သျှမ်းပြည် ဆီဆိုင်မြို့နယ်တွင် နေ့စဥ် စစ်ကောက်စီမှ လက်နက်ကြီးများ ဒရုန်းများဖြင့် ပစ်ခတ်နေပြီး ပအိုဝ်းပြည်သူ့စစ် ( PNO )က ကျေးရွာရှိ ဒေသခံများကို ဓားစာခံများ ပြုလုပ်နေကြောင်း သတင်းရရှိသည်။
သျှမ်းပြည် ဆီဆိုင်မြို့နယ် ဝိုင်းလုံကျေးရွာကို ယမန်နေ့(ဧပြီလ ၃၀ ရက်) ညနေ ၃ နာရီဝန်းကျင်တွင် စစ်ကောင်စီ နှင့် ပြည်သူ့ စစ်အဖွဲ့များသည် လက်နက်ကြီး ၂ ကြိမ်၊ ဒရုန်းဖြင့် ၄ ကြိမ် ပစ်ခတ်တိုက်ခိုက်ခဲ့ကြောင်း PNLA မှ ထုတ်ပြန်ထားသည်။
ထို ကျေးရွာ၏ ပတ်ဝန်းကျင်တွင်လည်း စစ်ကောင်စီက ဒရုန်းဖြင့် ၆ ကြိမ် ပစ်ခတ်တိုက်ခိုက် ခဲ့ကြောင်း ထုတ်ပြန်ချက်တွင် ရေးသားထားသည်။
ထိုတို့ လက်နက်ကြီး ဒရုန်းများဖြင့် ပစ်ခတ်တိုက်မှုကြောင့် ကျေးရွာရှိ ဒေသခံများ ကြောက်လန့် ထွက်ပြေးတိမ်းရှောင်နေရကြောင်း သိရသည်။
အလားတူ ဆီဆိုင်မြို့နယ်ရှိ ထမ်းယံရွာ နှင့် ပန်းအွန်း ကျေးရွာရှိ ဒေသခံလူထုများကို စစ်ကောင်စီ နှင့် PNO ပြည်သူ့ စစ်အဖွဲ့များက တောင်ယာသွားခြင်း နှင့် ရွာအပြင်ထွက်ခွင့် မပေးကြောင်း ဓားစာခံကဲ့သို့ ပိတ်ပင်တားဆီးနေကြောင်း ထုတ်ပြန်ချက်တွင် ဖော်ပြထားသည်။
ပြီးခဲ့သည့် ဧပြီလ ၂၅ ရက်တွင်လည်း ဆီဆိုင်မြို့နယ် နမ့်တောင်း ကျေးရွာအနီးရှိ တောင်ယာထဲသို့ လက်နက်ကြီး ဖြင့် ပစ်ခတ်တိုက်ခိုက်မှုကြောင့် တောင်ယာ ကလေး ၂ ဦးကို အပါအဝင် မိသားစု ဝင် ၃ ဦး ထိခိုက် ဒဏ်ရာရရှိခဲ့ကြောင်း သိရသည်။