Saturday, July 20, 2024

MNDAA က ဒေသတွင်း ရာဇဝတ်မှု အမျိုးအစား (၈)မျိုးအတွက် ပြစ်မှု ပြစ်ဒဏ်ထုတ်ပြန်လာ

Must read

သျှမ်းပြည် အထူးဒေသ(၁) ကိုးကန့်ဒေသ တရားစီရင်ရေးတွင် ကျင့်သုံးသွားမည့် ရာဇဝတ်မှုဆိုင်ရာ ပြစ်ဒဏ်များကို ကိုးကန့်တပ်ဖွဲ့ MNDAA က မေလ ၂၂ ရက်စွဲဖြင့် ထုတ်ပြန်လိုက်သည်။

“၁၀၂၇ စစ်ဆင်ရေး”အတွင်း သိမ်းပိုက်ထိန်းချုပ်နိုင်ခဲ့သည့် နယ်မြေများတွင် တရားဥပဒေစိုးမိုးရေးအတွက် ကိုးကန့်တပ်ဖွဲ့ MNDAA ၏ စစ်ရေးအုပ်ချုပ်မှုကော်မတီက ရာဇဝတ်မှု အမျိုးအစား (၈)မျိုးအတွက် ကျင့်သုံးမည့် ပြစ်မှုပြစ်ဒဏ်များကို ထုတ်ပြန်လာခြင်း ဖြစ်သည်။

၎င်းတို့အထဲတွင် လူသတ်မှု၊ ပြန်ပေးဆွဲမှု၊ ငွေညှစ်မှု၊ ခိုးဆိုးလုယက်မှုများ၊ လူကုန်ကူးမှုနှင့် အခြားသော မှုခင်းများကို ပြင်းထန်စွာ နှိမ်နင်းရန်အတွက် ပြစ်မှုအမျိုးအစားအလိုက် ငွေဒဏ်နှင့်အတူ ထောင်ဒဏ် ၃ နှစ်မှ ၁၀ နှစ်အထိလည်းကောင်း၊ တစ်သက်တစ်ကျွန်းထောင်ဒဏ် သို့မဟုတ် သေဒဏ်အထိလည်းကောင်း ပြစ်ဒဏ်ချမှတ်သွားမည်ဟု ရေးသားထားသည်။

အွန်လိုင်းငွေကြေးလိမ်လည်မှု လုပ်ကိုင်သူများကိုလည်း ကျူးလွန်သည့် ငွေကြေးပမာဏအလိုက် ပြစ်ဒဏ်အမျိုးအစား ခွဲခြားထားပြီး တရုတ်ယွမ်ငွေ တစ်သောင်းမှ တစ်သိန်းကြား ကျူးလွန်သူကို ထောင်ဒဏ် (၃)နှစ်၊ ယွမ်ငွေ တစ်သိန်းနှင့် တစ်သန်းကြား ကျူးလွန်သူကို ငွေဒဏ်နှင့် (၁၀) နှစ်ထက် မပိုသော ထောင်ဒဏ်၊ ယွမ်ငွေ တစ်သန်းအထက် ကျူးလွန်သူကို (၁၀) နှစ်ထက် မနည်းသည့် ထောင်ဒဏ် (သို့မဟုတ်) တစ်သက်တစ်ကျွန်း ထောင်ဒဏ်နှင့် ပိုင်ဆိုင်မှုတို့ကိုလည်း သိမ်းဆည်းသွားမည်ဖြစ်ကြောင်း ဆိုသည်။

လက်ရှိတွင် ကိုးကန့်တပ်ဖွဲ့ MNDAA အနေဖြင့် “၁၀၂၇ စစ်ဆင်ရေး”အတွင်း သိမ်းပိုက်ထိန်းချုပ်နိုင်ခဲ့သည့် မြို့များကို လောက်ကိုင်ခရိုင်၊ ကိုးကန့်ခရိုင်၊ မုံးကိုးခရိုင်နှင့် သိန္နီခရိုင်ဟူ၍ ဖွဲ့စည်းပြီး အုပ်ချုပ်ရေးယန္တရား လည်ပတ်နိုင်ရန် စစ်ရေးအုပ်ချုပ်မှုကော်မတီဖြင့် အကောင်အထည်ဖော် လုပ်ဆောင်နေကြောင်း ဒေသခံများထံမှ သိရသည်။

ပြီးခဲ့သည့် ဧပြီလ (၂၄) ရက်တွင် ကိုးကန့်တပ်ဖွဲ့ MNDAA ထိန်းချုပ်ထားသည့် လောက်ကိုင်မြို့တွင် MNDAA အရာရှိ အပါအဝင် ရာဇဝတ်မှုကျူးလွန်သူ (၁၀) ဦးကို အများပြည်သူရှေ့မှောက် တရားစီရင်ပြီး ဥပဒေနှင့်အညီ သေဒဏ်ချမှတ်ခဲ့ကြောင်း MNDAA က ထုတ်ပြန်ခဲ့သည်။

ထိုသေဒဏ်ပေးခံရသူ (၁၀) ယောက်သည် ပြည်သူအပေါ် ငွေကြေးအဓမ္မ တောင်းခံခြင်း၊ ပြန်ပေးဆွဲခြင်းနှင့် လူသတ်မှုများကို ကျူးလွန်ခဲ့ခြင်းကြောင့် ကိုးကန့်တပ်ဖွဲ့ MNDAA မှ သေဒဏ်ပေးခဲ့ခြင်းဖြစ်ကြောင်း ဆိုထားသည်။

ယင်းကဲ့သို့ လောက်ကိုင်မြို့၌ ပြစ်မှုကျူးလွန်သူ (၁၀) ဦးကို အများပြည်သူရှေ့မှောက် ကိုးကန့်တပ်ဖွဲ့ MNDAA က သေဒဏ်ချမှတ်ခဲ့ခြင်းကို ဥရောပသမဂ္ဂ က အပြင်းထန်ဆုံး ရှုတ်ချပြီး ဘယ်လိုအခြေအနေဖြစ်ဖြစ် သေဒဏ်ချမှတ်မှုကို ပြင်းပြင်းထန်ထန် ဆန့်ကျင်ကန့်ကွက်ကြောင်း မြန်မာနိုင်ငံဆိုင်ရာ ဥရောပသမဂ္ဂရုံး (EU) က ဧပြီလ ၂၆ ရက်တွင် ထုတ်ပြန်သည်။

ပုံစာ – လောက်ကိုင်မြို့ ပြစ်မှုကျူးလွန်သူ (၁၀) ဦးကို အများပြည်သူရှေ့မှောက် MNDAA သေဒဏ်ချမှတ်စဉ်

Leave a Comments

- Advertisement -spot_img

Latest article