သျှမ်းပြည် ရပ်စောက်မြို့နယ်တွင် ရှမ်းပြည်တိုးတက်ရေးပါတီ SSPP/SSA နှင့် သျှမ်းပြည်ပြန်လည်ထူထောင်ရေးကောင်စီ RCSS/SSA တို့ နှစ်ဘက်ထိတွေ့တိုက်ပွဲ ဖြစ်ပွားခဲ့ကြောင်း စုံစမ်းသိရသည်။

ယမန်နေ့ (မေလ ၁၇ ရက်) နံနက် ၈ နာရီကျော်ခန့်တွင် ရပ်စောက်မြို့နယ် ကျိုင်းခမ်းကျေးရွာအုပ်စုအနီး လှုပ်ရှားနေသည့် RCSS တပ်ဖွဲ့နေရာကို SSPP တပ်သားများက တောနင်းရှာဖွေခဲ့ရာမှ နှစ်ဘက်စစ်ကြောင်း ထိတွေ့ပြီး နာရီဝက်ခန့်အကြာ တိုက်ပွဲဖြစ်ပွားခဲ့ကြောင်း ရပ်စောက်ဒေသခံများက ပြောသည်။

“မနေ့က တကယ်ပစ်ကြတာ ဟုတ်တယ်။ သူတို့စစ်ကြောင်းတွေ ထိပ်တိုက်တွေ့မိတယ်လို့ ပြောရမှာပေါ့။ အရင်လကတည်းက မဟာမိတ်တပ်တွေဘက်က စစ်အင်အားဖြည့်လာပြီး တောနင်းရှာကြတာ၊ မိုင်းလင်းဘက်ကနေ ကျိုင်းခမ်းရွာကို သွားလိုက်လာလိုက် လုပ်တာပေါ့။ ရပ်စောက် အရှေ့ဘက်ပေါ့ သူတို့ပစ်ကြတာ”ဟု ရပ်စောက်မြို့နယ်မှ ဖြစ်စဉ်သိရှိသူ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ရပ်စောက်မြို့နယ်တွင် ဖြစ်ပွားခဲ့သည့် သျှမ်းတပ်နှစ်တပ် အချင်းချင်းကြား တိုက်ပွဲနှင့် ပတ်သက်ပြီး နှစ်ဘက်ထိခိုက် ကျရှုံးမှုများကို အသေးစိတ် မသိရှိရသေးဘဲ နားစံကျေးရွာအနီး တပ်စွဲထားသည့်နေရာမှ RCSS တပ်သားများ ဆုတ်ခွာသွားပြီးနောက်ပိုင်း သေနတ်ပစ်ခတ်သံများ ရပ်စဲသွားကြောင်း ၎င်းဒေသခံ အမျိုးသားက ဆက်ပြောသည်။

“တောနင်းရှာတာက မဟာမိတ်တပ်တွေ ရှာတာ၊ ဝတ်စုံကတော့ SSPP ဝမ်ဟိုင်းစစ်ဝတ်စုံ ဝတ်ထားတာပေါ့။ စကားသွားပြောကြည့်ရင် သျှမ်းစကားမတတ်ဘူး။ ကျိုင်းခမ်းဘက်က ဈေးဆိုင်တွေကို သူတို့ဝင်စစ်တုန်းကလည်း သျှမ်းစကား မပြောကြဘူး။ အဲ့တာကြောင့် တချို့ကလည်း ‘ဝ’ မဟုတ်ရင် ကိုးကန့်ပဲ ဖြစ်မှာ ဆိုပြီး ပြောကြတာ”ဟု ရပ်စောက်မြို့နယ်မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။

အလားတူ ရပ်စောက်မြို့နယ် ကျိုင်းခမ်းကျေးရွာအုပ်စုတွင် တပ်စွဲထားသည့် RCSS တပ်ဖွဲ့ စခန်းချနေရာကို SSPP နှင့် UWSA မဟာမိတ်ပူးပေါင်းတပ်များအပြင် စစ်ကောင်စီတပ်ကလည်း ထိုးစစ်ဆင်ခဲ့ရာ နှစ်ဘက်ထိတွေ့တိုက်ပွဲ ဖြစ်ပွားခဲ့ရကြောင်း RCSS တပ်ဖွဲ့၏ Tai Freedom မီဒီယာက မေလ ၁၈ ရက်တွင် ထုတ်ပြန်လာခဲ့သည်။

လက်ရှိတွင် သံလွင်မြစ် အနောက်ခြမ်းသို့ ရောက်ရှိလာသည့် ‘ဝ’တပ်ဖွဲ့ UWSA သည် စစ်အင်အား ဆက်လက်ဖြည့်တင်းနေပြီး စစ်ကောင်စီတပ်ကလည်း စစ်သည်အင်အား ၃၅ဝ ခန့်ဖြင့် RCSS တပ်စခန်းဘက်သို့ စစ်အင်အား ဖြည့်တင်းလာခြင်းကြောင့် နှစ်ဘက်တင်းမာမှု ရှိနေကြောင်း Tai Freedom မီဒီယာတွင် ဖော်ပြထားသည်။

ရပ်စောက်မြို့နယ်တွင် ဖြစ်ပွားခဲ့သည့် သျှမ်းတပ်နှစ်တပ်အကြား နှစ်ဘက်ထိတွေ့တိုက်ပွဲအတွင်း ‘ဝ’တပ် UWSA နှင့် စစ်ကောင်စီတပ်တို့ ပါဝင်ပြီး အင်အားဖြည့် ထိုးစစ်ဆင်နေခြင်းနှင့် ပတ်သက်၍ SSPP/SSA ပြောရေးဆိုခွင့်ရှိသူ ဗိုလ်မှူးကြီး စိုင်းဆုနှင့် RCSS/SSA ပြောရေးဆိုခွင့် ရှိသူ ဗိုလ်မှူး စိုင်းခမ်းစံတို့ထံ သျှမ်းသံတော်ဆင့်က ဖုန်းဖြင့် ဆက်သွယ်ခဲ့သော်လည်း လက်ခံဖြေကြားခြင်း မရှိသေးပါ။

သျှမ်းတပ်နှစ်တပ်ဖြစ်သည့် SSPP/SSA နှင့် RCSS/SSA တို့သည် သျှမ်းပြည်မြောက်ပိုင်းတွင် “၁၀၂၇ စစ်ဆင်ရေး” တိုက်ပွဲပြင်းထန်နေစဉ် ၂၀၂၃ ခုနှစ် နိုဝင်ဘာလ ၂၉ ရက်က နှစ်ဘက်တပ်ဖွဲ့ အချင်းချင်းကြား အပစ်အခတ် ရပ်စဲခဲ့ပြီးနောက် (၅) လကျော်အကြာတွင် နှစ်ဘက်ထိတွေ့တိုက်ပွဲ ပြန်လည်ဖြစ်ပွားလာခဲ့ခြင်း ဖြစ်သည်။