သျှမ်းပြည် ကျောက်မဲမြို့နယ်အတွင်းရှိ မိုင်းငေါ့မြို့တွင် သျှမ်းဘာသာဖြင့် ရေးသားထားသည့် မြို့ဝင်ဆိုင်းဘုတ်တွင် မူရင်းအတိုင်း ဆက်ရှိနေပြီး နောက်တစ်ဘက်တွင် မြန်မာစာနှင့်အတူ တအာင်း(ပလောင်)စာကို ထပ်မံဖြည့်ထားကြောင်း စုံစမ်းသိရသည်။

တအာင်း(ပလောင်) အမျိုးသားလွတ်မြောက်ရေး တပ်မတော် TNLA သိမ်းပိုက်ထားသည့် မိုင်းငေါ့မြို့တွင် ယခင်က မြို့စည်ပင်သာယာရေးအဖွဲ့မှ ပြုလုပ်ထားသည့် မြို့ဝင်ဆိုင်းဘုတ်ကို မေလ တတိယပတ်အတွင်းက မြန်မာစာဖြင့် ရေးသားထားသည့် မြို့အမည်နေရာတွင် တအာင်း(ပလောင်)စာနှင့်အတူ ပြင်ဆင်ရေးသားလိုက်ကြောင်း ဒေသခံများထံမှ သိရသည်။

ထို့အတူ မိုင်းငေါ့မြို့အဝင်ရှိ သျှမ်းဘာသာဖြင့် ရေးသားထားသည့် မြို့ဝင်ဆိုင်းဘုတ်မှာ တအာင်း(ပလောင်စာ)ဖြင့် အစားထိုး ရေးသားခံလိုက်ရကြောင်း အွန်လိုင်းဆိုရှယ်မီဒီယာပေါ်တွင် ပျံ့နှံ့လာခဲ့ရာ မဟုတ်မှန်ကြောင်း မိုင်းငေါ့ဒေသခံများက ပြောသည်။

“မိုင်းငေါ့မြို့အဝင် ဆိုင်းဘုတ်က ဘယ်ညာနှစ်ဘက် ၂ ခု ရှိတာ။ အခု ပလောင်စာနဲ့ ပြန်ရေးတာက အရင်က စည်ပင်အဖွဲ့လုပ်ထားတဲ့ ဆိုင်းဘုတ်မှာ ပလောင်စာနဲ့ ဗမာစာ အတူတူ ပြန်ရေးတာပေါ့။ မြို့သူမြို့သားတွေ ကိုယ်ထူကိုယ်ထနဲ့ သျှမ်းလိုရေးထားတဲ့ ဆိုင်းဘုတ်ကတော့ ဘယ်ဘက်မှာ နဂိုအတိုင်း ရှိပါတယ်၊ ဘာမှ မပြောင်းလဲပါဘူး”ဟု မိုင်းငေါ့မြို့မှ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

မိုင်းငေါ့မြို့နယ်ခွဲရှိ သျှမ်းဘာသာဖြင့် ရေးသားထားသည့် ဆိုင်းဘုတ်ကို စည်ပင်သာယာရေးအဖွဲ့ ပြုလုပ်ထားသည့် မြို့ဝင်ဆိုင်းဘုတ်နှင့်အပြိုင် ကျောက်မဲ-မိုင်းငေါ့ လမ်းမကြီးဘေးတွင် ၂၀၁၇/၁၈ ခုနှစ်ခန့်က ရဟန်းသံဃာများ ဦးဆောင်ပြီး မြို့မိမြို့ဖများ ကိုယ်ထူကိုယ်ထ ဆောက်လုပ်ခဲ့ကာ သျှမ်းအလံနှင့် သာသနာ့အလံတို့လည်း ပါရှိကာ လက်ရှိတွင်လည်း မူရင်းအတိုင်း တည်ရှိနေသေးကြောင်း ဒေသခံများထံမှ သိရသည်။

“သျှမ်းစာနဲ့ ရေးထားတဲ့ ဆိုင်းဘုတ်ကို ဖျက်ပြီးတော့ တခြားစာနဲ့ အစားထိုး ရေးခံလိုက်ရပြီလို့ ပြောကြတာ မဟုတ်ဘူး၊ အဲ့တာက သက်သက်စီပဲ။ အဖျက်မခံရဘဲနဲ့ တကယ်ဖျက်ခံလိုက်ရသလိုမျိုး သတင်းဖြန့်တာကျတော့ ဒေသခံတွေအတွက် အကျိုးမရှိဘူးလေ၊ အထင်လွှဲစရာ ဖြစ်တာပေါ့”ဟု မိုင်းငေါ့မြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ပြောသည်။

ပြီးခဲ့သည့် ဧပြီလအတွင်းက မိုင်းငေါ့မြို့ ဒေသခံ ရပ်မိရပ်ဖများနှင့် TNLA တပ်ဖွဲ့မှ တာဝန်ရှိသူများ တွေ့ဆုံခဲ့ကြပြီး တရားဥပဒေစိုးမိုးရေးလုပ်ငန်းများ၊ TNLA အုပ်ချုပ်နယ်မြေအတွင်း ရှမ်းပြည်တိုးတက်ရေးပါတီ SSPP/SSA ၏ အခွန်ကောက်ခံခြင်း အပါအဝင် တပ်သားသစ် စုဆောင်းနေခြင်းအပေါ် အဖြေရှာ ဖြေရှင်းသွားမည့် အကြောင်းအရာများကို ဆွေးနွေးခဲ့ကြောင်း TNLA သတင်းနှင့် ပြန်ကြားရေးဌာနက ဧပြီလ (၈) ရက်တွင် သတင်းထုတ်ပြန်ထားသည်။

“၁၀၂၇ စစ်ဆင်ရေး”အတွင်း TNLA တပ်ဖွဲ့အနေဖြင့် ကျောက်မဲမြို့နယ်အတွင်းရှိ မိုင်းငေါ့နှင့် မိုင်းလုံမြို့ အပါအဝင် နမ့်ဆန်၊ မန်တုံ၊ နမ္မတူ၊ နမ့်ခမ်းနှင့် ကွတ်ခိုင် (၇)မြို့တို့ကို သိမ်းပိုက်ထိန်းချုပ်ထားပြီး စစ်ကောင်စီနှင့် ဟိုင်ဂင်သဘောတူညီချက်အရ အပစ်အခတ် ရပ်စဲပြီးနောက် ၎င်းမြို့များတွင် အုပ်ချုပ်ရေးယန္တရား ထူထောင်နိုင်ရန် လုပ်ဆောင်နေသည်။

အလားတူ မေလ ပထမပတ်အတွင်းကလည်း တအာင်း(ပလောင်)တပ်ဖွဲ့ TNLA သိမ်းပိုက်ထားသည့် ကွတ်ခိုင်မြို့နယ်ရှိ မိုင်းယုရွာအဝင် လမ်းခွဲဆိုင်းဘုတ်တွင် မူရင်းရေးသားထားသည့် သျှမ်းစာနှင့် မြန်မာစာများ ဖျက်ဆီးခံလိုက်ရပြီး တအာင်း(ပလောင်)စာဖြင့် အစားထိုး ရေးသားထားကြောင်း ဒေသခံများက ပြောသည်။