟိုပုံးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထိုသို့ မဲဆွယ်စည်းရုံးရေး လာရောက်စဉ် PNO ပါတီကို မဲထည့်လျှင် ပြည်သူ့ငြိမ်းချမ်းရေးကို လုပ်ဆောင်ပေးမည်ဟု ပြောဆိုခဲ့ကြောင်းနှင့် မိမိလူမျိုးစုပါတီကိုသာလျှင် မဲပေးကြရန် စည်းရုံးပြောဆိုသွားကြောင်း ဟိုပုံးဒေသခံ ၎င်းအမျိုးသားက ဆက်ပြောသည်။

အလားတူ ဆီဆိုင်မြို့နယ်တွင်လည်း ဒီဇင်ဘာလ တတိယပတ်က ပအိုဝ်းအမျိုးသားအဖွဲ့ချုပ် PNO ပါတီက မဲဆွယ်စည်းရုံးရေး ဆင်းခဲ့ချိန်တွင် မိမိလူမျိုးပါတီကိုသာလျှင် မဲပေးရန် အလားတူ ပြောကြားခဲ့ကြောင်း သိရသည်။

ဆက်လက်ပြီး နမ့်စန်မြို့တွင်လည်း ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ၊ ရှမ်းနှင့် တိုင်းရင်းသားများ ဒီမိုကရက်တစ်ပါတီ (SNDP) တို့က မဲဆွယ်စည်းရုံးရေးများ ဆက်တိုက် လုပ်ဆောင်နေသော်လည်း ပြည်သူများ စိတ်ဝင်စားမှု နည်းပါးကြောင်း သိရသည်။

“နမ့်စန်မှာတော့ ကြံ့ခိုင်ရေးနဲ့ ကျားဖြူပါတီတို့ မဲဆွယ်တာ ပိုများတယ်။ ဒီဇင်ဘာ (၂၂)ရက်က ကျားဖြူပါတီက စည်းရုံးရေး ဟောပြောပွဲလုပ်တာ လမ်းမှာ ရဲတွေက ဆိုင်ကယ်ဦးထုပ်တွေ ဘာတွေ ကောက်စစ်တော့ လူတွေက မလာရဲတော့ဘူး။ အဲဒါနဲ့ လက်ကမ်းစာစောင်ပဲ လိုက်ဝေခဲ့ရတယ်။ ဖိအားပေးတာမျိုးတော့ မရှိဘူး၊ ပြည်သူတွေက စိတ်မဝင်စားကြတာ များတယ်” ဟု နမ့်စန်မြို့ဒေသခံ အမျိုးသားတစ်ဦးက ပြောသည်။

နမ့်စန်မြို့နှင့် ခိုလမ်မြို့ အပါအဝင် ရပ်ကွက် (၁၁)ခုနှင့် ကျေးရွာအုပ်စု (၂၀) တို့တွင် ရွေးကောက်ပွဲ၌ ဆန္ဒမဲပေးပိုင်ခွင့်ရှိသူ စုစုပေါင်း ၈၇၄၉၁ ဦးရှိပြီး မဲရုံပေါင်း (၇၈) ရုံ ရှိကြောင်း မြို့နယ်ရွေးကောက်ပွဲ ကော်မရှင်အဖွဲ့ခွဲမှ ထုတ်ပြန်ထားသည်။

ပြီးခဲ့သည့် ဒီဇင်ဘာလ ၁၃ ရက်တွင် ညောင်ရွှေမြို့မ မင်္ဂလာဈေးတွင် ရွေးကောက်ပွဲ လက်ကမ်းစာစောင်များကို စစ်ကော်မရှင် လက်အောက်ခံ ရဲနှင့် ဝန်ထမ်းများက ယူနီဖောင်းအပြည့် ဝတ်ဆင်လာ၍ လိုက်လံဖြန့်ဝေခဲ့ပြီး ပြည်သူများ စိတ်ဝင်စားသူ နည်းပါးကြောင်း သိရသည်။

လာမည့် ဒီဇင်ဘာလ ၂၈ ရက်တွင် ကျင်းပပြုလုပ်မည့် စစ်ကော်မရှင်၏ ရွေးကောက်ပွဲ ပထမပိုင်းကို သျှမ်းပြည်အတွင်း ပင်းတယ၊ ဟိုပုံး၊ နောင်ချို၊ ကျိုင်းတုံ၊ တာချီလိတ်၊ တောင်ကြီး၊ နမ့်စန်၊ မူဆယ်၊ မိုင်းဆတ်၊ လားရှိုး၊ လင်းခေးနှင့် လွိုင်လင် ( ၁၂) မြို့နယ်တွင် ကျင်းပပြုလုပ်သွားမည်ဖြစ်ကြောင်း ကြေညာထားသည်။