သျှမ်းပြည် ပင်လောင်းမြို့နယ် နန်းတုတ်ကျေးရွာအုပ်စု လွယ်ကျိုင်းကျေးရွာရှိ ဘုန်းကြီးကျောင်းအတွင်းသို့ ပအိုဝ်းအမျိုးသား လွတ်မြောက်ရေးတပ်မတော် PNLA နှင့် ပြည်သူ့ကာကွယ်ရေးတပ် PDF တို့ လက်နက်ကြီး ပစ်ခတ်မှုကြောင့် ကျောင်းထိုင်ဆရာတော်တစ်ပါး ပျံလွန်တော်မှုသွားသည်ဟု သတင်းအမှားဖြန့်ချိနေသည်။

စစ်ကောင်စီ လက်အောက်ခံ မီဒီယာတစ်ခုဖြစ်သည့် People Media မှ “ရှမ်းပြည်နယ်တောင်ပိုင်း၊ ပင်လောင်းမြို့နယ်၊နန်းတုတ်ကျေးရွာအုပ်စု၊လွယ်ကျိုင်းကျေးရွာရှိ ဘုန်းကြီးကျောင်းအတွင်းသို့ စစ်သွေးကြွ PNLO နှင့် ကယား PDF အဖွဲ့များမှ လက်နက်ကြီးဖြင့် ပစ်ခတ်မှုကြောင့် ကျောင်းထိုင်ဆရာတော် ပျံလွန်တော်မှု သွားကြောင်း ဒေသခံများက ဆက်သွယ်ပြောဆိုသည်” ဟုဆိုကာ ပျံလွန်တော်မှုသွားသည့် ဆရာရုပ်ပုံနှင့်အတူ ဖြန့်ချိထားသည်။

ထိုဝါဒဖြန့်ပိုစ့်ကို ကြည့်ရှု့သူပေါင်း ၅ သောင်းကျော်ရှိပြီး၊ အခြား ဝါဒဖြန့်တယ်လီဂရမ်တွင်လည်း ထပ်ဆင့်ဖြန့်ချိထားသည်။
မူရင်းလင့်ခ် – https://archive.ph/EEAJz

သျှမ်းသံတော်ဆင့် အချက်အလက် စစ်ဆေးသူများအနေဖြင့် အဆိုပါအကြောင်းအရာကို စစ်ဆေးမှုပြုလုပ်ခဲ့သည်။

ဒေသအတွင်း မီဒီယာနှင့် အခြားမီဒီယာများ၏ ဖော်ပြချက်အရ ပင်လောင်းမြို့နယ် နန်းတုတ်ကျေးရွာအုပ်စု လွယ်ကျိုင်းကျေးရွာရှိ ဘုန်းကြီးကျောင်းအတွင်းသို့ စစ်ကောင်စီက ဒရုန်းဖြင့်ဗုံးကြဲခဲ့ကြောင်း ရေးသားဖော်ပြထားသည်။

မူရင်းလင့်ခ် – https://shorturl.at/nJZro

စစ်ကောင်စီက ဘုန်းကြီးကျောင်းကို ဒရုန်းဖြင့် ၂ ကြိမ်ဗုံးကြခဲ့ခြင်းဖြစ်ပြီး၊ ဒုတိယတစ်ကြိမ် ဗုံးကြဲမှုတွင် ဦးဇင်းအရှင်နေမိန္တ (လောဝ်ခမ်း)အား ကျည်စထိမှန်ပြီး ပျံလွန်တော်မှုသွားကြောင်း မျက်မြင်တွေ့ရှိသူ အသက် ၃၀ ကျော် အမျိုးသားတစ်ဦးက သျှမ်းသံတော်ဆင့်ကို ပြောသည်။

“စစ်ကောင်စီက ဒရုန်းနဲ့လာကြဲတာပါ။ ဝေဟင်မှာဒရုန်းပျံပြီးတော့ ဘုန်းကြီးကျောင်းကိုလာကြဲတာ။ ပထမတစ်ကြိမ်တုန်းကတော့ သံဃာနားနေဆောင်ရဲ့ မြောက်ဘက်ကိုကျတယ်။ ကျနော်တို့လည်း လန့်ပြီးထလာကြတာ။ ဒုတိယတစ်ကြိမ်ထပ်ကြဲလိုက်တာ ငြမ်းကိုလာထိပြီး ကျည်စက ဦးဇင်းကိုလာမှန်တာ။ ဦးဇင်းက ပြတင်းပေါက်ကို ပိတ်ဖို့လုပ်နေတဲ့အချိန်မှာလာထိတာ” ဟု ၎င်းကပြောသည်။

အလားတူ လွယ်ကျိုင်းဘုန်းကြီးကျောင်းမှ ကလေးအပါအဝင် စစ်ဘေးရှောင် အမျိုးသမီး ၂ ဦးနှင့် အမျိုသား ၃ ဦး စုစုပေါင်း ၅ ဦးလည်း ကျည်စထိမှန်ကာ ပြင်းထန်ဒဏ်ရာရရှိခဲ့ကြောင်း ဆိုသည်။

သျှမ်းသံတော်ဆင့်မှ ဖော်ပြထားသတင်းအားဖတ်ရန် လင့်ခ် – https://shorturl.at/WXulU

ထို့အပြင် ပင်လောင်းမြို့နယ် လွယ်ကျိုင်းဘုန်းကြီးကျောင်းအတွင်း ပအိုဝ်းအမျိုးသား လွတ်မြောက်ရေးတပ်မတော် PNLA ဘက်က လက်နက်ကြီးပစ်ခတ်ခဲ့သည်ဟု စစ်ကောင်စီ၏ စွပ်စွဲအပေါ် မဟုတ်မမှန်ကြောင်း PNLA ပြန်ကြားရေးတာဝန်ရှိသူ ခွန်ရိန်းယံက သျှမ်းသံတော်ဆင့်ကိုပြောသည်။

“သတင်းအမှားတွေ ဖြန့်ထားနေတာပဲဖြစ်ပါတယ်။ အဲ့ဒီကျေးရွာမှာ ကျနော်တို့မရှိပါဘူး။ ကျနော်တို့ တိုက်ပွဲဝင် နေတာလည်း အဲ့ဘက်မှာမရှိပါဘူး။ အဲ့ဒီဖြစ်စဉ်ကို ကျနော်တို့သိရှိတာက ဒီစစ်ကောင်စီနဲ့ လက်အောက်ခံ PNO က လက်နက်ကြီးတွေ၊ ဒရုန်းတွေနဲ့ ဘုန်းကြီးကျောင်းကိုပစ်တာပါ။ ပြီးတော့ အဲ့ကျောင်းထိုင်ဆရာတော်တစ်ပါး ပျံလွန်တော်မှုသွားတယ်လို့ ကျနော်တို့သိရတယ်။ ဒါတွေက စစ်ကောင်စီနဲ့ပြည်သူ့စစ်တွေ လုပ်နေကျ လုပ်ရက်တွေပဲဖြစ်ပါတယ်။ ” ဟု ခွန်ရိန်းယံကပြောသည်။

စစ်ကောင်စီက ဆရာတော်၊ သံဃာတော်များမကျန် ပြည်သူလုထုမျာအားဗုံးကြဲတိုက်ခိုက်သတ်ဖြတ်ပြီးမှ ပြည်သူ့ကာကွယ်ရေးတပ် PDF နှင့် တော်လှန်းရေးတပ်ဖွဲ့များက လုပ်သည်ဟုဆိုကာ သတင်းအမှားများဖြန့်ချိနေလျက်ရှိကြောင်း ခွန်ရိန်းယံက ထပ်လောင်းပြောသည်။

ပြီးခဲ့သည့် ဇွန်လ ၁၉ ရက်တွင်လည်း ပဲခူးမြို့၏ အထင်ကရစာသင်တိုက်၊ ဝင်းနိမ္မိတာရံကျောင်းတိုက်၏ ပဓာနာယကဆရာတော် ဘဒ္ဒန္တမုနိန္ဒာဘိဝံသသည် လမ်းမှာစစ်ကောင်စီ၏ ပစ်သတ်ခြင်းခံရပြီး ပျံလွန်တော်မှုသွားခဲ့သည်။

ထိုသတင်းအား ပျံ့နှံ့သွားပြီးသည့်နောက် စစ်ကောင်စီနှင့် ဝါဒဖြန့်ချယ်နယ်များက ပြည်သူ့ကာကွယ်ရေးတပ် PDF ကပစ်ခတ်ခဲ့သည်ဟု စွပ်စွဲခဲ့သည်။

ဖြစ်ရပ်မှန်ကို ကန်သုံးဆင့်ကျောင်း ဆရာတော်ဘဒ္ဒန္တဂုဏိကာဘိဝံသက ပြန်လည်ရှင်းပြထားသည်၊ BBC သတင်းတစ်ပုဒ်တွင် ဖော်ပြထားသည်။

မူရင်းလင့်ခ် – https://shorturl.at/yB13N

သျှမ်းသံတော်ဆင့် စာဖတ်ပရိတ်သတ်များအနေဖြင့် လူမှုကွန်ရက် စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲ စိတ်ချရသော သတင်းမီဒီများသို့ သွားရောက်ဖတ်ရှု့ကြရန် တိုက်တွန်းပါသည်။

သတင်းတု၊ သတင်းမှားဟု ယူဆရသည့် သတင်းများကိုလည်း သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook Chat Boxမှဆစ်ဆင့် သတင်း၏ လင့်ခ် (သို့မဟုတ်) Screen Short ပုံပေးပို့ခြင်းဖြင့် စစ်ဆေးနိုင်သည်။