စစ်အာဏာသိမ်းပြီးနောက် ကရင်နီပြည်(ကယားပြည်) အတွင်း အရပ်သားသေဆုံးမှု ၅၀၀ ကျော်ရှိလာကြောင်း တိုးတက်သော ကရင်နီပြည်သူ့အင်အားစု (PKPF) မှ ထုတ်ပြန်ထားသည်။
၂၀၂၄ ခုနှစ်အတွင်း စစ်တပ်၏အကြောင်းမဲ့တိုက်ခိုက်မှုများကြောင့် အရပ်သားပြည်သူ ၄၅ ဦး သေဆုံးခဲ့ပြီး စစ်ဘေးရှောင်ရင်း ထိခိုက်သေဆုံးသူ ၆ ဦးရှိကြောင်း (PKPF) ၏ ဇွန်လ ၁ ရက် ထုတ်ပြန်ချက်တွင် ဖော်ပြထားသည်။
၂၀၂၁ ခုနှစ် ဖေဖော်ဝါရီလ ၁ ရက်နေ့မှ ၂၀၂၄ ခုနှစ် မေလ ၃၁ ရက်နေ့ထိ စာရင်းများအရ သေဆုံးသွားသော အရပ်သားပြည်သူများစာရင်းမှာ ၅၀၂ ဦးနှင့် စစ်ဘေးရှောင်ရင်း သေဆုံးသွားသည့်ပြည်သူ ၁၅၃ ဦးရှိကြောင်း၊ ပြည်သူ့ကာကွယ်ရေးတပ်ဖွဲ့နှင့် လက်နက်ကိုင်တပ်ဖွဲ့များမှ ကျဆုံးသူ ၅၇၈ ဦးရှိခဲ့ကြောင်း ထုတ်ပြန်ချက်တွင်ဖော်ပြထားသည်။
တိုက်ပွဲဖြစ်ပွားသည့် ၁,၁၃၂ ကြိမ်အတွင်း စစ်ကောင်စီမှ လေကြောင်းတိုက်ခိုက်မှု ၁,၆၃၆ ကြိမ် ပြုလုပ်ခဲ့ကာ ပျက်စီးသွားသည့် နေအိမ်များမှာ ၂,၅၈၇ အိမ်၊ ဘာသာရေးအဆောက်အုံးပျက်စီးမှု ၅၂ လုံး၊ ပျက်စီးသွားသော ဆေးရုံ၊ ဆေးခန်းများ ၁၆ လုံး၊ ပျက်စီးသွား စာသင်ကျောင်း ၂၄ ကျောင်း ရှိခဲ့ကြောင်း ဖော်ပြထားသည်။
“၁၁.၁၁ စစ်ဆင်ရေး”ကြောင့် ကရင်နီးပြည်မှ သျှမ်းပြည်သို့ ၂၀၂၃ နိုဝင်ဘာလ ၁၅ ရက်မှ စတင်ထွက်ပြေး လာပြီး၊ လက်ရှိစစ်ရှောင်များသည် နေရပ်သို့မပြန်နိုင်သေးကြောင်း အသက် ၄၇ နှစ်အရွယ်ရှိ အမျိုးသမီး တစ်ဦးက ပြောသည်။
“တော်လှန်ရေးတပ်တွေဖက်က မိုင်းတွေရှင်းလင်းရေးလုပ်ပြီး ရှင်းလင်းသွားရင် ပြန်လည် ကြိုဆိုရေး တွေ လုပ်ရင်တော့ ကျမတို့လည်း ပြန်ချင်ပါတယ်” ဟု ၎င်းအမျိုးသမီးမှပြောသည်။
အဆိုပါ စစ်ရှောင်များသည် သျှမ်းပြည် တောင်ကြီး၊ အောင်ပန်း၊ ညောင်ရွှေ၊ ဆီဆိုင်စသည့်မြို့များတွင် စစ်ဘေးရှောင် နေရသည်မှာ ၆ လ ခန့်ရှိလာကြောင်း သိရသည်။
စစ်ရှောင်များသည် ညောင်ရွှေမြို့တွင် အိမ်ခန်းငှားနေထိုင်ခဲ့ရသည်မှာ ၆ လခန့်ရှိလာပြီးနောက် အလုပ်အကိုင် ရှားပါးလာသဖြင့် စားဝတ်နေရေးသည် တဖြည်းဖြည်း ပိုကြပ်တည်းလာကြကာ အိမ်ခန်းငှား စစ်ရှောင်များနှင့် ဘုန်းကြီးကျောင်းများတွင် နေထိုင်နေကြသောစစ်ရှောင်များမှာ မိမိနေရပ်သို့ပြန်နေလိုကြကြောင်း စစ်ရှောင်များက ပြောသည်။
သျှမ်းပြည်သို့ “၁၁.၁၁စစ်ဆင်ရေး” ကြောင့် ရောက်ရှိလာသည့် ကရင်နီစစ်ရှောင်ဦးရေ စုစုပေါင်း ၅သောင်း ဝန်းကျင် ရှိပြီးဖြစ်ကြောင်း သိရသည်။
အလုပ်သင် သတင်းထောက် ယူဂျင်း ရေးသားသည်။
Leave a Comments