သျှမ်းပြည် ရပ်စောက်မြို့နယ်တွင် သျှမ်းပြည်ပြန်လည်ထူထောင်ရေးကောင်စီ RCSS နှင့် ရှမ်းပြည်တိုးတက်ရေးပါတီ SSPP တို့ တိုက်ပွဲဆက်ဖြစ်နေကြောင်း စုံစမ်းသိရသည်။
ယမန်နေ့ ဇွန်လ ၂၄ ရက် နံနက် ၈ နာရီအချိန်မှစ၍ ရပ်စောက်မြို့နယ် မိုင်းပျဉ်းကျေးရွာအုပ်စုအတွင်း RCSS နှင့် SSPP တို့ တိုက်ပွဲထပ်မံဖြစ်ပွားခဲ့ခြင်း ဖြစ်သည်။
“ဟုတ်တယ်။ သူတို့အချင်းချင်း တိုက်ပွဲထပ်ဖြစ်ပြန်ပြီဗျာ။ မနေ့ညကလည်း မြို့ရဲ့အရှေ့ဘက် တောင်တန်းတကြောမှာ လက်နက်ကြီး၊ လက်နက်ငယ်ပစ်ခတ်သံတွေ အဆက်မပြတ်ကြားနေရတယ်” ဟု ရပ်စောက်မြို့ဒေသခံ အမျိုးသားတစ်ဦးကပြောသည်။
RCSS နှင့် SSPP တို့ တိုက်ပွဲသည် ရပ်စဲသွားခြင်းမရှိဘဲ ယနေ့ (ဇွန်လ ၂၅) ရက် မွန်းလွှဲပိုင်း ၂ ဝန်းကျင်မှစ၍ ရပ်စောက်မြို့နယ် နမ့်ဟူး၊ နမ့်လင်းနှင့် မြို့ရဲ့ အရှေ့ဘက် တောင်တကြောအထိ တိုက်ပွဲဆက်ဖြစ်နေသည်ဟု ရပ်စောက်မြို့ ဒေသခံအမျိုးသမီးတစ်ဦးက ဆက်ပြောသည်။
“မနေ့ကလည်း တိုက်ပွဲဖြစ်တယ်။ ဒီနေ့ နေ့လည် ၂ နာရီလောက်ကလည်း တိုက်ပွဲဆက်ဖြစ်တယ်။ နမ့်ဟူး၊ နမ့်လင်းနဲ့ အရှေ့ဘက် တောင်တကြောမှာ ဒီနေ့ထိ လက်နက်သံတွေကြားနေရတယ်” ဟု ၎င်းကပြောသည်။
ရပ်စောက်မြို့နယ်အတွင်း ဖြစ်ပွားနေသည့် RCSS နှင့် SSPP တို့ သျှမ်းတပ်မတော်အချင်းချင်းတိုက်ပွဲသည် ယခုဇွန်လပိုင်းမကုန်ခင် ၂၅ ရက်နေ့အထိ ၅ ကြိမ်တိုင် ဖြစ်ပွားခဲ့ပြီဟု သိရသည်။
အလားတူ ယမန်နေ့ ဇွန်လ ၂၄ ရက် ညနေပိုင်းတွင်လည်း ရပ်စောက်မြို့နယ် ဘုရားကုန်းရွာ၏ မြောက်ဘက်ရှိ တံတားပေါ်၌ အမျိုးသား ၆ ဦး မိုင်းနင်းမိပြီး ၂ ဦးပွဲချင်းသေဆုံးကာ ၄ ဦးဒဏ်ရာရရှိခဲ့ကြောင်း သိရသည်။
သို့သော် မိုင်းနင်းမိပြီး ထိခိုက်သေဆုံးသည့် ကိစ္စနှင့်ပတ်သက်ပြီး သျှမ်းသံတော်ဆင့်အနေဖြင့် ဆက်လက်စုံစမ်းနေသေးသည်။
Leave a Comments