သျှမ်းပြည်မြောက်ပိုင်း မိုးမိတ်မြို့နယ်ရှိ တအာင်းအမျိုးသားလွတ်မြောက်ရေးတပ်မတော် TNLA တပ်စခန်းကို စစ်ကောင်စီမှ လေကြောင်းဖြင့် ဗုံးကြဲတိုက်ခိုက်ခဲ့သဖြင့် တပ်သားအဖွဲ့ဝင်သုံးဦး ဒဏ်ရာရရှိခဲ့ကြောင်း သတင်းရရှသည်။
မိုးမိတ်မြို့နယ်ရှိ TNLA တပ်စခန်းကို စစ်ကောင်စီမှ ယမန်နေ့ (ဇွန် ၉)ရက်တွင် လက်နက်ကြီးဖြင့် (၃) ကြိမ်ပစ်ခတ်ခဲ့ပြီး ပေါင် ၅၀၀ ဗုံးကြဲခဲ့သဖြင့် TNLA ရဲဘော် သုံးဦး ဒဏ်ရာရခဲ့သည်ဟု ဖော်ပြထားသည်။
“ ၁၀၂၇ စစ်ဆင်ရေး” သည် ၂၀၂၃ခုနစ် အောက်တိုဘာ ၂၇ ရက်တွင် စတင်ခဲ့ပြီး ဇန်နဝါရီ လဆန်းပိုင်းတွင် တရုတ်နိုင်ငံ၏ ကြားဝင်စေ့စပ်ဆွေးနွေးမှုကြောင့် ရပ်တန့်သွားခဲ့သည်။
စစ်ရေး ရပ်တန့် မှု ၅လကျော် ကြားပြီးနောက် ယခုလ ဇွန် ၁ရက်နေ့မှ ၉ရက်အထိ စစ်ကောင်စီမှ လက်နက်ကြီးဖြင့် (၁၀) ကြိမ်ထက်မနည်းပစ်ခတ်ခဲ့ကြောင်း သိရသည်။
“ ကျနော်အထင်တော့ သျှမ်းပြည်မြောက်ပိုင်းဘက်မှာ စစ်ရေး ပြန်ဖြစ်မယ်ထင်တယ်။ စစ်ကောင်စီကလည်း ဒီကုန်သွယ်ရေးလမ်းကြောင်းကို အခုလိုလွယ်လွယ်နဲ့ လက်လွှတ်မှာမဟုတ်ဘူး။ သေနတ်သံ လက်နက်သံတွေကလည်း ပြန်ကြားနေရတော့ ပြည်သူတွေ သတိနဲ့နေစေချင်တယ်” ဟု မိုးမိတ်မြို့ ဒေသခံ တစ်ဦးက သျှမ်းသံတော်ဆင့်ကိုပြောသည်၊
စစ်ကောင်စီတပ်မှ မိုးကုတ်၊ မိုးမိတ်ရှိ TNLA တပ်စခန်းများကို ဦးတည်ကာ ရည်ရွယ်ချက်ရှိရှိ လက်နက်ကြီးဖြင့်ပစ်ခတ်ပြီး လေကြောင်းအသုံးပြုကာ အင်အားလက်နက်ဖြစ်သည့် ပေါင် ၅၀၀ ဗုံးအသုံးပြု လာရောက်ဗုံးကြဲတိုက်ခိုက်ခြင်း ပြုလုပ်နေကြောင်းလည်း TNLA ထုတ်ပြန်ချက်တွင်ရေးသားထားသည်။
၂၀၂၄ ခုနှစ် ဇန်နဝါရီလကစပြီး မိုးမိတ်မြို့ပေါ်ရှိ စစ်ကောင်စီတပ်နှင့် KIA တို့ကို တိုက်ပွဲများ ပြင်းထန်ခဲ့ပြီး ဒေသခံ တစ်သောင်းကျော် ဘေးလွတ်ရာကို တိမ်းရှောင်ခဲ့ရကာ ယနေ့ထိတိုင် နေရပ်မပြန်နိုင်ကြပေ။
အလုပ်သင် သတင်းထောက် နန်းဆိုင်ခမ်း ရေးသားသည်။
