သျှမ်းပြည် သိန္နီမြို့နယ် တွင်နေထိုင်သည့် အမျိုးသားတစ်ဦး မြေမြုပ် မိုင်းနင်းမိ၍ သေဆုံးခဲ့ပြီး ကြောင်း စုံစမ်း သိရသည်။
သျှမ်းပြည် သိန္နီမြို့နယ် ကောင်းဟော်ကျေးရွာတွင် ယမန်နေ့ (ဧပြီလ ၂၁ ရက်) နံနက်ပိုင်း၌ အမျိုးသား တစ်ဦး အိမ်ခြံနောက်ဖေးတွင် ဟင်းသွားခူးရာမှ မြေမြုပ်မိုင်းနင်းမိ၍ ထိခိုက်ဒဏ်ရာ ပြင်းထန်ကာ သေဆုံးခဲ့ကြောင်း သိန္နီ ဒေသခံ အမျိုးသမီးတစ်ဦက သျှမ်းသံတော်ဆင့်ကို ပြောသည်။
“သူက အိမ်အနောက်ဖက်က ခြံထဲကို ဟင်းသွားခူးရင်းနဲ့ မိုင်းနင်းမိတာ။မိုင်းက သူ့ခြံဝန်းထဲမှာကို ရှိတာ။သူတို့ အိမ်က အရင်တိုက်ပွဲဖြစ်တုန်းက စစ်ကောင်စီတွေက လာနေသွားတာလေ။ခြေထောက်နှစ်ဖက်လုံး ပြတ်သွား တာ။သွေး အထွက်လွန်ပြီး သေသွားတာပေါ့။ မြေမြုပ်မိုင်းကတော့ စစ်ကောင်စီဟာတွေပါ။”ဟု သိန္နီမြို့ ဒေသခံ အမျိုးသားတစ်ဦက ပြောသည်။
ထိုသေဆုံးသွားသည့် အမျိုးသားသည် အသက် ၄၀ ဝန်းကျင် စိုင်းအောင်မင်း ဖြစ်ကြောင်းသိရသည်။
အလားတူ ပြီးခဲ့သည့် ဧပြီလ ၂၀ ရက်တွင်လည်း သိန္နီမြို့နယ် ဟိုသ ကျေးရွာတွင် အမျိုးသမီး ကလေးငယ် ၂ ဦး ဗုံးစ နှင်းမိ၍ ခြေထောက်ဒဏ်ရာရရှိခဲ့ပြီး ဗုံးစများကြောင့်လည်း ဒေသခံများ စိုးရိမ်နေရကြောင်း သိန္နီဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“တလောကလည်း စစ်ကောင်စီတွေ လေယာဉ်နဲ့ ဗုံးကြဲတုန်းက ကျန်ခဲ့တဲ့ အစတွေ အရမ်းချွန်တယ် အရမ်းထက်တယ်။အဲ့ဒါတွေကို ကလေးတွေက သွားနင်းမိတာ။သူတို့ အဲ့လို လေယာဉ်နဲ့ ဗုံးကြဲခဲ့လို့ ကျန်ခဲ့တဲ့ ဗုံးစတွေက လယ်ကွင်း ထဲမှာကျတာတွေက အရမ်းစိုးရိမ်ရတယ်။သူတို့ ဗုံးတွေက ချွန်တယ် ထက်တယ်လေ လယ်လုပ်ရင် အခက်အခဲတွေရှိနိုင်တာပေါ့။” ဟု သိန္နီမြို့ ဒေသခံအမျိုးသားတစ်ဦးက ပြောသည်။
ပြီးခဲ့သည့် ၂၀၂၃ အောက်တိုဘာ နောက်ဆုံးပတ်မှ စတင်ခဲ့သည် စစ်ကောင်စီ နှင့် ညီနောင်မဟာမိတ်တို့၏ “၁၀၂၇ စစ်ဆင်ရေး”အတွင်း သိန္နီမြို့ပေါ်နှင့်ကျေးရွာ ၁၀ရွာကျော်မှ ဘာသာရေးအဆောက်အဦးနှင့် နေအိမ် ၆၀၀ ထပ်မနည်း ပျက်စီးခဲ့ကြောင်း သိရသည်။
“၁၀၂၇ စစ်ဆင်ရေး” တိုက်ပွဲများကြောင့် သိန္နီဒေသခံများ လားရှို့မြို့သို့ ထွက်ပြေးကာ စစ်ဘေးတိမ်းရှောင်နေရပြီး၊ လက်ရှိမှာ သိန္နီမြို့ကို ကိုးကန့်တပ်ဖွဲ့ MNDAA ထိန်းချုပ်ထားသည့် နယ်မြေဖြစ်သည်။
Leave a Comments