Saturday, July 20, 2024

ဆီဆိုင်မြို့နေရပ်ပြန်သူများ တပ်သားစုဆောင်ခံရ

Must read

သျှမ်းပြည် တောင်ပိုင်း ဆီဆိုင်မြို့ပေါ်တွင် စစ်ကောင်စီနှင့် ပအိုဝ်းပြည်သူ့စစ် (PNO)တပ်တို့၏ ဖိအားပေးမှုကြောင့် နေရပ်ပြန်လာသွားသည့် ပြည်သူများကို စစ်သားစုဆောင်းနေကြောင်း စုံစမ်းသိရှိရသည်။

သျှမ်းတောင်၊ ဆီဆိုင်မြို့တွင် စစ်ကောင်စီနှင့် ပူးပေါင်းတပ်တို့မှ ပြည်သူများကို နေရပ်ပြန်မလာပါက နေအိမ်များကို ချိတ်ပိတ် သိမ်းဆည်းမည်ဟု ဖိအားပေးခြိမ်းခြောက်သည်။

ထို့နောက် ပြည်သူများသည် နေရပ်သို့ပြန်သွားစဥ် အသက် (၁၈)နှစ် မှ အသက် (၆၀)အရွယ်ရှိ အမျိုးသားများကို စစ်မှုထမ်းရန် စစ်ကောင်စီ နှင့် PNO တပ်ဖွဲ့မှ တပ်သားသစ်စုဆောင်းနေကြောင်း ဆီဆိုင်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ သူတို့ကပြန်လာခိုင်းပြီး သူတို့ပဲ စစ်မှုထမ်းဖို့ခေါ်တယ်။ ခုဆို ပြန်လာတဲ့ လူငယ် တော်တော်များများက စစ်မှုထမ်းဖို့ ခေါ်ခံရပြီ။ အများအားဖြင့်တော့ လူငယ်တွေကို ခေါ်တာများတယ်။ ပြန်လာမိတာ မှားပြီထင်တယ်။ သူတို့ကို ကြောက်လို့သာ ပြန်လာရတာ”ဟု ဒေသခံ အမျိုးသား တစ်ဦးကပြောသည်။

အသက်၁၈ နှစ်မှ ၃၅ အတွင်း အမျိုးသားများကို စစ်မှုထမ်းရမည်ဆိုသော်လည်း လက်ရှိတွင် အသက် ၆၀ ဝန်းကျင် အမျိုးသားများကို ခေါ်ယူနေကြောင်း သိရှိရပါသည်။

ထို့အပြင် နေရပ်ပြန်သူများသည် မိုင်းအန္တရာယ်ကိုပါ ကြောက်လန့်နေရပြီး လက်နက်ကြီး ပစ်ခတ်မှုများလည်း ရှိနေဆဲဖြစ်ကြောင်း သိရသည်။

“ လက်နက်ကြီးတွေလည်း ပစ်ခတ်နေတုန်းပဲ ။ အိမ်မှာက ဘာရစရာမကျန်တော့ဘူး။ ပစ္စည်းတွေလည်း အကုန်ခိုးခံရတယ်။ အိမ်ကလက်နက်ကြီးပစ်တော့ အကုန်ပျက်စီးသွားတယ်။ သံတို သံစ ကအစအကုန်ခိုးခံရတယ်။ မိုင်းတွေလည်း မကွဲသေးတာတွေ ရှိသေးတော့ ပိုအန္တရာယ်များတယ်။”ဟု နေရပ်ပြန်ဒေသခံ တစ်ဦးက ဆိုသည်။

လက်ရှိတွင် ဆီဆိုင်မြို့နေရပ်ပြန်သူများသည် မပေါက်ကွဲသေးသည့် လက်နက်ကြီးနှင့် မိုင်းများစွာ ရှိနေကာ အသက်အန္တရာယ် အတွက် အာမခံချက်မရှိဘဲ စိုးရိမ်ထိတ်လန့်နေရကြောင်း ၎င်းနေရပ်ပြန် ပြည်သူက ဆိုသည်။

ပအိုဝ်းပြည်သူ့စစ် (PNO) ဘက်မှ မြေမြုပ်မိုင်းများကို လာရောက်ရှင်းလင်းပေးမည်ဟု နေရပ်ပြန် ပြည်သူများကို ပြောဆိုခဲ့သော်လည်း လက်တွေ့မှ လာရောက်ရှင်းလင်းပေးခြင်းမရှိပေ။

ဇန်နဝါရီ ၂၈ ရက်နေ့တွင် စစ်ကောင်စီနှင့် ပအိုဝ်းပြည်သူ့စစ် (PNO) ပူးပေါင်းတပ်နှင့် ပအိုဝ်းအမျိုးသားလွတ်မြောက်ရေး တပ်မတော် နှင့် တော်လှန်ရေး ပူးပေါင်းအဖွဲ့တို့ တိုက်ပွဲဖြစ်ပွားခဲ့ပြီး စစ်ကောင်စီ၏ လက်နက်ကြီးကြောင့် နေအိမ်နှင့် ဘာသာရေး အဆောက်အအုံများပျက်စီးခဲ့ပြီး ဆီဆိုင်ဒေသခံများနှင့် ကရင်နီစစ်ဘေးရှောင်များ ထပ်မံပြောင်းရွှေ့စစ်ရှောင်ခဲ့ရကြောင်း သိရှိရပါသည်။

အလုပ်သင် သတင်းထောက် နန်းလရောင် ရေးသားသည်။

Leave a Comments

- Advertisement -spot_img

Latest article