စိုင်းခွမ်မိန်း၊ ၂၀၂၄ ဇွန်လ ၁၉ ရက်
သျှမ်းပြည် နောင်ချိုမြို့နယ်တွင် တအာင်း(ပလောင်) အမျိုးသားလွတ်မြောက်ရေး တပ်မတော် TNLA စခန်းချနေရာကို စစ်ကောင်စီတပ်က ဒရုန်းဖြင့် ဗုံးကြဲတိုက်ခိုက်ခဲ့ရာ TNLA တပ်သား ထိခိုက်ကျဆုံးမှု ရှိခဲ့ကြောင်း စုံစမ်းသိရသည်။
ယမန်နေ့ (ဇွန်လ ၁၈ ရက်) ညနေ ၃ နာရီကျော်ခန့်တွင် နောင်ချိုမြို့နယ် အုမ္မတီးလမ်းခွဲ၌ တပ်စွဲထားသည့် စစ်ကောင်စီတပ်က ဆမ္မဆယ်ကျေးရွာအနီးရှိ တအာင်း(ပလောင်) အမျိုးသားလွတ်မြောက်ရေး တပ်မတော် TNLA စခန်းချနေရာကို ဒရုန်းဖြင့် ဗုံးကြဲတိုက်ခိုက်ခဲ့ရာ TNLA တပ်သား ၂ ဦး ကျဆုံးပြီး ၅ ဦး ထိခိုက်ဒဏ်ရာ ရရှိခဲ့ကြောင်း နောင်ချိုဒေသခံများက ပြောသည်။
![](https://burmese.shannews.org/wp-content/uploads/2024/06/signal-2024-06-19-121732_003-1024x577.jpeg)
“မနေ့က ညနေ ၃ နာရီကျော်လောက်မှာ အုမ္မတီးလမ်းခွဲမှာ ရှိတဲ့ စစ်ကောင်စီတပ်ကနေ ဆမ္မဆယ်မှာရှိတဲ့ TNLA စခန်းချနေရာကို ဒရုန်းနဲ့ ဗုံးထပ်ပစ်တာ၊ အဲ့မှာ TNLA တပ်သားနှစ်ယောက် ဆုံးသွားပြီး ၅ ယောက် ဒဏ်ရာရတယ်။ အခုထက်ထိ နှစ်ဘက်တင်းမာနေတုန်းပဲ၊ စစ်ကောင်စီလက်နက်ကြီးကတော့ နေ့တိုင်းပစ်နေတယ်”ဟု မျက်မြင်တွေ့ရှိခဲ့သည့် နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
TNLA တပ်ဖွဲ့ဘက်မှလည်း နောင်ချိုမြို့နယ်တွင် စစ်ကောင်စီတပ်ဖွဲ့မှ ဒရုန်း (၂) စင်းဖြင့် ၎င်းတို့တပ်စခန်းရှိရာသို့ လာရောက်ဗုံးကြဲ တိုက်ခိုက်မှုကြောင့် TNLA တပ်ဖွဲ့ဝင် တစ်ဦး အသက်ပေးလှူခဲ့ရပြီး (၄) ဦး ဒဏ်ရာရရှိခဲ့ကြောင်း ယမန်နေ့ (ဇွန်လ ၁၈ ရက်) တွင် ထုတ်ပြန်သည်။
ယခုကဲ့သို့ စစ်ကောင်စီတပ်မှ ဒရုန်းဖြင့် ဗုံးကြဲတိုက်ခိုက်မှုကြောင့် TNLA တပ်သားများ ထိခိုက်ကျဆုံးခဲ့ရခြင်းနှင့် ပတ်သက်ပြီး မည်ကဲ့သို့ တုံ့ပြန်ဆောင်ရွက်သွားမည်ကို TNLA တပ်ဖွဲ့ ပြောရေးဆိုခွင့်ရှိသူထံ သျှမ်းသံတော်ဆင့်မှ ဆက်သွယ်မေးမြန်းခဲ့သော်လည်း ပြန်လည်ဖြေကြားခြင်း မရှိသေးပါ။
![](https://burmese.shannews.org/wp-content/uploads/2024/06/signal-2024-06-19-121732_005-768x1024.jpeg)
အလားတူ ဇွန်လ (၉) ရက်နေ့ကလည်း မိုးမိတ်မြို့နယ်ရှိ စစ်ကောင်စီတပ်မှ ပေါင် (၅၀၀) ဗုံး အသုံးပြု၍ မန်ပိန်းနှင့် ပန်တင်ရွာကြားတွင် လာရောက်ကြဲချခဲ့ရာ TNLA တပ်သား (၃) ဦး ထိခိုက်ဒဏ်ရာ ရရှိခဲ့ကြောင်း သိရသည်။
ထို့အပြင် ဇွန်လ (၁၆) ရက်နှင့် (၁၇) ရက်တို့တွင် နောင်ချိုမြို့နယ် ဘန့်ဘွေးနှင့် အုမ္မတီးလမ်းခွဲတွင် တပ်စွဲထားသည့် စစ်ကောင်စီတပ်မှ ဆမ္မဆယ်နှင့် သုံးဆယ်ရွာဘက်သို့ နေ့စဉ်နီးပါး လက်နက်ကြီး ပစ်ခတ်မှုအပြင် ဒရုန်းဖြင့် လာရောက်ဗုံးကြဲချမှုကြောင့် အမျိုးသမီးတစ်ဦး ခြေလက်ထိမှန် ဒဏ်ရာရပြီး ပြည်သူနေအိမ်များ ပျက်စီးခဲ့ကြောင်း နောင်ချိုဒေသခံများက ပြောသည်။
ဇွန်လ (၁) ရက်နေ့မှ (၁၆) ရက်အထိ မိုးမိတ်နှင့် နောင်ချိုမြို့နယ်တွင် စစ်ကောင်စီတပ်မှ ဒရုန်းဖြင့် ဗုံး(၄)လုံးနှင့် လက်နက်ကြီး(၄၂)ကြိမ်ထက်မနည်း ပစ်ခတ်ခဲ့သည်ဟု TNLA တပ်ဖွဲ့မှ ဇွန်လ (၁၇) ရက်တွင် ထုတ်ပြန်ထားသည်။
စစ်ကောင်စီတပ်သည် ဟိုင်ဂင်သဘောတူညီချက်ကို အကြိမ်ကြိမ် ချိုးဖောက်ပြီး TNLA တပ်ဖွဲ့ တည်ရှိရာကို နေ့စဉ်လက်နက်ကြီး ပစ်ခတ်မှုများ ဆက်တိုက်ပြုလုပ်လျှက်ရှိကြောင်း TNLA ဘက်မှ ပြောဆိုထားသည်။