သျှမ်းပြည် သိန္နီမြို့နယ်တွင် ခြံရှင်းနေသည့် အမျိုးသမီးတစ်ဦး မြေမြှုပ်မိုင်းနင်းမိပြီး ခြေထောက်နှစ်ဖက်ပြတ်ကာ သေဆုံးခဲ့ကြောင်း သတင်းရရှိသည်။
ပြီးခဲ့သည့် ဇွန်လ ၁၅ ရက် နေ့လည် ၁ နာရီခန့်တွင် သိန္နီမြို့နယ် ပန်စုံရွာအနီး စစ်ကောင်စီတပ်၏ ခလရ-၂၄၀ တပ်ရင်းရှေ့၌ အမျိုးသမီးတစ်ဦး နှမ်းကြဲရန်အတွက် ခြံရှင်းရာမှ မြေမြှုပ်မိုင်းနင်းမိပြီး ခြေထောက်နှစ်ဖက် ပြတ်သွားကာ သွေးထွက်လွန်၍ သေဆုံးခဲ့ရကြောင်း အသက် ၄၀ ဝန်းကျင် သိန္နီဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ထိတာကတော့ သူတစ်ယောက်ထဲထိတာ။ မိုင်းထိပြီး ခြေထောက် ၂ ဖက်လုံး ပြတ်သွားတယ်။ သူက နှမ်းစိုက်ဖို့ ခြံသွားရှင်းတာ၊ ခြံကလည်း တပ်အရှေ့မှာဆိုတော့ ရှင်းနေရင်းနဲ့ နင်းမိတာ” ဟု ၎င်းဒေသခံ အမျိုးသမီးက သျှမ်းသံတော်ဆင့်ကို ပြောသည်။
ထိုသေဆုံးသွားသည့် အမျိုးသမီးသည် သိန္နီမြို့နယ် ပိန်းဆာကျေးရွာအုပ်စုရှိ ပန်စုံကျေးရွာတွင် နေထိုင်သူဖြစ်ပြီး အသက် ၅၀ ကျော်အရွယ် ပါ့နန်းမြသန်း ဖြစ်ကြောင်း သိရသည်။
သိန္နီမြို့နယ်တွင် သုံးလအတွင်း မြေမြှုပ်မိုင်း ပေါက်ကွဲမှုကြောင့် ၃ ဦးသေဆုံးပြီး ၅ ဦးထက်မနည်း ထိခိုက်ဒဏ်ရာရရှိခဲ့ကြောင်း သိန္နီဒေသခံများက ပြောသည်။
“၁၀၂၇ စစ်ဆင်ရေး” အပစ်ရပ်ပြီးနောက် (၅) လနီးပါးအတွင်း သိန္နီမြို့မှ ဒေသခံအချို့မှာ နေရပ် ပြန်လာနိုင်ကြသော်လည်း မည်သည့်လက်နက်ကိုင် အဖွဲ့အစည်းများမှ နယ်မြေရှင်းလင်းရေး မလုပ်နိုင်သကဲ့သို့ ပြည်သူများအား မြေမြှုပ်မိုင်းအကြောင်းနှင့် ပတ်သက်၍ အသိပညာပေးခြင်း မရှိသေးကြောင်း ဒေသခံများက ပြောဆိုသည်။
ပြီးခဲ့သည့် ၂၀၂၃ အောက်တိုဘာ နောက်ဆုံးပတ်မှ စတင်ခဲ့သည် စစ်ကောင်စီနှင့် ညီနောင်မဟာမိတ်တို့၏ “၁၀၂၇ စစ်ဆင်ရေး”အတွင်း သိန္နီမြို့ပေါ် နှင့် ကျေးရွာ ၁၀ ရွာကျော်မှ ဘာသာရေး အဆောက်အဦးနှင့် ပြည်သူနေအိမ် ၆၀၀ ထပ်မနည်း ပျက်စီးခဲ့ပြီး လက်ရှိတွင် ကိုးကန့်တပ်ဖွဲ့ MNDAA မှ ထိန်းချုပ်ထားသည်။
