Friday, June 14, 2024

ဆီဆိုင်တွင် PNLO ခေါင်းဆောင် မိသားစု နေအိမ်အပါအဝင် နေအိမ် ၇ လုံးကို PNO မီးရှို့

Must read

သျှမ်းပြည် ဆီဆိုင်မြို့နယ် နားခိုက်ကျေးရွာရှိ ပအိုဝ်းအမျိုးသား လွတ်မြောက်ရေးအဖွဲ့ချုပ် PNLO ဒုတိယဥက္ကဌ ၂ ၊ စစ်ဦးစီးချုပ်၏ မိသားစုပိုင်နေအိမ်အပါအဝင် ဒေသခံနေအိမ် ၇ လုံးကို စစ်ကောင်စီလက်အောက်ခံ ပအိုဝ်းပြည်သူ့စစ် PNO ဖြိုချဖျက်စီးကာ မီးရှို့ခဲ့ကြောင်း စုံစမ်းသိရသည်။ 

တော်လှန်ရေးကို ဦးဆောင်နေသည့်သူ၏ နေအိမ်များဟုဆိုကာ ဧပြီလ ၂၀ ရက် နေ့လယ် ၁၂ နာရီခန့်တွင် ပအိုဝ်းပြည်သူ့စစ် PNO မှဖြိုချဖျက်ဆီးပြီး တချို့နေအိမ်အား မီးရှို့ခဲ့ကြောင်း၊ နေအိမ်အတွင်းရှိ တန်းဖိုးရှိပစ္စည်းများ၊ အိမ်တွင်းပရိဘောဂပစ္စည်းများကိုလည်း သယ်ယူသွားခဲ့ကြောင်း PNLO ၏ပြန်ကြားရေး ခွန်ရိန်းယံက သျှမ်းသံတော်ဆင့်ကိုပြောသည်။

“သူတို့ဖြိုချဖျက်ဆီးတဲ့အကြောင်းအရင်း အဓိကကတော့ ကျနော်တို့ဒုဥက္ကဌက တော်လှန်ရေးကို ဦးဆောင်တဲ့သူတွေ၊ နေအိမ်တွေဆိုပြီးတော့မှ ဖြိုချဖျက်စီးတာပေါ့လေ။ အိမ်ထဲမှာရှိတဲ့ ပရိဘောဂတွေ၊ အိမ်တွင်း ပစ္စည်းတွေအကုန်လုံးယူသွားပေါ့။ ပြီးတော့အိမ်ကလည်းနှစ်ထပ်အိမ်၊ ခေတ်ကာလတန်းဖိုးက သိန်းထောင်ဂဏန်းလောက်တန်တယ်” ဟု ၎င်းကပြောသည်။ 

မီးရှို့ခံရသည့်နေအိမ်များ စုစုပေါင်း ၇ လုံးရှိသည့်အနက် နေအိမ် ၆ လုံးသည် ကျေးရွာအတွင်းက ဒေသခံနေအိမ်များဖြစ်ပြီး၊ ထိုထဲတွင်ကုန်စုံဆိုင်ဖွင့်လှစ်ထားသော ဒေသခံနေအိမ် ၂ လုံးလည်း ဖြိုချဖျက်ဆီးခံလိုက်ရကြောင်း သိရသည်။

ယင်းနေအိမ်များကို မီးရှို့သွားသည့် ပအိုဝ်းပြည်သူ့စစ် PNO အဖွဲ့ဝင် ထွန်းနောင်ဆိုသူကဦးဆောင်ပြီး အဖွဲ့ဝင်များနှင့် PNO ပြည်သူ့စစ် အထူးကွန်မန်ဒိုတပ်ရင်းမှ တပ်ဖွဲ့ဝင်များဖြစ်ကြောင်း PNLO က ယနေ့ (ဧပြီလ ၂၁) ရက်၌ ထုတ်ပြန်ထားသည်။ 

ပအိုဝ်းအမျိုးသားလွတ်မြောက်ရေးတပ်မတော် PNLA အနေဖြင့် စစ်အာဏာရှင်စနစ်ကို စတင်ဆန့်ကျင် တိုက်ခိုက်သည့်အချိန်ကတည်းကပင် ပအိုဝ်းအချင်းချင်းတိုက်ခိုက်မည်မဟုတ်ကြောင်း ထုတ်ပြန်အသိပေးခဲ့ပြီး ကျင့်သုံးခဲ့သော်လည်း စစ်ကောင်စီက လက်အောက်ခံ ပအိုဝ်းပြည်သူ့စစ် PNO ကတော့ စစ်ကြောင်းထိုး တိုက်ခိုက်ခြင်း၊ ချုံခိုတိုက်ခိုက်ခြင်းအပြင် တော်လှန်ရေးတပ်ဖွဲ့ဝင်များ၏ မိသားစုဝင်းများကို ဖမ်းဆီးသတ်ဖြတ် ခြင်းများ လုပ်ဆောင်နေသည်ဟု PNLOဘက်ကပြောဆိုထားသည်။

Leave a Comments

- Advertisement -spot_img

Latest article