သျှမ်းတောင်၊ ရွာငံမြို့ အထွက် စစ်ဆေးရေးဂိတ်တွင် စစ်ကောင်စီ၏ လက်အောက်ခံ ရဲများက လမ်းသွား ပြည်သူများကို ငွေအဆမတန် ခြိမ်းခြောက် တောင်းနေကြောင်း စုံစမ်းသိရသည်။
ရွာငံမြို့ အထွက် တောင်ကြီး- အောင်ပန်းသွားလမ်းပေါ်ရှိ စစ်ဆေးရေး ဂိတ်တွင် မေလ ၁၇ ရက်၌ စစ်ကောင်စီ၏ လက်အောက်ခံ ရဲတပ်ဖွဲ့ ဝင်များက ဆိုင်ကယ်နှင့် ကားများကို စစ်ဆေးမှုများ ပြုလုပ်ပြီး အကြောင်းပြချက် အမျိုးမျိုးဖြင့် ဖမ်းဆီးပြီး ဒဏ်ငွေ ၃သောင်းမှ ၅သောင်း အထိ ခြိမ်းခြောက်ပြီး အတင်းအဓမ္မ တောင်းနေကြောင်း ကိုယ်တိုင် ကြုံတွေ့ခဲ့ရသည့် ဒေသခံများက သျှမ်းသံတော် ဆင့်ကို ပြောသည်။
“ ကျနော်ဆို ပိုက်ဆံ (၅ သောင်း) တောင်းလို့ ပေးခဲ့ ရတယ်။ ဆိုင်ကယ် ဦးထုပ် မပါလို့တဲ့၊ ပိုက်ဆံမပေးရင် အချုပ်ထဲ ထည့်မယ် လို့ပါပြောတော့ ကျနော်လည်း ပိုက်ဆံပေးခဲ့ ရတယ်။ “ဟု ဒေသခံ အမျိုးသားတစ်ဦးက ပြောသည်။
ထိုသို့ ဖမ်းဆီးခံရသည်မှာ သုံးကြိမ်ရှိပြီ ဖြစ်ပြီး နှစ်ကြိမ်တွင် ငွေပေးခဲ့ရပြီး တစ်ကြိမ်တွင် ဆိုင်ကယ် ထားခဲ့ရကာ နှစ်ရက်လောက်နေမှ ငွေ ၁သိန်းဖြင့် ပြန်ရွေးခဲ့ရကြောင်း ၎င်းအမျိုးသားက ဆိုပါသည်။
အလားတူ ဆိုင်ကယ် ဖမ်းခံရသည့် အမျိုးသမီး တစ်ဦးမှာလည်း ငွေမပေးနိုင်သော ကြောင့် တောင်းပန်ခဲ့ရပြီး အချိန်ကြာမြင့်စွာ စစ်ဆေးခံခဲ့ရကြောင်း ကိုယ်တိုင်ကြုံတွေ့သည့် အမျိုးသမီးက သျှမ်းသံတော်ဆင့်ကိုပြောသည်။
“ ဂိတ်နားမှာ အရင်က ဆိုင်ကယ် ဆင်းမတွန်းရဘူး။ ဒါနဲ့ စီးသွားလိုက်တာ ဖမ်းခံလိုက်ရတယ်။ သူတို့က ဆိုင်ကယ်သော့ပါ သိမ်းသွားတယ်။ ပိုက်ဆံ (၃သောင်း) တောင်းတယ်။ ကိုယ့်မှာလဲ မပါလာတာနဲ့ မနဲတောင်းပန်ခဲ့ရတယ်။ ရဲတစ်ယောက်နဲ့ အရင်က သိဖူးတော့ ဒါနဲ့ ပြန်လွှတ်ပေးလိုက်တာ။”ဟု အမျိုးသမီးက ဆိုသည်။
ထို့အပြင် အမျိုးသားများကို ပို၍ စစ်ဆေးငွေတောင်းနေပြီး အမျိုးသမီးများစုကို အချိန်ကြာသည်အထိ စစ်ဆေး မေးမြန်းပြီး ပြန်လွှတ်ပေးကြောင်း၎င်း အမျိုးသမီးက ဆက်ပြော သည်။
စစ်ကောင်စီ၏ လက်အောက်ခံ ရဲများသည် ယခုကဲ့သို့ စစ်ဆေး ငွေအဆမတန် ခြိမ်းဆောက်တောင်းနေသည်မှာ (၂)လခန့် ကြာလာပြီဖြစ်ပြီး ဖမ်းဆီးခံထားရသည့် ကားနှင့် ဆိုင်ကယ် ( ၁၅) စီးကျော် ရှိကြောင်း ရွာငံဒေသခံများကပြောသည်။
ထို့ပြင် ယခင်တွင် ငွေတောင်းခံမှု ပမာဏသည် ကျပ်ငွေ ၁သောင်းလောက်ရှိခဲ့ သော်လည်း ယခုကာလတွင် ငွေတောင်းခံမှု ပမာဏသည် ကျပ်ငွေ ၅သာင်း အထက် ပိုများလာကြောင်းစုံစမ်းသိရှိရပါသည်။
လက်ရှိတွင် ရွာငံမြို့နယ်ရှိ ကျေးရွာအများစုတွင် စစ်ကောင်စီများ တပ်စွဲထားပြီး ပေါ်တာဆွဲမှုများ ပြုလုပ်လျက် ရှိကာ ဧပြီလ ၂၁ ရက်တွင် စစ်ကောင်စီနှင့်ဂျိုးဖြူ PDF (JPRF) အဖွဲ့တို့ဖြင့် တိုက်ပွဲ ဖြစ်ပွားခဲ့ပြီး စစ်ကောင်စီတပ်များက နွားပန်းကြီး ကျေးရွာတွင် လက်နက်ကြီးဖြင့် ပစ်ခတ်နေကြောင်း သိရသည်။
အလုပ်သင်သတင်းထောက်ရေးသားသည်။
Leave a Comments