သျှမ်းပြည် ကွတ်ခိုင်မြို့နယ်တွင် တအာင်း (ပလောင်) အမျိုးသားလွတ်မြောက်ရေးတပ်မတော် TNLA နှင့် ကိုးကန့်တပ်ဖွဲ့ MNDAA တို့အကြား အချင်းချင်း ခြိမ်းခြောက်ပစ်ခတ်မှု ဖြစ်ပွားခဲ့ကြောင်း စုံစမ်းသိရသည်။

ဧပြီလ ၁၉ ရက်နေ့တွင် ကွတ်ခိုင်မြို့နှင့် တာမိုးညဲမြို့အကြားရှိ မော်ဟန်ကျေးရွာအုပ်စုအနီး တအာင်း(ပလောင်) တပ်ဖွဲ့ TNLA နှင့် ကိုးကန့်တပ်ဖွဲ့ MNDAA စစ်ကြောင်းတို့ နှစ်ဘက်ထိတွေ့မှု ဖြစ်ပွားပြီး ညီနောင်မဟာမိတ်အချင်းချင်း သေနတ်ခြိမ်းခြောက်ပစ်ခတ်မှု ရှိခဲ့ကြောင်း ကွတ်ခိုင်ဒေသခံများက ပြောသည်။

“မော်ဟန်ဘက်မှာ ဖြစ်တာ။ MNDAA က အကြောင်းမကြားဘဲနဲ့ အဲ့ဘက်တက်သွားတာ မတော်တဆ ထိတွေ့မှုဖြစ်တယ်ပြောတယ်။ အဲ့တာနဲ့ TNLA က သူတို့ကို ဝိုင်းပြီးတော့ ပေးမသွားတာ။ တိုက်ပွဲဖြစ်တာတော့ မဟုတ်ဘူး၊ နှစ်ဘက်တင်းမာမှု ဖြစ်ပြီးတော့ TNLA က ခြိမ်းခြောက်ပစ်ခတ်တဲ့ပုံစံ ဖြစ်တာ”ဟု ကွတ်ခိုင်မြို့နယ်မှ စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

၎င်းခြိမ်းခြောက်ပစ်ခတ်မှုအတွင်း တအာင်း(ပလောင်) တပ်ဖွဲ့ TNLA မှ သေနတ်ကျည်သည် ကိုးကန့်တပ်သား တစ်ဦးအား ထိမှန်ခဲ့ပြီး လက်ရှိတွင် သိန္နီမြို့၌ ဆေးဝါးကုသနေကြောင်း စစ်ရေးသတင်းရင်းမြစ်က ပြောဆိုသည်။

“TNLA က သေနတ်နဲ့ ခြိမ်းခြောက်ပြီး ပစ်တော့ ကိုးကန့်တပ်သား တစ်ယောက်ကို ထိမှန်ပြီး အခု သိန္နီမှာ ဆေးကုနေတယ်။ ညပိုင်းရောက်တော့ ဆွေးနွေးမှု အဆင်ပြေလို့ထင်တယ် ကိုးကန့်တပ်လည်း သွားလို့ရသွားတယ်”ဟု ကွတ်ခိုင်မြို့နယ်မှ ၎င်းစစ်ရေးသတင်းရင်းမြစ်က သျှမ်းသံတော်ဆင့်ကို ဆက်ပြောသည်။

ကွတ်ခိုင်မြို့နယ်တွင် ဖြစ်ပွားခဲ့သည့် ခြိမ်းခြောက်ပစ်ခတ်မှုနှင့် ပတ်သက်ပြီး TNLA တပ်ဖွဲ့ သတင်းနှင့် ပြန်ကြားရေးဌာနမှူးထံသို့ လည်းကောင်း၊ ကိုးကန့်တပ်ဖွဲ့ MNDAA ပြောရေးဆိုခွင့်ရှိသူ လီကျားဝင်းထံသို့ လည်းကောင်း သျှမ်းသံတော်ဆင့်မှ စာပို့မေးမြန်းထားသော်လည်း နှစ်ဘက်စလုံးက ပြန်လည်ဖြေကြားခြင်း မရှိသေးပါ။

အလားတူ ဧပြီလ ၁၉ ရက်တွင် ကွတ်ခိုင်မြို့ပေါ်ရှိ TNLA နှင့် MNDAA တပ်ဖွဲ့တို့အကြား နယ်မြေစိုးမိုးမှုနှင့် ပတ်သက်၍ စစ်ရေးတင်းမာနေပြီး နှစ်ဘက်တပ်ဖွဲ့အကြား ညှိနှိုင်းဆွေးနွေးမှု ပြေလည်ခြင်း မရှိသေးဘဲ သေနတ်ပစ်ဖောက်သံများ ကြားခဲ့ရကြောင်း ကွတ်ခိုင်ဒေသခံများထံမှ သိရသည်။

“၁၉ ရက်နေ့က ဖြစ်တာ ဟုတ်တယ်၊ သေနတ်ဖောက်တာတို့ ရှိတာပေါ့။ ကြားမှာတောင်မှ ညှိနှိုင်းလို့ အဆင်မပြေသေးဘူးထင်တယ်။ ပေါက်ကွဲမယ့်ဆဲဆဲ ဗုံးပေါ်မှာ ထိုင်နေရသလိုပဲ၊ ဘယ်အချိန်မှာ စနက်တံ ဖြုတ်လိုက်မလဲတော့ မသိဘူး အဲ့လိုအခြေအနေဖြစ်နေတယ်။ လက်နက်ကိုင် အချင်းချင်းကြား ပဋိပက္ခ မဖြစ်အောင်တော့ အားလုံးရဲ့ တာဝန်ဖြစ်တယ်”ဟု ကွတ်ခိုင်မြို့မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထို့အပြင် ယမန်နေ့ (ဧပြီလ ၂၂ ရက်)တွင် သိန္နီမြို့နယ် မိုင်းပါးကျေးရွာအုပ်စုသို့ စစ်အင်အားဖြည့်တင်းရန် ရောက်ရှိလာသည့် TNLA စစ်ကြောင်းကို ကိုးကန့်တပ်ဖွဲ့ MNDAA က ဒရုန်းပျံဝဲ၍ ဆုတ်ခွာခိုင်းခဲ့ကြောင်း သိန္နီမြို့နယ် ဒေသခံများက ပြောသည်။

သျှမ်းမြောက်တွင် ဟိုင်ဂင် သဘောတူညီချက်အရ ညီနောင်မဟာမိတ်နှင့် စစ်ကောင်စီတို့သည် “၁၀၂၇ စစ်ဆင်ရေး” ယာယီအပစ်အခတ် ရပ်ဆိုင်းထားစဉ် ‘ဝ’တပ်ဖွဲ့ ဦးဆောင်သည့် ပြည်ထောင်စုနိုင်ငံရေး ဆွေးနွေးညှိနှိုင်းရေးကော်မတီ (FPNCC)တွင် ပါဝင်သော တပ်ဖွဲ့ဝင် အချင်းချင်းအကြား နယ်မြေစိုးမိုးမှုနှင့် ပတ်သက်ပြီး စစ်ရေးပဋိပက္ခ ပွတ်တိုက်မှုများ ခပ်စိပ်စိပ် ဖြစ်ပွားလာသည်။