သျှမ်းပြည်တောင်ပိုင်း ဟိုပုံးမြို့နယ် ပြည်သူ့စစ်မှုထမ်းများ အတွက် ငွေကြေးများကောက်ခံနေပြီး ပြည်သူ့စစ်မှုထမ်းများကို ကျိုင်းတုံသို့ ပို့ဆောင်နေကြောင်း သတင်းရရှိသည်။

သျှမ်းပြည် ဟိုပုံးမြို့နယ်ရှိ ကျေးရွာများမှာ ပြည်သူ့စစ်မှုထမ်းများအတွက် မေလ ၂၇ ရက်တွင် တစ်အိမ်လျှင် အနည်းဆုံး ၅ သောင်း ကောက်နေပြီး၊ ထိုစစ်မှုထမ်းများကို ကျိုင်းတုံမြို့သို့ ပို့ဆောင်သွားခဲ့ကြောင်း ဟိုပုံးမြို့နယ် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“သူတို့က ကျနော်တို့ရွာ ကလေး လေးယောက် ခေါ်တယ်။ နှစ်ယောက်သွားလိုက်ရတယ်။ အဲ့သွားတဲ့ လူနှစ်ယောက်ကို ကျိုင်းတုံဘက်ကို ပြန်ပို့တာ။ကျနော်တို့က ရွာက တခြားရပ်ကွက်တွေလည်း ခေါ်သွားတယ်။တချို့ ရပ်ကွက်က ၃ ယောက် တချို့က ၂ ယောက်။အဲ့ခေါ်သွားတဲ့လူနှစ်ယောက်ကို ဖုန်းတွေ လိုတဲ့အဝတ်တွေ ဝယ်ပေးပြီး ပို့လိုက်တာ”ဟု ၎င်းက ပြောသည်။

ထိုပြင် ဟိုပုံးမြို့ပေါ်နှင့် အနီးတဝိုက်ကျေးရွာများကို စစ်မှုထမ်းရန် နှင့် လူငှားရမ်းရန် အတွက် ဟုဆိုကာ တစ်အိမ်လျှင်ကျပ်ငွေ ၅ သောင်း လိုက်‌ကောက်နေကြောင်း သိရသည်။

“ဟိုပုံးမြို့ထဲမှာတော့ စစ်မှုမထမ်းချင်ရင် တစ်လကို တစ်သိန်းခွဲ လောက်ပေးနေတာ တွေရှိတယ်။ တချို့ရပ်ကွက် တွေကြတော့လည်း ၁ အိမ်ကို ၅သောင်းက နေ ၁သိန်းကျော်ထိ ထည့်ပေးရတယ်။မြို့ပေါ် မှာကြတော့ ကောက်တဲ့ရပ်ကွက်တွေ‌ကောက်နေပြီး”ဟု ဟိုပုံးမြို့နယ် ဒေသခံအမျိုးသားတစ်ဦးက သျှမ်းသံတော်ဆင့် ကိုပြောသည်။

ထိုပြင် ဟိုပုံးမြို့နယ်တွက် ပြည်သူ့ စစ်မှုထမ်း မလုပ်ချင်ပါက ကျေးရွာအုပ်ချုပ်ရေးမှူးနှင့် ဆယ်အိမ်မှူး၊ ရာအိမ်မှူးတို့ကို တစ်လ လျှင် တစ်အိမ် အလှည့်ကျ လုပ်ရမည်ဖြစ်ကြောင်း သိရသည်။

“ဖြစ်နိုင်ပါတယ်။မလုပ်ချင်တာတွေ ရှိတယ်လေ။တချို့တွေဆို လုပ်ရတော့မယ်လို့ကြားရင် ထိုင်းကို ထွက်ပြေးနေကြတာ။စစ်မှုထမ်းပါတဲ့ ဟာတွေလည်းထွက်ပြေးတာတွေရှိတာပေါ့။ရွာတွေဖက်မှာလည်း အဲ့လိုပဲ။နမ့်ခုတ်က အုပ်ချုပ်ရေးမှူးတောင် မတွေ့ဘူးတောင်ကြီးမှာပဲနေတာ”ဟု ၎င်းက ပြောသည်။

စစ်မှုထမ်းဥပဒေ အသက်သွင်းမှုကြောင့် လက်ရှိ မြို့နယ် ရပ်ကျေး အုပ်ချုပ်ရေးအဖွဲ့များ ငွေရွှင်နေသည့် နည်းတူ လူငယ်လူရွယ် အများအပြား နည်းလမ်းပေါင်းစုံဖြင့် ပြည်ပသို့ ထွက်ခွာနေသည်မှာ သျှမ်းတောင်ရှိ ကျေးရွာ အချို့တွင် လူငယ် လုံးဝမရှိတော့ကြောင်း ဒေသခံများက ပြောသည်။

ယခု ပြဋ္ဌာန်းထားသည့် စစ်မှုထမ်းဉပဒေအရ အသက် ၁၈ နှစ်မှ အသက် ၃၅ နှစ်အတွင်း အမျိုးသမီးများနှင့် အသက် ၁၈ နှစ်မှ အသက် ၂၇ နှစ်အတွင်း အမျိုးသမီးများ စစ်မှုထမ်းရမည် ဖြစ်သည်။

စစ်မှုထမ်းရန်အတွက် စစ်သင်တန်းကာလကို ၃ လလျာထားပြီး တစ်နှစ်လျှင် ၄ ကြိမ် စစ်မှုထမ်းရန် ခေါ်ယူမည်ဟု ဆိုထားရာ တစ်နှစ်လျှင် ပြည်သူ ၂၀,၀၀၀ စစ်မှုထမ်းရန် ခေါ်ယူမည်ဖြစ်ကြောင်း သိရသည်။

၂၀၁၉ ခုနှစ် ကောက်ယူထားသည့် ကြားဖြတ်သန်းကောင်စာရင်းအရ စစ်မှုမထမ်းမနေရ ဉပေဒေနှင့် အကျုံးဝင်သူ မြန်မာနိုင်ငံသား အမျိုးသား ၆ ဒသမ ၃ သန်းနှင့် အမျိုးသမီး ၇ ဒသမ ၇ သန်း စုစုပေါင်း ၁၄ သန်းရှိသည်ဟု စစ်ကောင်စီက ထုတ်ပြန်ထားသည်။