သျှမ်းပြည် ကျောက်မဲနှင့် မိုးကုတ်မြို့နယ်အစပ်တွင် စစ်ကောင်စီတပ်မှ လေကြောင်းဗုံးကြဲ တိုက်ခိုက်မှုကြောင့် အရပ်သားတစ်ဦး သေဆုံးပြီး ကလေးတစ်ဦး အပါအဝင် ၃ ဦး ဒဏ်ရာရခဲ့ကြောင်း စုံစမ်းသိရသည်။
ယမန်နေ့ (ဇွန်လ ၁၉ ရက်) နေ့လယ် ၃ နာရီခွဲခန့်တွင် ကျောက်မဲနှင့် မိုးကုတ်မြို့နယ် အစပ်ရှိ တောင်နီကျေးရွာသို့ စစ်ကောင်စီတပ်မှ ဂျက်လေယာဉ်ဖြင့် ဗုံးကြဲတိုက်ခိုက်ခဲ့ခြင်းကြောင့် အရပ်သားတစ်ဦး သေဆုံးပြီး အသက်(၁၀)နှစ်အရွယ် ကလေးတစ်ဦး အပါအဝင် (၃) ဦး ဒဏ်ရာရခဲ့သည်။
အလားတူ ဇွန်လ ၁၉ ရက် တစ်ရက်တည်းတွင် နောင်ချိုမြို့နယ် ရွှေညောင်ပင်ရွာတွင် တပ်စွဲထားသည့် စစ်ကောင်စီတပ်မှ ဆမ္မဆယ်ကျေးရွာအနီးရှိ TNLA စခန်းချနေရာသို့ ဒရုန်းဖြင့် တိုက်ခိုက်ခဲ့ရာ TNLA တပ်သား (၂) ဦး အသက်ပေးလှူခဲ့ရကြောင်း TNLA သတင်းနှင့် ပြန်ကြားရေးက ထုတ်ပြန်သည်။
“လက်ရှိစစ်ကောင်စီက သျှမ်းမြောက်မှာ လက်နက်ကြီးတွေ ပစ်ကူနေတာမျိုး၊ အထူးသဖြင့် ကျမတို့ စစ်လှုပ်ရှားရာ ဒေသတွေမှာ လက်နက်ကြီးပစ်ကူတွေ၊ ဒရုန်းတွေနဲ့ ပစ်ခတ်တိုက်ခိုက်တာမျိုးတွေ ရှိတယ်။ အဲ့လိုတိုက်ခိုက်တဲ့အတွက်ကြောင့် ကျမတို့ဘက် ရဲဘော်တွေလည်း အသက်ဆုံးရှုံးမှုရှိသလို ထိခိုက်ဒဏ်ရာရမှုတွေလည်း ရှိပါတယ်”ဟု TNLA တပ်ဖွဲ့ သတင်းနှင့် ပြန်ကြားရေးဌာနမှူးက သျှမ်းသံတော်ဆင့်ကို ပြောသည်။
ကျောက်မဲနှင့် မိုးကုတ်မြို့နယ် အစပ်ရှိ တောင်နီကျေးရွာသို့ စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့စဉ် ပြည်သူနေအိမ် (၂) လုံး ထိခိုက်ပျက်စီးခဲ့ရကြောင်း သိရသည်။
ပြီးခဲ့သည့် ဇွန်လ ၁၈ ရက်ကလည်း နောင်ချိုမြို့နယ် အုမ္မတီးကျေးရွာတွင် တပ်စွဲထားသည့် စစ်ကောင်စီတပ်မှ ဆမ္မဆယ်ကျေးရွာအနီးရှိ TNLA စခန်းချနေရာသို့ ဒရုန်းဖြင့် တိုက်ခိုက်ခဲ့ရာ TNLA တပ်သား (၂) ဦး ကျဆုံးခဲ့ပြီး (၅) ဦး ထိခိုက်ဒဏ်ရာ ရရှိခဲ့ကြောင်း မြေပြင်သတင်းသိရှိသည့် နောင်ချိုဒေသခံများက ပြောသည်။
“နောက်တစ်ခုက စစ်ကောင်စီက အရပ်သားတွေကို ဦးတည်ပြီးတော့မှ တိုက်ခိုက်တာလည်း ဖြစ်ပါတယ်။ ဒီအပေါ်မှာ ဘယ်လိုတုန့်ပြန်သွားမလဲဆိုတာက ကျမလည်း မပြောတတ်ဘူး၊ ဒီဟာသည် အထက်က စီမံဆုံးဖြတ်ချက် ချမှပဲ ပြောလို့ရတဲ့အတွက်ကြောင့် အခုက ဘာမှလည်း ပြောလာတာ မရှိသေးပါဘူး”ဟု TNLA တပ်ဖွဲ့ သတင်းနှင့် ပြန်ကြားရေးဌာနမှူးက သျှမ်းသံတော်ဆင့်ကို ဆက်ပြောသည်။
နောင်ချိုမြို့နယ်တွင် TNLA စခန်းချနေရာများကို စစ်ကောင်စီတပ်မှ ဒရုန်းဖြင့် ဗုံးကြဲတိုက်ခိုက်မှုကြောင့် TNLA တပ်သားများ ထိခိုက်ကျဆုံးမှုသည် ၂ ရက်ဆက်တိုက် ဖြစ်လာကြောင်း ဒေသခံများထံမှ သိရသည်။
စစ်ကောင်စီတပ်သည် ဟိုင်ဂင်သဘောတူညီချက်ကို အကြိမ်ကြိမ် ချိုးဖောက်ကာ TNLA တပ်စခန်း တည်ရှိရာသို့ နေ့စဉ် ဒရုန်းနှင့် လက်နက်ကြီးပစ်ခတ်မှုများ ဆက်တိုက်ပြုလုပ်သည့်အပြင် TNLA တပ်ဖွဲ့က ထိန်းချုပ်ထားသည့် မြို့များသို့ ဆက်သွယ်ထားသည့် လမ်းကြောင်းများ ဖြတ်တောက်ခြင်း၊ ကုန်စည်စီးဆင်းမှု ကန့်သတ်ပိတ်ပင်ခြင်းများ ပြုလုပ်လျက်ရှိကြောင်း TNLA ဘက်မှ ထုတ်ပြန်ထားသည်။
Leave a Comments