သျှမ်းပြည် မြောက်ပိုင်း မူဆယ် – လားရှိုးသို့ သွားသည့် တောတွင်း ရှောင်ကွင်းလမ်းတွင် မိုးရွာသွန်းမှုကြောင့် လမ်းများကြမ်းတမ်းနေပြီး၊ ဂိတ်ကြေးများအဆမတန်ကောက်ယူမှုကြောင့် ကားသမားများ အခက်ကြုံ နေကြောင်း စုံစမ်းသိရသည်။

သျှမ်းပြည် မြောက်ပိုင်း မိုးဦးရာသီမှ စ၍ မူဆယ် – လားရှိုးသို့ သွားသည့် တောလမ်းတွင် မိုးရွာတွင်းမှုကြောင့် လမ်းများကြမ်းတမ်းခြင်း၊ ကားငယ်များ သွားလာရန်အတွက် အခက်အခဲများကြုံတွေ့နေရကြောင်း ကားသမားတစ်ဦးက သျှမ်းသံတော်ဆင့်ကိုပြောသည်။

“လမ်းက မိုးရွာရင်တော်တော်ဆိုးတယ်။ မိုင်းတီ၊နမ့်ခမ်းနားမှာလည်း လမ်းကကြမ်းတယ်။ ၆ ဘီးတွေတောင် မနည်းသွားနေရတာ။ လယ်ထွန်စက်တွေနဲ့ပါ ဆွဲခိုင်းနေရတာ။ မြေနီလမ်းတွေ ဆိုတော့ အရမ်းအခြေနေ ဆိုးတာပေါ့။ လမ်းကလည်းအရမ်းချော်တယ်။ ကုန်ဈေးနှုန်းတွေလည်း တက်ဖို့ပဲရှိတယ်”ဟု ကားသမားတစ်ဦးက ပြောသည်။

မူဆယ်မှ လားရှိုးမြို့သို့ သွားသည့် တောလမ်းတကြောတွင် တိုင်းရင်းသားလက်နက်ကိုင်တပ်ပေါင်းစုံ ဂိတ်များ ငွေကြေးတောင်းမှုများကြောင့် ကားသမားများအတွက် အခက်အခဲများဖြစ်စေကြောင်း ၎င်းကဆက်ပြောသည်။

“ဂိတ်တွေကတော့ တအာင်း၊ ကချင်၊ရှမ်း နဲ့ တော်လှန်‌ရေးတပ် တွေရှိတယ်။ အများဆုံးက‌တော့ တအာင်းဂိတ်တွေ။တောင်းတာလည်းအရမ်းတောင်တယ်။‌ ကျနော်တို့ကလည် ဆီဖိုးတွေ၊ ဂိတ်ကြေးတွေ၊ လမ်းက အခွန်ခတွေ၊ အဲ့လမ်းမှာ ကားခံရင်လည်း ထွန်စက်နဲ့ဆွဲရင် ပေးရတာ တွေလည်းရှိသေးတယ်။”ဟု ကားသမားတစ်ဦးက ပြောသည်။

မူဆယ်မှ လားရှိုးမြို့ထိ လမ်းတလျောက် လက်နက်ကိုင်များအတွက် ပေးဆောင်ရသည့်ငွေပမာဏမှာ ကျပ်ငွေ ၂ သိန်းမှ ၄ သိန်းခန့် ရှိကြောင်း သိရသည်။

ယခင်တွင် မူဆယ်မှ လားရှိုးမြို့ထိ ကားခ တစ်ယောက်လျှင် ၃ သောင်းဝန်းကျင်သာကုန်ကျပြီး ယခုတွင် ကားခ တစ်ယောက်လျှင် ၁ သိန်းခွဲထိ ရှိပြီး ကုန်ပစ္စည်းတင်ပို့ခ များလည်း ဈေးတက်နေကြောင်း ခရီးသည်များက ပြောသည်။

သျှမ်းပြည်တွင် “၁၀၂၇ စစ်ဆင်ရေး” စစ်ကောစီနှင့် ညီနောင်မဟာမိတ်တို့၏ တိုက်ပွဲများကြောင့် လမ်းပန်း ဆက်သွယ်‌ရေးများ၊ တံတားများပျက်စီးမှုနှင့် ပြည်ထောင်စုလမ်းမကြီး များလည်း ပိတ်ထားခဲ့ရပြီး ကားသမား များလည်း ယခင်က မှောင်ခိုလမ်းဖြစ်ခဲ့သည့် တောလမ်းကို ပြန်လည်အသုံးပြုနေခဲ့ကြ ကြောင်းသိရသည်။