သျှမ်းပြည် ရပ်စောက်မြို့နယ်တွင် ရှမ်းပြည်တိုးတက်ရေးပါတီ (SSPP/SSA) နှင့် သျှမ်းပြည် ပြန်လည်ထူထောင်ရေးကောင်စီ (RCSS/SSA) တို့အချင်းချင်း နှစ်ဘက်ထိတွေ့ ပစ်ခတ်မှုဖြစ်ပြီး၊ ပဒေသာမိုင်းကြောင့် အမျိုးသမီးတစ်ဦး အပါအဝင် နှစ်ဦးဒဏ်ရာရရှိခဲ့ကြောင်း စုံစမ်းသိရသည်။
ပြီးခဲ့သည့် ဇွန်လ (၁၆) ရက် နံနက် ၈ နာရီကျော်တွင် ရပ်စောက်မြို့နယ် ကျောက်ဂူတိုက်နယ်ရှိ တောင်ထိပ်ကျေးရွာအနီးတွင် ထိပ်တိုက်ထိတွေ့မှုဖြစ်ကာ အချင်းချင်း ပစ်ခတ်မှုဖြစ်ပွားခဲ့ပြီး နှစ်ဘက်တပ်သားများ ထိခိုက်ဒဏ်ရာရရှိခဲ့ကြောင်း ရပ်စောက်မြို့နယ် ကျောက်ဂူဒေသခံများက ပြောသည်။
“တိုက်ပွဲရယ်လို့ ပြောလို့ရမလား၊ အဲ့မှာ အပြန်အလှန် ပစ်တယ်လို့တော့ မဟုတ်ဘူး။ မိုင်းလာထောင်ထားတဲ့ နေရာမှာ ပစ်လိုက်တာ၊ တိုက်ပွဲအကြီးကြီး ဖြစ်တာတော့ မဟုတ်ဘူး။ တဂျုန်းဂျုန်း တဂြိမ်းဂြိမ်း ချနေတာလည်း မဟုတ်ဘူး” ဟု ကျောက်ဂူဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ရပ်စောက်မြို့နယ် SSPP နှင့် RCSS တပ်ဖွဲ့တို့၏ ထိတွေ့ပစ်ခတ်မှုအတွင်း နှစ်ဘက်တပ်ဖွဲ့မှ တပ်သားတစ်ဦးစီ ထိခိုက်ဒဏ်ရာ ရရှိခဲ့ကြောင်း မြေပြင်သတင်းသိရှိသည့် ဒေသခံများကပြောသည်။
ပြီးခဲ့သည့် ဇွန်လ ၁၆ ရက်တွင် ရပ်စောက်မြို့နယ်အတွင်း ဖြစ်ပွားခဲ့သည့် ထိတွေ့ပစ်ခတ်မှုနှင့် ပတ်သက်ပြီး RCSS တပ်ဖွဲ့မှ စစ်အင်အား ၈၀ ခန့်ဖြင့် စစ်ကြောင်းနှစ်ကြောင်း ခွဲပြီး တောင်ထိပ်ကျေးရွာနှင့် တောင်သူကုန်းအနီးရှိ SSPP တပ်စခန်းများကို ထိုးစစ်ဆင်လာခဲ့ရာ (၃၀) မိနစ်ခန့် ထိတွေ့တိုက်ပွဲဖြစ်ပွားခဲ့ကြောင်း SSPP Info မှ ဇွန်လ (၁၈) ရက်တွင် သတင်းထုတ်ပြန်ထားသည်။
ရပ်စောက်မြို့နယ်တွင် SSPP နှင့် RCSS တပ်ဖွဲ့တို့၏ ထိတွေ့ပစ်ခတ်မှု ပတ်သက်ပြီး SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်နှင့် RCSS ပြောရေးဆိုခွင့်ရှိသူ ဗိုလ်မှူးစိုင်းခမ်းစံ တို့ထံ သျှမ်းသံတော်ဆင့်မှ ဖုန်းဖြင့် ဆက်သွယ်မေးမြန်းရန် ကြိုးစားခဲ့သော်လည်း ဖုန်းလက်ခံဖြေကြားခြင်း မရှိခဲ့ပေ။
ထို့အပြင် ဇွန်လ ပထမပတ်အတွင်းကလည်း ရပ်စောက်မြို့နယ် တောင်ထိပ်ကျေးရွာ ကျောက်အိုးတံတားအနီးတွင် လှုပ်ရှားသွားလာနေသည့် SSPP စစ်ကြောင်းကို RCSS တပ်ဖွဲ့မှ ပဒေသာမိုင်းထောင် ဖောက်ခွဲခဲ့စဉ်အတွင်း တောင်ယာမှ ဆိုင်ကယ်ဖြင့် ပြန်လာသည့် အသက် ၂၉ နှစ်အရွယ် မကေသီဦး၏ ပေါင်ကို မိုင်းစ ထိမှန်ခဲ့ကြောင်း ဒေသခံများထံမှ သိရသည်။
လက်ရှိတွင် မိုင်းစ ထိမှန်ဒဏ်ရာ ရရှိခဲ့သည့် မကေသီဦးကို ကျောက်ဂူဆေးရုံမှတဆင့် တောင်ကြီးဆေးရုံသို့ လွှဲပြောင်းကာ ဆေးကုသမှု ခံယူနေရကြောင်း ကျောက်ဂူဒေသခံများက ပြောသည်။
“မိုင်းစ လာမှန်တာ အခုတိုက်ပွဲဖြစ်တဲ့ နေရာရဲ့ တောင်ဘက် ပေ ၂၀၀ လောက်မှာပဲ ကွာတယ်။ အဲ့ဒီကောင်မလေးက ယာတောက ပြန်လာတာ၊ မိုင်းဆွဲလိုက်တော့ မိုင်း ၂ ခါကွဲတာ။ မိုင်း (၁၀) လုံးလို့ ပြောတာ၊ တစ်ခါကွဲရင် ၅ လုံးပေါ့။ အဲ့တာ ပေါင်မှာ မိုင်းစမှန်တာ၊ ကျောက်ဂူဆေးရုံမှာ လာတင်တာ အခုတော့ တောင်ကြီးသွားခဲ့ပြီ”ဟု ကျောက်ဂူဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
အလားတူ ဇွန်လ ၁၃ ရက်ကလည်း ကျောက်ဂူတိုက်နယ်ရှိ လွယ်ကန်ကျေးရွာတွင် နေထိုင်ပြီး တောင်ယာသွားမည့် အသက်(၄၀) ကျော်အရွယ်ရှိ အမျိုးသားတစ်ဦးလည်း ကုန်ဟင်းရွာဟောင်းအနီး လက်ဖက်ခြံအရောက်တွင် မိုင်းနင်းမိကာ ဘယ်ခြေထောက်ပြတ် ဒဏ်ရာဖြင့် ကျောက်ဂူဆေးရုံတွင် ဆေးကုသမှု ခံယူနေရကြောင်း သိရသည်။
၂၀၂၄ မတ်လမှ စတင်ပြီး ရပ်စောက်မြို့နယ် ကျောက်ဂူတိုက်နယ်တွင် သျှမ်းတပ်နှစ်တပ်အကြား မကြာခဏ မိုင်းထောင်ထားပြီး မိုင်းဆွဲတိုက်ခိုက်ခြင်းများ (၅) ကြိမ်ထက်မနည်း ဖြစ်ပွားခဲ့ကြောင်းလည်း ဒေသခံများက ပြောသည်။
ယခုကဲ့သို့ သျှမ်းတပ်အချင်းချင်း မိုင်းထောင်တိုက်ခိုက်ပြီး ပစ်ခတ်မှုဖြစ်ပွားသည့် ဖြစ်စဉ်များနှင့် ပတ်သက်ပြီး SSPP တပ်ဖွဲ့မှ သျှမ်း/မြန်မာ ၂ ဘာသာဖြင့် ဇွန်လအတွင်း (၇) ကြိမ်အထိ သတင်းထုတ်ပြန်ထားသော်လည်း RCSS တပ်ဖွဲ့ဘက်မှ ယခုကိစ္စနှင့် ပတ်သက်၍ သတင်းထုတ်ပြန်ချက်ကို မတွေ့ရှိရသေးပါ။
ရပ်စောက်မြို့နယ်အတွင်း မိုင်းထောင်တိုက်ခိုက်ခံရမှုများ ဖြစ်ပွားလာခြင်းကြောင့် တောင်ထိပ်၊ လွယ်တန်၊ ဆီဆုံဂနိုင် စသည့် ကျေးရွာများမှ ပြည်သူများမှာ တောင်ယာသွားလာရန် စိုးရိမ်ထိတ်လန့်နေကြကြောင်း ဒေသခံများက ပြောသည်။
