ပင်းတယ လက်ဖက်ဝယ်သူမဲ့ဖြစ်နေ

သျှမ်းပြည်တောင်ပိုင်း ပင်းတယမြို့နယ် ကောင်းဘိုကျေးရွာအုပ်စုတွင် လက်ဖက်လုပ်ငန်းကို အားကိုး လုပ်ကိုင်နေ သော်လည်း လက်ရှိမှာ လက်ဖက်ဝယ်သူမဲ့ဖြစ်နေကြောင်း စုံစမ်းသိရသည်။

လက်ရှိမှာ ပင်းတယမြို့နယ် ကောင်းဘို့ကျေးရွာအုပ်စုရှိ ကျေးရွာများသည် လက်ဖက်လုပ်ငန်းကိုသာ အဓိက လုပ်ကိုင်နေကြပြီး လက်ဖက်ဝယ်သူမဲ့ဖြစ်ပြီး စျေးနှုန်းပါ ကျဆင်းနေကြောင်း လက်ဖက်လုပ်ကိုင်သူများက သျှမ်းသံတော်ဆင့်ကို ပြောသည်။

“အရင် နှစ်တွေက ရွာငံနဲ့ ပင်းတယမြို့ထဲကလူတွေက လက်ဖက်လာဝယ်ကြတယ်။ အခုက တန်ခူးလပြီးတဲ့ နောက်လာ မဝယ်ကြဘူး။ လက်ဖက်ကလည်း ခူးပြီးသား၊ လက်ဖက်လည်းများနေတယ်။ အဓိက လက်ဖက်ပဲလုပ်တော့ ပစ်ထားလို့လည်းမရ။ လာဝယ်တဲ့ သူကလည်းမရှိဖြစ်နေတယ်” ဟု လက်ဖက်လုပ်ငန်းလုပ်ကိုင်သည့် ဒေသခံ အမျိုးသမီးတစ်ဦးက သျှမ်းသံတော်ဆင့်ကိုပြောသည်။

ယခင်နှစ်များတွင် လက်ဖက် အစို တစ်ပိဿလျှင် မြန်မာကျပ်ငွေ ၃ထောင် မှ ၄ထောင်ကျပ်ထိ ရှိပြီး ယခုနှစ် မှာ တစ်ပိဿလျှင် ကျပ်ငွေ တစ်ထောင်ငါးရာကျပ် (၁၅၀၀ ကျပ် )မှ တစ်ထောင်ရှစ်ရာကျပ် (၁၈၀၀ ကျပ်)ထိ စျေးနှုန်းကျဆင်းသွားသဖြင့် လက်ဖက်လုပ်ငန်းလုပ်သူများ အရှုံးပေါ် နေကြောင်း သိရသည်။

‘’အရင်ဈေးက တစ်ပိဿာ ၃၀၀၀ ကျပ် ကနေ (၄၀၀၀)ကျပ်အထိ ရောင်းရတယ်။ ယခုဈေးက တစ်ပိဿကို (၂၀၀၀)တောင်မပေးဘူး။ အခု ဒီတိုင်းပဲထားတယ်။ ခူးပြီးလှောင်ထားနေရတယ်။ ’’ဟု ၎င်းက ဆိုသည်။

အဆိုပါလက်ဖက်များ ယခုနှစ်တွင် ကုန်ဈေးနှုန်း အဆမတန်ကျသဖြင့် လက်ဖက်စိုရောင်းသူစိုက်သူများအနေဖြင့် အခက်အခဲများစွာရှိကြောင်း လက်ဖက်စိုက်ပျိုးသူများက ပြောသည်။

ပင်းတယမြို့နယ်မှထွက်သည့် လက်ဖက်အမျိုးအစားများကို ဥရောပနိုင်ငံ ထိတင်ပို့ရောင်းချကြောင်းသိရသည်။

အလုပ်သင် သတင်းထောက် နန်းဆိုင်ခမ်း ရေးသားသည်။