သျှမ်းပြည် ဟိုပုံးမြို့ နယ်တွင် အမျိုးသားတစ်ဦး နွားကျောင်းနေစဥ် မြေမြုပ်မိုင်းနင်းမိပြီး ဒဏ်ရာ ပြင်းထန်ကြောင်း သတင်းရရှိသည်။
သျှမ်းပြည် ဟိုပုံးမြို့နယ် လွယ်ဝိုးတုတ်ရွာ ယမန်နေ့ (ဇွန်လ ၂) ရက် နံနက်ပိုင်းတွင် အမျိုးသားတစ်ဦး နွားကျောင်းနေစဥ် မြေမြုပ်မိုင်းနင်းမိ၍ ခြေထောက်တစ်ဖက်ပြတ်သည် အထိ ဒဏ်ရာရရှိခဲ့ပြီး တောင်ကြီး စဝ်စံထွန်းဆေးရုံသို့ ပို့ဆောင်ခဲ့ကြကြောင်း အသက် ၄၀ ဝန်းကျင် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“နွားကျောင်းရင်း ဗုံးထိပြီးတော့သွားတယ် ။နှစ်လုံးထိတာ တစ်လုံးကနွားထိပြီး နွားကချက်ချင်းသေတယ်။လူကတော့ ခြေထောက်ထိသွားတယ်။ဆေးရုံကို ချက်ချင်း ပို့လိုက်ကြတာ။ “ ဟု ၎င်အမျိုးသမီး ကဆိုသည်။
ထို မြေမြုပ်မိုင်းကြောင့် ထိခိုက်ဒဏ်ရာရရှိသွားသော အမျိုးသားသည် အသက် ၄၉ နှစ် အရွယ် ခွန်ငယ်ဖြစ်ပြီး မိသားစုစားဝတ်နေရေးအတွက် နွားကျောင်းရင်း ဖြေရှင်းနေရသူဖြစ်သည်။
သျှမ်းပြည်တောင်ပိုင်း ဟိုပုံး ၊ ဆီဆိုင် ၊ ပင်လောင်း ၊ ညောင်ရွှေ မြို့နယ်တွင် (၄) လအတွင်းအရပ်သား သေဆုံးမှုမှာ (၉၉) ဦးထိရှိပြီး၊ သေနတ်ဖြင့် ပစ်ခတ်ခံရခြင်း ၊ မြေမြုပ်မိုင်းများနင်းမိခြင်း ၊ ကြွင်းကျန်လက်နက်ကြီးများ ပေါက်ကွဲရာမှ ထိခိုက် ဒဏ်ရာရရှိကြောင်း သိရသည်။
Leave a Comments